Liver Fibrosis in Diabetics : షుగర్ ఉన్నవారికి కొత్త ప్రమాదం.. ప్రతి 4 మధుమేహ రోగుల్లో ఒకరికి లివర్ ఫైబ్రోసిస్, న్యూ స్టడీలో షాకింగ్ విషయాలు
Silent Liver Damage in Diabetes : ఇన్సులిన్ నిరోధకత వల్ల కాలేయానికి నష్టం జరుగుతుందని తాజా అధ్యయనం తెలిపింది. మధుమేహం ఉన్నవారిలో లివర్ ఫైబ్రోసిస్ పెరుగుతుందని వెల్లడించింది. ఇది ఎంత ప్రమాదకరమంటే..
- ప్రతి నలుగురు మధుమేహ రోగులలో ఒకరికి లివర్ ఫైబ్రోసిస్ ఉందని అధ్యయనం.
- డయాబెటిస్ ఇప్పుడు కాలేయాన్ని కూడా ప్రభావితం చేస్తుంది, MASLD ప్రారంభమవుతుంది.
- టైప్ 2 డయాబెటిస్లో 70% మందిలో కాలేయంలో కొవ్వు పేరుకుపోతుంది.
- ఫైబ్రోసిస్ను గుర్తించడం, బరువు నియంత్రణ, వ్యాయామం నివారణకు ముఖ్యం.
Diabetics at Risk of Liver Fibrosis : ప్రతి నలుగురు మధుమేహ రోగులలో ఒకరికి లివర్ ఫైబ్రోసిస్ ఉన్నట్లు తాజా అధ్యయనం గుర్తించింది. డయాబెటిస్ అనేది ఇకపై కళ్లు, మూత్రపిండాలు, నరాలకు మాత్రమే పరిమితం కాకుండా.. కాలేయంపై కూడా ప్రభావం చూపిస్తుందని చెప్తున్నారు. అందుకే మధుమేహుల్లో కాలేయ వ్యాధిని దాని నాల్గవ ప్రధాన సమస్యగా పరిగణించాలని నిపుణులు చెప్తున్నారు. తాజా అధ్యయనంలో తెలిసిన షాకింగ్ విషయాలు ఏంటి? కాలేయంపై షుగర్ ప్రభావం ఎలా ఉంటుందో చూసేద్దాం.
మధుమేహం కేవలం రక్తంలోని చక్కెర స్థాయిలకే పరిమితం అనే భావన నుంచి బయటకు రావాలని చెప్తున్నాయి వివిధ అధ్యయనాలు. 2026లో జరిగిన 'డయాఫిబ్-లివర్ స్టడీ' అనే మల్టీ సెంటర్స్ స్టడీ షాకింగ్ విషయాలు తెలిపింది. భారతదేశంలో టైప్ 2 మధుమేహం ఉన్న నలుగురు రోగులలో.. ఒకరికి లివర్ ఫైబ్రోసిస్ ఉన్నట్లు తెలిపింది. అంటే షుగర్ ఉన్నవారిలో కాలేయం తీవ్రంగా దెబ్బతినడం జరుగుతుందని ఈ అధ్యయనం వెల్లడించింది. అంతేకాకుండా.. ప్రతి 20 మంది రోగులలో ఒకరికి సిర్రోసిస్ వచ్చే ప్రమాదం కూడా ఉందని తెలిపింది.
