Deepika Padukone: దీపిక పదుకోన్ ఆరోగ్య సమస్య ఇదే, అందుకే ఆసుపత్రికి వెళ్లింది, ఈ సమస్య ఎవరికైనా రావచ్చు

ప్రముఖ నటి దీపిక పదుకోన్ చాలా ఫిట్‌గా ఉంటుంది. ఆమెకు అనుకోకుండా ఓ ఆరోగ్య పరిస్థితి తలెత్తింది.

(Image credit: Instagram)

హైదరాబాద్ లో ప్రాజక్టు కె సినిమా షూటింగ్ జరుగుతున్న సంగతి   తెలిసిందే. ఇందులో ప్రభాస్ హీరోగా నటిస్తుండా, బాలీవుడ్ హీరోయిన్ దీపికా హీరోయిన్ గా నటిస్తోంది. ప్రస్తుతం కొన్ని రోజులుగా హైదరాబాద్ లో ఈ సినిమా షూటింగ్ జరుగుతోంది. మంగళవారం హఠాత్తుగా దీపిక పదుకోన్ అస్వస్థతకు గురైంది.వెంటనే ఆమె ఆసుపత్రికి వెళ్లి చెకప్ చేయించుకుని, తిరిగి సెట్స్ కి వెళ్లిపోయింది. ఆమె వచ్చిన సమస్యేంటో తెలుసా? హఠాత్తుగా గుండె అతి వేగంగా కొట్టుకోవడం. హార్ట్ బీట్ పెరగడం కూడా ఒక ఆరోగ్య సమస్యే. దీన్ని ‘టాచీకార్డియా’ అని పిలుస్తారు. 

టాచీకార్డియా అంటే...
క్లీవ్ ట్యాండ్ క్లినిక్ చెప్పిన ప్రకారం టాచీకార్డియా సమస్య వల్ల గుండె కొన్ని సెకన్ల నుంచి కొన్ని గంటల వరకు అతి వేగంగా కొట్టుకుంటుంది. సాధారణంగా హృదయ స్పందన నిమిషానికి 60 నుంచి 100 వరకు ఉంటుంది. అదే వంద బీట్స్ దాటితే అది సమస్యే. దాని పేరే టాచీకార్డియా. 

సూపర్ ఫిట్ కదా...
దీపికా మాజీ బ్యాడ్మింటర్ క్రీడాకారణి, యోగా చేస్తుంది, ఫిట్నెస్ గా ఉంటుంది, అధిక బరువు కూడా లేదు. అయినా ఆమెకు ఇలాంటి సమస్య ఎందుకు వచ్చింది? వైద్యులు ఏమంటున్నారంటే... గుండె రేటు అధికంగా పెరగడానికి ఒత్తిడి, శారీరక, మానసిక సంఘర్షణలు, అతి వ్యాయామం, శ్రమ, కెఫీన్ అధికంగా తీసుకోవడం, హర్మోన్ సమస్యలు, రక్తహీనత, జ్వరం  వంటి పరిస్థితుల్లో గుండె కొట్టుకునే వేగం పెరుగుతుంది. 

ప్రమాదమా?
కొన్నిసార్లు ఇది సాధారణ సమస్యగానే ఉంటుంది. ఒకసారి గుండె వేగంగా కొట్టుకునే సమస్య వచ్చి సాధారణంగా మారిపోతుంది. కానీ కొన్నిసార్లు అది అంతర్లీనంగా ఉన్న గుండె సంబంధిత జబ్బులకు కారణం అవుతుంది. గుండె వేగంగా కొట్టుకోవడంతో పాటూ గుండె దడ రావడం, శ్వాస తీసుకోవడంలో ఇబ్బంది రావడం, మూర్చ వస్తే మాత్రం వైద్యుడిని వెంటనే సంప్రదించాలి. 

రాకుండా ఎలా జాగ్రత్తపడాలి?
1. అధిక రక్తపోటు, అధిక కొలెస్ట్రాల్ పెరగకుండా నియంత్రించుకోవాలి. 
2. గుండెకు హానిచేసే ధూమపానం, మద్యపానం వంటివి వదిలేయాలి. 
3. ఊబకాయం, అధిక బరువు, పొట్ట చుట్టు ఉన్న కొవ్వును తగ్గించుకోవాలి. 
4. గుండెకు అవసరమయ్యే పోషకాహారం తినాలి. 
5. టెన్షన్లు, మానసిక ఆందోళనలు, డిప్రెషన్ వంటివి గుండెను ఇబ్బంది పెడతాయి. ఒత్తిడి బారిన పడకుండా చూసుకోవాలి.