TS Teacher Transfers: నేటి నుంచి హెడ్ మాస్టర్లకు వెబ్ఆప్షన్లు, ఎస్‌ఏలకు ‘నాట్‌ విల్లింగ్‌’ ఆప్షన్‌!

ప్రధానోపాధ్యాయులుగా ప్రమోషన్‌కు అర్హులైన స్కూల్ అసిస్టెంట్‌ల సీనియార్టిటీ జాబితాను పోర్టల్‌లో అందుబాటులో ఉంచనుంది. దీనిపై అభ్యంతరాలుంటే సెప్టెంబరు 17 వరకు ఫిర్యాదులు స్వీకరించనున్నారు.

తెలంగాణ టీచర్ల బదిలీలు

తెలంగాణలో టీచర్ల బదిలీల ప్రక్రియ నెలలు గడుస్తున్నా కొనసాగుతూనే ఉంది. కోర్టు కేసుల కారణంగా బదిలీలు ఆలస్యమవుతున్నాయి. ఈ నేపథ్యంలో ట్రాన్స్‌ఫర్‌లపై కొందరు హెడ్ మాస్టర్లు హైకోర్టును ఆశ్రయించడంతో పాఠశాల విద్యాశాఖ కీలక నిర్ణయం తీసుకుంది. కటాఫ్ తేదీని సెప్టెంబరు 1కి మారుస్తూ కొత్త షెడ్యూలును విడుదల చేసింది. సెప్టెంబరు 15, 16 తేదీల్లో బదిలీలకు వెబ్ ఆప్షన్లు స్వీకరించనున్నారు. సెప్టెంబరు 17న ఉత్తర్వులు జారీచేయనుంది. ప్రధానోపాధ్యాయులుగా ప్రమోషన్‌కు అర్హులైన స్కూల్ అసిస్టెంట్‌ల సీనియార్టిటీ జాబితాను పోర్టల్‌లో అందుబాటులో ఉంచనుంది. దీనిపై అభ్యంతరాలుంటే సెప్టెంబరు 17 వరకు ఫిర్యాదులు స్వీకరించనున్నారు.

పదోన్నతి వద్దనుకునే స్కూల్‌ అసిస్టెంట్లకు ‘నాట్‌ విల్లింగ్‌’ ఆప్షన్‌..
మల్టీజోన్‌ కారణంగా.. ఈసారి గెజిటెడ్‌ ప్రధానోపాధ్యాయులు(జీహెచ్‌ఎం)గా పదోన్నతులు కల్పించినా వందలాది పోస్టులు ఖాళీగా ఉండే అవకాశం ఉందని భావించిన విద్యాశాఖ కీలక నిర్ణయం తీసుకుంది. పదోన్నతి వద్దనుకునే వారికి ‘నాట్‌ విల్లింగ్‌’ ఆప్షన్‌ ఇవ్వాలని నిర్ణయించింది. దీంతో సీనియర్లు తమకు పదోన్నతి వద్దనుకుంటే ఆ హెచ్‌ఎం పోస్టుల్లో ఆ తర్వాత సీనియర్లకు అవకాశం లభిస్తుంది. దీంతో రాష్ట్రంలోని మొత్తం ఉన్నత పాఠశాలల్లోని జీహెచ్‌ఎం పోస్టులన్నీ భర్తీ కానున్నాయి. త్వరలో స్కూల్‌ అసిస్టెంట్లకు సీనియారిటీ ఆధారంగా జీహెచ్‌ఎంలుగా పదోన్నతులు లభించనున్నాయి. రాష్ట్రవ్యాప్తంగా 2,017 జీహెచ్‌ఎం ఖాళీలు ఉండగా వాటిని భర్తీ చేయనున్నారు. అయితే పదోన్నతి లభించినా కనీసం 30% మంది తమకు కేటాయించిన పాఠశాలల్లో చేరకపోవచ్చని ఉపాధ్యాయ సంఘాలు అంచనా వేస్తున్నాయి. సొంత జిల్లాకు, కుటుంబసభ్యులకు దూరంగా వెళ్లాల్సి వస్తుందని భావించి చాలా వరకు స్కూల్‌ అసిస్టెంట్లు జీహెచ్‌ఎం పదోన్నతి దక్కినా చేరకపోవచ్చన్నని తెలుస్తోంది.

పదోన్నతి తీసుకునేందుకు ఆసక్తిలేని వారికోసం ఈ ఆప్షన్‌ ఇచ్చి బదిలీలు, పదోన్నతుల పోర్టల్‌లో పొందుపరుస్తారు. పదోన్నతిని తిరస్కరించిన వారి స్థానంలో ఆ తరువాత సీనియారిటీ ఉన్నవారికి పదోన్నతి కల్పించాలని నిర్ణయించారు. దీనివల్ల ఈసారి హైస్కూళ్లలో జీహెచ్‌ఎం పోస్టులు ఖాళీగా ఉండవని అధికారులు చెబుతున్నారు. ప్రస్తుతం ఆయా పాఠశాలల్లో పనిచేసే సీనియర్‌ స్కూల్‌ అసిస్టెంట్లకు ఇన్‌ఛార్జి బాధ్యతలు అప్పగించారు. 2015లో చివరిసారిగా ఉపాధ్యాయులకు పదోన్నతులిచ్చారు. గత ఎనిమిది సంవత్సరాలుగా పదోన్నతులు లేకపోవడంతో భారీగా ఖాళీలు ఏర్పడ్డాయి.