అధ్యయనంలో షాకింగ్ విషయాలు
ఈ అధ్యయనం ప్రకారం.. మధుమేహం ఇకపై కేవలం కళ్లు, మూత్రపిండాలు, నరాలకు మాత్రమే పరిమితం కాకుండా కాలేయాన్ని కూడా ప్రభావితం చేస్తుంది. ఈ పరిశోధన ప్రత్యేకంగా జీవక్రియ లోపాలతో సంబంధం ఉన్న స్టీటోటిక్ లివర్ డిసీజ్ (MASLD) పై దృష్టి సారించింది. దీనిని గతంలో ఫ్యాటీ లివర్ అని పిలిచేవారు. ఇన్సులిన్ నిరోధకత పెరిగి.. కాలేయంలో అదనపు కొవ్వు పేరుకుపోయినప్పుడు MASLD ప్రారంభమవుతుంది. ఈ కొవ్వు క్రమంగా వాపును కలిగిస్తుంది. చివరికి ఫైబ్రోసిస్కు దారితీస్తుంది. దీనిలో ఆరోగ్యకరమైన కాలేయ కణజాలం మచ్చ కణజాలంతో భర్తీ అవుతుంది.
నిపుణులు ఏమంటున్నారంటే..
టైప్ 2 డయాబెటిస్లో శరీరంలోని కొవ్వు, గ్లూకోజ్ల మధ్య ఏర్పడిన అసమతుల్యత.. కాలేయంపై కూడా ప్రభావం చూపుతుందని డాక్టర్ కపిల్ శర్మ తెలిపారు. గణాంకాల ప్రకారం.. దాదాపు 70 శాతం మధుమేహ రోగులలో కాలేయంలో కొవ్వు పేరుకుపోతుంది. ఇది కాలక్రమేణా వాపు, ఫైబ్రోసిస్కు దారితీస్తుంది. ఊబకాయం, మధుమేహంపై సరైన నియంత్రణ లేకపోవడం, అధిక ట్రైగ్లిజరైడ్స్, మెటబాలిక్ సిండ్రోమ్ వంటి అనేక ప్రమాద కారకాలు ఈ వ్యాధికి ఉన్నాయని వైద్యులు చెప్తున్నారు. ముఖ్యంగా చాలా సందర్భాలలో.. ఎటువంటి స్పష్టమైన లక్షణాలు లేకుండానే కాలేయ వ్యాధి ముదిరి.. ప్రమాదాన్ని మరింత పెంచుతుంది.
ఫైబ్రోసిస్ మరింత ప్రమాదకరం
కాలేయంలో కేవలం కొవ్వు పేరుకుపోవడం కంటే.. ఫైబ్రోసిస్ మరింత ప్రమాదకరమని పరిశోధనలు చెప్తున్నాయి. ఫైబ్రోసిస్ అనేది వ్యాధి మరింత తీవ్రమైన దశకు చేరుకుందని సూచిస్తుంది. సిర్రోసిస్, కాలేయ వైఫల్యం, చివరికి మరణం సంభవించే ప్రమాదాన్ని పెంచుతుంది. అందువల్ల మధుమేహ రోగులలో కేవలం ఫ్యాటీ లివర్ను చెక్ చేయించుకోవడమే కాకుండా.. ఫైబ్రోసిస్ను గుర్తించడంపై ఎక్కువ శ్రద్ధ పెట్టాలని నిపుణులు సిఫార్సు చేస్తున్నారు. వ్యాధిని దాని ప్రారంభ దశలలో గుర్తించడానికి.. లివర్ ఎంజైమ్ టెస్ట్లు, ఫైబ్రోస్కాన్లు వంటి టెస్ట్లు చేయడం చాలా అవసరం.
నివారణ పద్ధతి
ఈ సమస్యను నివారించడానికి.. మధుమేహ రోగులు బరువును అదుపులో ఉంచుకోవాలి. అలాగే సమతుల్య ఆహారం తీసుకోవడం, క్రమం తప్పకుండా వ్యాయామం చేయడం, కార్బోహైడ్రేట్లు, ఆల్కహాల్కు దూరంగా ఉండటం వంటివి చేయాలని వైద్యులు సిఫార్సు చేస్తున్నారు. అలాగే రక్తంలో చక్కెర, కొలెస్ట్రాల్, రక్తపోటును అదుపులో ఉంచుకోవడం కూడా ముఖ్యమని చెప్తున్నారు.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
