Kidney-Friendly Diet : కిడ్నీ వ్యాధులు ఉన్నవారు తినకూడని ఫుడ్స్ ఇవే.. లేదంటే మరింత ప్రమాదమంటోన్న వైద్యులు
Dangerous Foods for Kidney Patients : కిడ్నీల వ్యాధులతో ఇబ్బంది పడేవారు కొన్ని ఆహారాలకు దూరంగా ఉండాలని సూచిస్తున్నారు వైద్యులు. లేదంటే కిడ్నీల పరిస్థితి మరింత తీవ్రంగా మారుతుందంటున్నారు. ఎందుకంటే..
- కిడ్నీ వ్యాధులు ఉన్నవారు ఉప్పు, పొటాషియం, ఫాస్ఫరస్ తగ్గించాలి.
- ప్యాకేజ్డ్, ప్రాసెస్ చేసిన ఆహారాలకు దూరంగా ఉండటం మంచిది.
- అరటి, టమాటా, చిలగడదుంపలు వంటివి తక్కువగా తీసుకోవాలి.
- ఆహార నియమాలు వ్యాధి దశను బట్టి మారుతాయి.
Foods to Avoid Kidney Diesases : కిడ్నీలు శరీరంలో వ్యర్థాలను ఫిల్టర్ చేసి బయటకు పంపే అత్యంత ముఖ్యమైన అవయవాలు. అయితే కిడ్నీ వ్యాధులు ఉన్నవారిలో ఈ ఫిల్టరింగ్ సామర్థ్యం క్రమంగా తగ్గిపోతుంది. దీంతో శరీరంలో సోడియం, పొటాషియం, ఫాస్ఫరస్, ప్రోటీన్ వంటి పదార్థాలు అధికంగా పేరుకుపోయి అనేక ఆరోగ్య సమస్యలకు దారితీస్తాయి. అందుకే కిడ్నీ సమస్యలు ఉన్నవారు ఆహార విషయంలో చాలా జాగ్రత్తగా ఉండాలని నిపుణులు సూచిస్తున్నారు.
యశోద హాస్పిటల్స్కు చెందిన కన్సల్టెంట్ నెఫ్రాలజిస్ట్ డాక్టర్ శశి కిరణ్ ప్రకారం కిడ్నీ వ్యాధిగ్రస్తులు.. అధిక ఉప్పు, పొటాషియం, ఫాస్ఫరస్, ప్రోటీన్ ఉన్న ఆహారాలను తక్కువగా తీసుకోవాలి. లేదంటే కిడ్నీల పనితీరు తగ్గినప్పుడు ఇవి రక్తంలో పేరుకుపోయి వాపులు, హై బీపీ, ఎముకల బలహీనత, గుండె స్పందనలో అసమానతలు, మరింత కిడ్నీ నష్టం వంటి జరగవచ్చని హెచ్చరిస్తున్నారు.
అధిక ఉప్పుతో కూడిన ఆహారం..
కిడ్నీ వ్యాధులు ఉన్నవారు దూరంగా ఉండాల్సిన ఆహారాల్లో సోడియం ఒకటి. ఉప్పు ఎక్కువగా ఉండే చిప్స్, ఇన్స్టంట్ నూడుల్స్, పచ్చళ్ల, ప్రాసెస్ చేసిన మాంసం, ఫ్రోజెన్ ఫుడ్స్, సాస్లు, ఉప్పు ఎక్కువగా ఉండే స్నాక్స్ వంటి ప్యాకేజ్డ్ ఫుడ్స్కి దూరంగా ఉండాలి. ఎందుకంటే వీటిలో సోడియం అధికంగా ఉంటుంది. ఇవి శరీరంలో నీరు నిల్వ ఉండేలా చేసి బీపీ పెరగడానికి కారణమవుతాయి. అందుకే బయట ఫుడ్స్ తగ్గించి ఇంట్లో తాజాగా వండిన ఆహారం తీసుకోవడం మంచిదని నిపుణులు సూచిస్తున్నారు.
