license for Food: ప్రపంచంలో ప్రమాదకరమైన వంటకం... దీన్ని వండాలంటే లైసెన్స్ అవసరం

ఇంతవరకు ప్రపంచంలో ఏది వండాలన్నా ఎలా వండాలో తెలిస్తే చాలు, కానీ ఈ చేపను వండాలంటే మాత్రం లైసెన్స్ కూడా అవసరం.

(Image credit: Pexels)

ప్రపంచంలోనే ప్రమాదకరమైన వంటకాల్లో ఒకటి జపాన్‌కు చెందిన ‘ఫుగు’ లేదా ‘బ్లో ఫిష్’.జపాన్లోని షిమోనోసెకి అనే ప్రాంతంలో దీన్ని ఎక్కువగా వండుకుని తింటారు. ఈ చేపను వండాలంటే బాగా  అనుభవం ఉన్న, లైసెన్స్ ఉన్న వాళ్లే చేయాలి. ఎందుకంటే ఈ చేప చాలా విషపూరితమైనది. కట్ చేసేటప్పుడు జాగ్రత్త పడకపోతే ఆ విషం వల్ల ప్రాణాంతక పరిస్థితులు ఏర్పడతాయి. ఈ చేపలో ఉండే విషాన్ని ‘టెట్రోడోక్సిన్’గా గుర్తించారు.  ఈ విషం చేపలో ఏ భాగంలో ఉంటుందో, ఆ భాగాన్ని జాగ్రత్తగా వేరు చేసి దూరంగా పడేస్తారు. చుక్క విషం మిగిలిపోయి వండేసినా దాన్ని తిన్నవారికి నోరు తిమ్మిరెక్కిపోవడం, పక్షవాతం రావడం, ఒక్కోసారి మరణం సంభవించడం కూడా జరుగుతుంది. 

మరెందుకు ఈ చేపను తినడం?
ఈ చేప చూడటానికి బెలూన్లా ఉబ్బి ఉంటుంది. నిష్ణాతులైన వంటగాళ్లు దీన్ని చాలా జాగ్రత్తగా కట్ చేస్తారు. చర్మాన్ని ఒలిచేస్తారు. ఈ చేప పొట్టలోని ఓవరీస్, లివర్, పేగులు చాలా విషపూరితమైనవి. స్థానికులు చెప్పినదాని ప్రకారం సైనేడ్ కన్నా ఈ విషం 200 రెట్లు తీవ్రమైనది. జపాన్ ప్రభుత్వం లెక్కల ప్రకారం ఇప్పటివరకు 23 మంది ఈ చేప విషం వల్ల మరణించారు. అయితే ఈ చేప మిగతా భాగాలు చాలా రుచిగా ఉంటాయి. ఆ రుచికి జపనీయులు దాసోహం అయిపోయారు. అందుకే తమ ప్రాణాలను కూడా రిస్క్ చేసి మరీ తింటున్నారు.

16వశతాబ్ధంలో జపాన్లో ఈ చేపపై నిషేధం విధించారు. కానీ తిరిగి 1888లో ఆ నిషేధాన్ని ఎత్తి వేశారు. అయితే ఈ చేప వండడానికి లైసెన్సులు ఇచ్చే పద్దతిని ప్రవేశపెట్టారు. జపాన్లోని ‘షున్‌పార్నో’ అనే రెస్టారెంట్ వారికి మాత్రమే ఈ చేపను వండే లైసెన్స్ ప్రభుత్వం ఇచ్చింది. 

గ్రిల్డ్ ఫుగు, ఫ్రైడ్ ఫుగు, ఫుగు రైస్, ఫుగ్ హాట్ పాట్... ఇలా చాలా రకాల వంటలు ఈ చేపతో వండుతారు. దీన్ని వండేవారికే కాదు, తినేవారికి చాలా ధైర్యం కావాలి.  

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి