Mini Bali in India : హైదరాబాద్ నుంచి ‘మినీ బాలి’కి ట్రిప్.. నివటి బీచ్ పూర్తి బడ్జెట్ డిటైల్స్ ఇవే
Nivati Beach : సమ్మర్లో బీచ్కి వెళ్లాలనుకుంటున్నారా? ఇండియాలో.. బడ్జెట్లోనే బాలి వంటి ఎక్స్పీరియన్స్ కావాలంటే నివటి బీచ్కి వెళ్లిపోండి. పూర్తి వివరాలు ఇవే..
- కొంకణ్ తీరాన్ని 'మినీ బాలి'గా సందర్శించండి.
- నివాటి బీచ్ వద్ద 2-3 గంటల బోట్ రైడ్ ఆనందించండి.
- హైదరాబాద్ నుంచి గోవా, కుడాల్ లేదా రోడ్ మార్గాల్లో చేరుకోండి.
- మాల్వని వంటకాలను రుచి చూస్తూ, బడ్జెట్లో బస చేయండి.
Hyderabad to Nivati Beach : తెలుగు రాష్ట్రాల్లో ఎండలు బాగా పెరిగిపోయాయి. 9 దాటితే ఇంటి నుంచి బయటకు వెళ్లడమంటే ఓ మినీ సాహసయాత్ర అయిపోతుంది. ఇలాంటి హాట్ సమ్మర్లో చాలామంది సేదతీరేందుకు బీచ్ వెకేషన్స్కి వెళ్తారు. అలా వెళ్లే బీచ్ డెస్టినేషన్స్లో బాలి చాలా ఫేమస్. అయితే అక్కడి వెళ్లేందుకు కాస్త బడ్జెట్ ఎక్కువే అవుతుంది. కానీ తక్కువ ఖర్చుతో ఇండియాలోనే బాలి లాంటి ఎక్స్పీరియన్స్ చేయాలంటే 'మినీ బాలి'కి వెళ్లిపోండి.
మినీ బాలి?
మీరు తక్కువ బడ్జెట్లో బాలిలాంటి ప్లేస్ చూడాలనుకుంటే.. మహారాష్ట్రలోని కొంకణ్కి వెళ్లిపోండి. అక్కడ మీరు నివటి బీచ్కో పాటు.. ఎన్నో ఎక్స్పీరియన్స్ చేయవచ్చు. ఈ ప్రదేశాన్ని 'మినీ బాలి' అని కూడా అంటారు. ఎక్కువమందికి తెలియని ఈ ప్రదేశం.. మీకు సమ్మర్లో బెస్ట్ ఎక్స్పీరియన్స్ ఇస్తుంది.
మహారాష్ట్రలోని కొంకణ్ తీరంలో వివిధ బీచ్లు ఉన్నాయి. ఇక్కడ రద్దీ తక్కువగా ఉంటుంది. కాబట్టి మీకు ఇది బెస్ట్, ప్రశాంతమైన అనుభవాన్ని అందిస్తుంది. మరి అక్కడికి వెళ్తే చూడాల్సిన ప్రదేశాలు ఏంటి? ఎంత బడ్జెట్ అవుతుంది? స్టే విషయంలో ఎలాంటి జాగ్రత్తలు తీసుకోవాలి? హైదరాబాద్ నుంచి వెళ్తే బడ్జెట్లో ఎలా ప్లాన్ చేసుకోవాలో చూసేద్దాం.
బోట్ రైడ్ ఎలా ఉంటుందంటే..
కొంకణ్ మీకు పూర్తిగా భిన్నమైన మరో ప్రపంచాన్ని మీకు చూపిస్తుంది. ఇక్కడికి వెళ్లాక కచ్చితంగా నివటి ట్రిప్ ట్రై చేయాల్సి ఉంటుంది. ఈ డీప్ సీ సఫారీ 2–3 గంటలు ఉంటుంది. ఈ సమయంలో మీరు ఎన్నో అద్భుతాలు, మానవ సంచారం లేని ప్రదేశాలు, డాల్ఫిన్లు చూడగలుగుతారు. ఈ బోట్ రైడ్ పూర్తి డిటైల్స్ చూసేద్దాం.
