Sweets Damage : స్వీట్స్ తింటే పళ్లు పసుపు అవుతాయా? చాక్లెట్స్, కూల్ డ్రింక్స్ ప్రభావం ఆరోగ్యంపై ఎలా ఉంటుందంటే..
Hidden Effects of Sugar : స్వీట్స్ ఎక్కువ తింటే పళ్లు పసుపు రంగులోకి మారడంతో పాటు ఆరోగ్యానికి ఎన్నో సమస్యలు వస్తాయి. మధుమేహంతో పాటు వచ్చే దీర్ఘకాలిక సమస్యలు ఏంటో చూసేద్దాం.
- తీపి పదార్థాల వల్ల నోటిలోని బ్యాక్టీరియా ఆమ్లాలను ఉత్పత్తి చేస్తుంది.
- ఈ ఆమ్లాలు పళ్ల ఎనామెల్ను దెబ్బతీసి, పళ్లు రంగు మారడానికి కారణమవుతాయి.
- అధిక స్వీట్స్ వల్ల మధుమేహంతో పాటు ఊబకాయం, గుండె జబ్బులు పెరుగుతాయి.
- తీపిని మితంగా తీసుకోవడం, క్రమం తప్పకుండా బ్రష్ చేయడం మంచిది.
Sugary Foods Damage Your Teeth and More : స్వీట్స్ తింటే పళ్లు పుచ్చుపోతాయి అంటారు. అందుకే వీటిని తినడం వల్ల పళ్లు పసుపు రంగులోకి మారిపోతాయా? అనే డౌట్ చాలామందిలో ఉంటుంది. అయితే నిపుణుల అభిప్రాయం ప్రకారం.. స్వీట్స్ తినడం వల్ల పళ్లు నేరుగా పసుపు రంగులోకి మారవు. కానీ అవి పళ్ల రంగు మార్చే ప్రభావం చూపించడంతో పాటు.. అనేక తీవ్రమైన సమస్యలకు దారితీస్తాయని చెప్తున్నారు. మరి స్వీట్స్ ఎక్కువగా తినడం వల్ల మధుమేహం కాకుండా వచ్చే ఇతర ఆరోగ్య సమస్యలు ఏమిటో ఇప్పుడు చూసేద్దాం.
పళ్లపై స్వీట్స్ ప్రభావం..
చాక్లెట్లు, కుకీలు లేదా కూల్ డ్రింక్స్ వంటి తీపి పదార్థాలు తీసుకున్నప్పుడు.. నోటిలోని బ్యాక్టీరియా ఈ చక్కెరలను విచ్ఛిన్నం చేస్తుంది. ఆ సమయంలో యాసిడ్స్ ఉత్పత్తి అవుతాయి. కోల్గేట్ నివేదిక ప్రకారం.. ఈ ఆమ్లం దంతాల బయటి పొర అయిన ఎనామెల్ను దెబ్బతీస్తుంది. క్రమంగా ఎనామెల్ బలహీనపడి.. దంతాలపై పాచి పేరుకుపోతుంది. దీనివల్ల అవి పసుపు రంగులోకి లేదా రంగు మారినట్లు కనిపిస్తాయి. ఈ ప్రక్రియ చివరికి దంత క్షయానికి దారితీస్తుంది. బ్యాక్టీరియా ఉత్పత్తి చేసే ఆమ్లాలు ఎనామెల్లో చిన్న రంధ్రాలను సృష్టిస్తాయి. ఇవి కాలక్రమేణా పెద్దవి అవుతాయి. చికిత్స చేయకుండా వదిలేస్తే.. ఈ ఇన్ఫెక్షన్ దంతాల లోపలి పొరకు వ్యాపించి.. నొప్పి, ఇన్ఫెక్షన్, దంతాలు ఊడిపోవడానికి కూడా కారణమవుతాయి.
అయితే శరీరం ఈ నష్టంలో కొంత భాగాన్ని స్వయంగా మరమ్మత్తు చేసుకుంటుంది. లాలాజలంలోని కాల్షియం, ఫాస్ఫేట్ వంటి ఖనిజాలు దంతాలను బలోపేతం చేయడానికి సహాయపడతాయి. ఈ ప్రక్రియను రీమినరలైజేషన్ అంటారు. అయితే రోజంతా ఎక్కువ మోతాదులో స్వీట్స్ తీసుకుంటే.. ఈ ఇబ్బంది రెట్టింపు అవుతుంది. అలాగే నోరు పొడిగా ఉండడం వల్ల కూడా మరింత నష్టం జరుగుతుంది.
మధుమేహం మాత్రమే కాదు..
స్వీట్స్ ప్రభావం కేవలం దంతాలకే పరిమితం కాదు. ఇది మధుమేహాన్ని పెంచుతుంది. అంతేకాకుండా శరీరంపై వివిధ ప్రభావాలు చూపిస్తుంది. అధిక మొత్తంలో స్వీట్స్ తింటే ఊబకాయం పెరుగుతుంది. గుండె జబ్బుల ప్రమాదం రెట్టింపు అవుతుంది. అలాగే వృద్ధాప్య ప్రక్రియను వేగవంతం చేసి.. చర్మం వదులుగా, కాంతిహీనంగా కనిపించేలా చేస్తుంది. స్వీట్స్ తినడం, స్వీట్ డ్రింక్స్ తాగడం వల్ల ఈ ప్రమాదాలు మరింత పెరుగుతాయి. దీర్ఘకాలిక సమస్యలు మొదలై తీవ్రమైన ఇబ్బందులను కలిగిస్తాయి.
నివారణ చర్యలు
పళ్లను కాపాడుకోవడంతో పాటు.. దీర్ఘకాలిక ఆరోగ్య సమస్యలను దూరం చేసుకునేందుకు.. షుగర్స్ తీసుకోవడం కంట్రోల్ చేయాలి. రోజంతా కాకుండా భోజనంతో పాటు తీపి పదార్థాలను తీసుకోవడం ఉత్తమం. చక్కెర లేని చూయింగ్ గమ్ తీసుకోవచ్చు. పుష్కలంగా నీరు తాగడం, క్రమం తప్పకుండా బ్రష్ చేయడం, ఫ్లాస్ చేయడం వంటివన్నీ ఆరోగ్యకరమైన దంతాలను కాపాడుకోవడానికి సహాయపడతాయి. అయితే ఆరోగ్యాన్ని కాపాడుకునేందుకు షుగర్స్ పూర్తిగా మానుకోవాల్సిన అవసరం లేదని నిపుణులు అంటున్నారు. కానీ మితంగా తీసుకుంటే ఎన్నో ఆరోగ్య సమస్యలను దూరం చేసుకోవచ్చు.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