స్కూల్‌ అసిస్టెంట్లు జీహెచ్‌ఎంలుగా పదోన్నతులు పొందితే ఏర్పడే ఖాళీలనూ బదిలీల్లో చూపనున్నారు. ఇప్పటివరకు దానిపై స్పష్టత ఇవ్వకపోవడంతో ఉపాధ్యాయుల్లో అయోమయం నెలకొంది. తాజా సమావేశంలో దానిపైనా నిర్ణయం తీసుకున్నారు. దానివల్ల ఇప్పటికే స్కూల్‌ అసిస్టెంట్లుగా పనిచేస్తున్న వారు తాజాగా ఏర్పడిన ఖాళీలకు కూడా బదిలీ కోసం దరఖాస్తు చేసుకోవచ్చు. స్కూల్‌ అసిస్టెంట్ల బదిలీలు పూర్తయిన తర్వాత ఏర్పడే మొత్తం ఖాళీల్లో 70 శాతాన్ని ఎస్‌జీటీలకు పదోన్నతులు ఇచ్చి భర్తీచేస్తారు. మిగిలిన 30% ఖాళీలను ప్రత్యక్ష నియామకాల (టీఆర్‌టీ) ద్వారా నింపుతారు.  

5,089 పోస్టులతో 'డీఎస్సీ' నోటిఫికేషన్ విడుదల, పరీక్ష ఎప్పుడంటే?
తెలంగాణలోని ప్రభుత్వ పాఠశాలల్లో 5089 ఉపాధ్యాయ పోస్టుల భర్తీకి సంబంధించి డీఎస్సీ/టీచర్స్ రిక్రూట్‌మెంట్ టెస్ట్ (టీఆర్‌టీ) నోటిఫికేషన్ సెప్టెంబరు 7న విడుదలైంది. ఉద్యోగాల భర్తీకి సంబంధించి జిల్లాల వారీగా ఖాళీలు, ఇతర వివరాలన్నీ సెప్టెంబరు 15 నుంచి వెబ్‌సైట్‌లో అందుబాటులో ఉంచనున్నట్లు విద్యాశాఖ పేర్కొంది. సెప్టెంబరు 20 నుంచి ఆన్‌లైన్ దరఖాస్తు ప్రక్రియ ప్రారంభం కానుంది. అక్టోబర్ 21 వరకు అభ్యర్థుల నుంచి దరఖాస్తులు స్వీకరించనున్నారు. నవంబర్ 20 నుంచి 30వరకు సీబీటీ విధానంలో పరీక్షలు నిర్వహించనున్నారు. అయితే ఈ నోటిఫికేషన్‌లో 1,523 స్పెషల్ ఎడ్యుకేషన్ టీచర్ల ఖాళీల భర్తీ గురించి ప్రస్తావించలేదు.అభ్యర్థులు దరఖాస్తు ఫీజుగా రూ.1000 చెల్లించాల్సి ఉంటుంది. అభ్యర్థుల గరిష్ఠ వయోపరిమితిని 44 సంవత్సరాలుగా నిర్ణయించారు. ఎస్‌సీ, ఎస్‌టీ, బీసీ, ఈడబ్ల్యూఎస్ అభ్యర్థులు, రాష్ట్ర ప్రభుత్వ ఉద్యోగులకు 5 సంవత్సరాలు వయోసడలింపు వర్తిస్తుంది. ఇక దివ్యాంగులకు మాత్రం 10 సంవత్సరాలపాటు వయోసడలింపు ఉంటుంది. 
డీఎస్సీ నోటిఫికేషన్, పోస్టుల వివరాల కోసం క్లిక్ చేయండి..

హైదరాబాద్ సెంట్రల్‌ యూనివర్సిటీలో 95 నాన్ టీచింగ్ పోస్టులు, అర్హతలివే!
యూనివర్సిటీ ఆఫ్ హైదరాబాద్- డైరెక్ట్ రిక్రూట్‌మెంట్/ డిప్యూటేషన్ ప్రాతిపదికన నాన్-టీచింగ్, అకడమిక్ పోస్టుల భర్తీకి నోటిఫికేషన్ విడుదల చేసింది. పోస్టులవారీగా విద్యార్హతలు నిర్ణయించారు. సరైన అర్హతలున్నవారు ఆన్‌లైన్ ద్వారా దరఖాస్తులు సమర్పించాల్సి ఉంటుంది. అభ్యర్థులు సెప్టెంబరు 30లోగా ఆన్‌లైన్ దరఖాస్తులు సమర్పించి, అక్టోబరు 6లోగా దరఖాస్తు హార్డ్ కాపీలను నిర్ణీత చిరునామాకు చేరేలా పంపాలి.
నోటిఫికేషన్, పోస్టుల వివరాల కోసం క్లిక్ చేయండి..