ఆమె కలలను కాజేసిన కరోనా పిశాచి, కాళ్లు కోల్పోయి నరకం అనుభవిస్తున్న మోడల్, కారణం ఏమిటీ?

కరోనా కేవలం ఊపిరి మాత్రమే నిలిపేయదు. తేడా వస్తే.. శరీర అవయవాలను కూడా చచ్చుబడేలా చేస్తుంది. ఇందుకు ఈ మోడల్‌కు ఎదురైన పరిస్థితే నిదర్శనం.

Image Credit: Wayne Bridges/Facebook

కోవిడ్-19 ఎంతోమంది జీవితాలను అస్తవ్యస్థం చేసింది. ఎందరినో అనాథలను చేసింది. సరిగ్గా ఇదే సమయానికి గతేడాది ఎందరో ప్రాణాలను పొట్టనబెట్టుకుంది. ప్రస్తుతం కోవిడ్-19 కేసులు కాస్త తగ్గుముఖం పెట్టినా.. అది మిగిల్చిన చేదు గుర్తులు మాత్రం ఇంకా సజీవంగానే ఉన్నాయి. అయితే, కోవిడ్ పూర్తిగా మనుషులను విడిచిపెట్టలేదు. చైనా, దక్షిణ కొరియా, అమెరికా తదితర దేశాల్లో ఇంకా తన ఉనికి చాటుతోంది. మరికొద్ది రోజుల్లో తిరిగి ఇండియాలోకి ప్రవేశించే అవకాశాలు కూడా ఉన్నాయని అంటున్నారు.

కోవిడ్-19 ఎంత ప్రాణాంతకమనేది గతేడాది ‘డెల్టా’ వేరియెంట్ ద్వారా తెలిసింది. కొత్తగా ‘డెల్టాక్రాన్’ వేరియెంట్ కూడా ప్రాణాలను తీసుకెళ్లేందుకు పొంచి ఉన్నట్లు వార్తలు వస్తున్నాయి. ఈ వేరియెంట్ నుంచి జాగ్రత్తగా ఉండాలని ఇప్పటికే ప్రపంచ ఆరోగ్య సంస్థ హెచ్చరించింది. కాబట్టి, మనం జాగ్రత్తగా పాటించడమే ఉత్తమ మార్గం లేకపోతే.. ఈ యువతి తరహాలోనే భయానక అనుభవాన్ని ఎదుర్కోవలసి వస్తుంది. మోడలింగ్‌ను తన కెరీర్‌గా ఎంచుకున్న ఆమె.. ఇప్పుడు నడవలేక శాస్వతంగా వీల్ చైర్‌కు పరిమితమైంది. వైద్యులు ఆమె రెండు కాళ్లను పూర్తిగా తొలగించడంతో భవిష్యత్తులో కూడా ఆమె ర్యాంప్‌పై నడవలేదు. ఈ చేదు విషయాన్ని దిగమింగుతూ ఆమె ఆత్మవిశ్వాసంతో జీవిస్తోంది. మరి ఆమె కాళ్లను కోల్పోడానికి కారణం ఏమిటీ? కోవిడ్ అంత ప్రమాదకరమా? 

ఫ్లొరిడాలోని టాంపాకు చెందిన క్లారీ బ్రిడ్జెస్ అనే యువతి ఈ ఏడాది జనవరి 16న కోవిడ్-19 లక్షణాలతో హాస్పిటల్‌లో చేరింది. కరోనా మయోకార్డిటిస్, సైనోటిక్, అసిడోసిస్, రాబ్డోమియోలిసిస్, న్యుమోనియా తదితర లక్షణాలకు చికిత్స పొందింది. అయితే, కోవిడ్ వల్ల ఆమె కాళ్లకు రక్త సరఫరా నిలిచిపోయింది. కాళ్లు కుళ్లిపోయి, ఆ ఇన్ఫెక్షన్ ఇతర భాగాలకు సోకుతుందనే కారణంతో వైద్యులు ఆమె రెండు కాళ్లను తొలగించారు. దీంతో క్లారీ తన బాధను సోషల్ మీడియా ద్వారా వెల్లడించింది. పుట్టిన రోజుకు కొద్ది రోజుల ముందే ఆమె కాళ్లను కోల్పోవడం ఆమె కుటుంబ సభ్యులను మరింత బాధించింది. ఇప్పుడు శరీరకంగానే కాదు, మానసికంగా కూడా ఎన్నో సవాళ్లను ఎదుర్కోవలసి ఉందని ఆమె తండ్రి  వాపోయాడు. కానీ, ఆమె చాలా ధైర్యం గలదని, కాళ్లు కోల్పోయినా ఆత్మ విశ్వాసంతో.. పూర్తి ఆరోగ్యంతో కోలుకుందని తెలిపాడు.