Holi 2026 Recieps : హోలీ 2026 స్పెషల్ బాదం షర్బత్.. సులభమైన టేస్టీ రెసిపీ ఇదే
Badam Sharbat Recipe : ఎండలో హోలీ ఆడి చల్లగా, టేస్టీగా ఏదైనా తీసుకోవాలనిపిస్తే.. బాదం షర్బత్ బెస్ట్ ఆప్షన్. దీనిని సింపుల్గా, టేస్టీగా ఎలా తయారు చేసుకోవాలో ఇప్పుడు చూసేద్దాం.
Holi 2026 Special Badam Sharbat : హోలీ పండుగను రంగులు, స్వీట్స్, ఆనందాలకు సంగమంగా చెప్తారు. ఈ పర్వదినాన కలర్స్తో ఆడుకోవడంతో పాటు.. చాలామంది స్వీట్లు పంచుకుంటారు. అలాగే వివిధ రకాల డ్రింక్స్ తీసుకుంటారు. అలాంటి వాటిలో బాదం షర్బత్ ఒకటి. దీనిని చాలా ఈజీగా, సింపుల్గా చేసుకోవచ్చు. మీకే కాకుండా ఇంటికి వచ్చే అతిథుల కోసం ప్రత్యేకంగా తయారు చేసుకోవచ్చు. మరి దీనిని ఎలా తయారు చేసుకోవాలో.. రెసిపీ విధానం ఏంటో.. తయారీ పదార్థాలు ఏంటో చూసేద్దాం.
కుంకుమపువ్వు బాదం షర్బత్కి కావాల్సిన పదార్థాలు
బాదం పప్పులు - 10 నుంచి 12
పుచ్చకాయ గింజలు - 1/4 కప్పు
కుంకుమ పువ్వు - 10 నుంచి 12 రేకులు
ఏలకులు - 3
సోంపు - కొద్దిగా
గసగసాలు - 1 టీస్పూన్
చక్కెర - 4 కప్పులు
నీరు - 2 కప్పులు
నిమ్మకాయ - సగం
పాలు లేదా చల్లటి నీరు
జీడిపప్పు, పిస్తాపప్పులు - గార్నిష్ కోసం
షర్బత్ తయారీ విధానం
హోలీకి కుంకుమపువ్వు-బాదం షర్బత్ తయారు చేయడానికి.. ముందుగా బాదం పప్పును 2 నుంచి 4 గంటలు నీటిలో నానబెట్టండి. దీనివల్ల తొక్క సులభంగా ఊడిపోతుంది. అలాగే పుచ్చకాయ గింజలను కడిగి నానబెట్టండి. ఒక సాస్ పాన్లో నీరు, చక్కెరను వేసి మరిగించండి. సిరప్ తీగలా ఏర్పడటం ప్రారంభించినప్పుడు.. కొన్ని చుక్కల నిమ్మరసం వేయాలి. ఇది పైన ఏర్పడిన ఏదైనా నురుగును తొలగిస్తుంది. తరువాత కుంకుమపువ్వు వేసి సిరప్ చల్లారనివ్వండి.
ఇప్పుడు నానబెట్టిన బాదం పప్పును తొక్క తీసి.. ఎక్కువ నీరు కలపకుండా పుచ్చకాయ గింజలు కూడా వేసి మెత్తగా రుబ్బుకోవాలి. తరువాత యాలకులను పొడి చేసి.. చల్లారిన సిరప్లో పేస్ట్, యాలకుల పొడిని వేయాలి. ఈ మిశ్రమాన్ని పూర్తిగా కలిపిన తర్వాత కుంకుమపువ్వు-బాదం సిరప్ రెడీ అవుతుంది. ఈ సిరప్ను బాటిల్ చేసి రిఫ్రిజిరేటర్లో పెట్టుకోవాలి.
షర్బత్ ఎలా వడ్డించుకోవాలంటే..
కుంకుమపువ్వు-బాదం షర్బత్ వడ్డించడానికి.. ఒక గ్లాసులో ఒక వంతు షర్బత్ వేసి.. నాలుగు వంతులు చల్లని పాలు లేదా నీరు వేసుకోవాలి. ఇప్పుడు దానిని బాగా కలపండి. దానిపైన తరిగిన జీడిపప్పు, పిస్తాపప్పులు వేసి గార్నిష్ చేసుకోవచ్చు. కావాలనుకుంటే దానిని అలంకరించడానికి కొద్దిగా కుంకుమపువ్వు వేయండి. దీనిని చల్లగా తీసుకుంటే రుచి మరింత గొప్పగా ఉంటుంది.
ఈ షర్బత్ను రిఫ్రిజిరేటర్లో గాలి చొరబడని సీసాలో నిల్వ చేస్తే.. ఎక్కువ రోజులు ఉంటుంది. ఉపయోగించే ముందు బాటిల్ను తేలికగా కలిపి అప్పుడు సర్వ్ చేసుకోండి. సమ్మర్లో పిల్లలకు ఇచ్చేందుకు ఇది బెస్ట్ ఛాయిస్ అవుతుంది.
టాప్ హెడ్ లైన్స్
ట్రెండింగ్ వార్తలు