పొటాషియం కూడిన ఫుడ్స్
తీవ్రమైన కిడ్నీ వ్యాధులు ఉన్నవారు పొటాషియం తక్కువగా తీసుకోవాలి. అరటిపండ్లు, అవకాడో, నారింజలు, టమాటాలు, బంగాళాదుంపలు, చిలగడదుంపలు, పాలకూర, బీట్రూట్ ఆకులు, డ్రై ఫ్రూట్స్, కొబ్బరి నీళ్లలో పొటాషియం అధికంగా ఉంటుంది. రక్తంలో పొటాషియం ఎక్కువైతే గుండె పనితీరుపై ప్రమాదకర ప్రభావం చూపిస్తుంది.
ఇలాంటి పరిస్థితుల్లో యాపిల్స్, బెర్రీలు, ద్రాక్ష, పైనాపిల్, క్యాబేజీ, కాలీఫ్లవర్, వైట్ రైస్ వంటి తక్కువ పొటాషియం ఉన్న ఆహారాలను తినడం మంచిదని డాక్టర్ శశి కిరణ్ చెప్తున్నారు.
ఫాస్ఫరస్ ఫుడ్స్ కూడా ప్రమాదమే
క్రానిక్ కిడ్నీ వ్యాధుల్లో ఫాస్ఫరస్ నియంత్రణ కూడా చాలా ముఖ్యం. అధికంగా ఫాస్ఫరస్ ఉన్న ఆహారం తీసుకోవడం వల్ల ఎముకలు బలహీనపడటం, రక్తనాళాలు దెబ్బతినే ప్రమాదం ఉంటుంది. డార్క్ సోడాలు, ప్రాసెస్ చేసిన చీజ్, సెరెల్స్, అధిక మొత్తంలో హోల్ గ్రెయిన్స్, ప్యాకేజ్డ్ ఫుడ్స్, ప్రాసెస్ చేసిన మాంసంలో ఫాస్ఫరస్ ఎక్కువగా ఉంటుంది. ముఖ్యంగా ప్యాకేజ్డ్ ఫుడ్స్లో దాగి ఉండే ఫాస్ఫేట్ అడిటివ్స్న శరీరం త్వరగా గ్రహిస్తుంది.
ప్రోటీన్ కూడా పరిమితమే
కిడ్నీ వ్యాధిగ్రస్తులు అధిక ప్రోటీన్ తీసుకోవడంలో కూడా జాగ్రత్తగా ఉండాలి. ముఖ్యంగా రెడ్ మీట్, ప్రాసెస్ చేసిన మాంసం ఎక్కువగా తినడం వల్ల దెబ్బతిన్న కిడ్నీలపై అదనపు ఒత్తిడి పడుతుంది. అందుకే మితంగా తక్కువ పరిమాణంలో లీన్ ప్రోటీన్ సోర్సులను మాత్రమే తీసుకోవడం మంచిదని డాక్టర్ శశి కిరణ్ అంటున్నారు.
డైట్ ఎలా ఉండాలంటే..
కిడ్నీ ఫ్రెండ్లీ డైట్ ప్రతి ఒక్కరికీ ఒకేలా ఉండదు. వ్యాధి దశ, రక్త పరీక్షల ఫలితాలు, డయాలసిస్ అవసరమా లేదా, బీపీ, డయాబెటిస్ వంటి ఇతర సమస్యలను బట్టి ఆహార నియమాలు మారుతాయి. సరైన డైట్, తగినంత నీరు, రెగ్యులర్ చెకప్స్, బీపీ, షుగర్ నియంత్రణతో కిడ్నీ వ్యాధుల ప్రభావం తగ్గించుకోగలుగుతారు.
మరిన్ని హెల్త్ ఆర్టికల్స్ కోసం దీనిని క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