డీప్ సీ సఫారీ
ఇలా బోట్ రైడ్ చేయాలంటే దేవ్బాగ్ లేదా నివాటి బీచ్ నుంచి జర్నీ స్టార్ట్ అవుతుంది. దీనికి 2 నుంచి 3 గంటల సమయం పడుతుంది. ఆ సమయంలో మీరు 10 నుంచి 12 అద్భుతమైన ప్రదేశాలను కవర్ చేస్తారు. ఓల్డ్ లైట్హౌస్, న్యూ లైట్హౌస్, డాల్ఫిన్ పాయింట్, మహాత్రిచి చుల్, సీక్రెట్ టన్నెల్, నివాటి రాక్స్, నివాటి కిల్ల, మినీ కేరళ, సీగల్ ఐలాండ్, నివాటి గోల్డెన్ రాక్స్, సునామీ ఐలాండ్ చూడగలుగుతారు.
ఈ రైడ్ కేవలం విహారయాత్ర మాత్రమే కాదు.. ఇది మీరు ఎప్పటికీ గుర్తుంచుకునే ఎక్స్పీరియన్స్ ఇస్తుంది. ఇక్కడి వాతావరణం మీకు నిజంగానే మినీ బాలి ఫీల్ ఇస్తుంది. ఇవేకాకుండా దేవ్బాగ్ సంగమం (నది, సముద్రం కలిసే చోటు), నివటి ఫోర్ట్, రెడ్డి గణపతి ఆలయం చూడవచ్చు.
హైదరాబాద్ నుంచి ఎలా వెళ్లాలంటే..
హైదరాబాద్ నుంచి నివటి చేరుకోవాలంటే ఓ చిన్న ట్రావెల్ అడ్వెంచర్ చేయాల్సిందే. ముందుగా హైదరాబాద్ నుంచి గోవా ఫ్లైట్లో వెళ్లాల్సి ఉంటుంది. మోపా నుంచి 50 కి.మీ డ్రైవ్ ఉంటుంది. ట్రైన్లో వెళ్లాలనుకుంటే సికింద్రాబాద్ నుంచి కుడాల్ వెళ్లవచ్చు. అక్కడి నుంచి 25 కి.మీ డ్రైవ్ ఉంటుంది. రోడ్ ట్రిప్ వెళ్లాలనుకుంటే ముందుగా సొలాపూర్ వెళ్లి కొల్హాపూర్ మీదుగా అంబోలి ఘాట్ రూట్లో 640 కి.మీ డ్రైవ్ చేయాలి. ఈ రూట్ చాలా సీనిక్గా ఉంటుంది.
ఫుడ్ & స్టే
ఇక్కడి మాల్వని ఫుడ్ తప్పక ట్రై చేయండి. ఫిష్ థాలి, సోల్కడీ, కాజు ఆమ్టీ మంచి రుచిని అందిస్తాయి. 1500 నుంచి 3000లల్లో మీకు స్టేలు దొరుకుతాయి. మిడ్ రేంజ్లో కావాలంటే 3000 నుంచి 6000.. లగ్జరీ కావాలంటే 6000 నుంచి 12,000 వేలల్లో అందుబాటులో ఉంటాయి.
గుర్తించుకోవాల్సిన విషయాలు
మీరు ఇక్కడికి వెళ్లాలనుకుంటే అక్టోబర్ నుంచి ఏప్రిల్ మధ్యలో వెళ్లాలి. డీప్ సీ సఫారీకి మార్నింగ్ టైమ్ వెళ్లండి. కొబ్బరి నీళ్లు తప్పక తాగండి. ఇది మంచి టేస్ట్ ఇవ్వడంతో పాటు హైడ్రేషన్ అందిస్తుంది. మొత్తానికి కొంకణ్ ప్రకృతి మధ్యలో ప్రశాంతంగా గడపాలని అనుకునేవారికి పర్ఫెక్ట్ ప్లేస్ అవుతుంది.
టాప్ హెడ్ లైన్స్
ట్రెండింగ్ వార్తలు
