VD12 Movie: సెట్స్‌లో ఏనుగుల బీభత్సం... కేరళలో విజయ్ దేవరకొండ మూవీ షూటింగ్ క్యాన్సిల్

విజయ్ దేవరకొండ మూవీ షూటింగ్ సెట్స్ లో ఏనుగులు విధ్వంసం సృష్టించాయి. షూటింగ్ కోసం తీసుకొచ్చిన ఏనుగులు కొట్లాడుకోవడంతో షూటింగ్ ను క్యాన్సిల్ అయ్యింది.

VD12 షూటింగ్ లో ఏనుగుల బీభత్సం

Source : Social Media

VD12 Movie Shooting: రౌడీ బాయ్ విజయ్ దేవరకొండ హీరోగా గౌతమ్ తిన్ననూరి ఓ సినిమా తెరకెక్కిస్తున్నారు. విజయ్ కెరీర్ లో 12వ చిత్రంగా రూపొందుతోంది. ప్రస్తుతం ఈ సినిమా షూటింగ్ కేరళలోని భూతత్తాన్ కెట్టులో నిర్వహిస్తున్నారు. అటవీ ప్రాంతంలో వేసిన ప్రత్యేక సెట్స్ లో ఏనుగులతో కీలక సన్నివేశాలు చిత్రీకరిస్తున్నారు. ఈ సందర్భంగా రెండు ఏనుగుల మధ్య ఘర్షణ తలెత్తడంతో అందరూ భయాందోళనకు గురయ్యారు. కాసేపు రెండు ఏనుగులు పోట్లాడాయి. పుదుపల్లి సాధు అనే ఏనుగుకు గాయాలు కావడంతో  తప్పించుకుని అడవిలోకి పారిపోయింది. నిన్న సాయంత్రం సుమారు 5 గంటల ప్రాంతంలో ఈ ఘటన జరగ్గా, ఇప్పటి వరకు ఏనుగు ఆచూకీ లభ్యం కాలేదు. రాత్రి అంతా ఏనుగు కోసం అటవీశాఖ అధికారులు వెతికినా ప్రయోజనం లేకపోయింది. ఏనుగు గాయపడిన నేపథ్యంలో ఎక్కువ దూరం వెళ్లి ఉండదని అధికారులు భావిస్తున్నారు. ఎక్కువ మంది అటవీ సిబ్బందితో ఏనుగును వెతుకుతున్నారు.  

ఏనుగుల కొట్లాటతో సినిమా షూటింగ్ వాయిదా

నిజానికి ఈ సినిమా షూటింగ్ కోసం ఐదు ఏనుగులను తీసుకొచ్చారు. వాటిలో మూడు ఆడ ఏనుగులు కాగా, రెండు మగ ఏనుగులు ఉన్నాయి. గత వారం రోజులుగా ఏనుగులతో సన్నివేశాలను షూట్ చేస్తున్నారు. తాజాగా ఏనుగుల మధ్య గొడవ జరగడం, ఓ ఏనుగు అడవిలోకి పారిపోవడంతో షూటింగ్ క్యాన్సిల్ చేశారు. అటు మిగతా ఏనుగులను అక్కడి నుంచి వాహనాల్లో తీసుకెళ్లారు. తప్పిపోయిన ఏనుగు దొరికే వరకు సినిమా షూటింగ్ నిలిపివేయనున్నట్లు మేకర్స్ వెల్లడించారు. 

VD 12 మూవీపై భారీగా అంచనాలు పెట్టుకున్న రౌడీ బాయ్   

VD 12 సినిమాను గౌతమ్ తిన్ననూరి ప్రతిష్టాత్మకంగా తెరకెక్కిస్తున్నారు. విజయ్ ఈ సినిమాలో పోలీస్ పాత్ర పోషిస్తున్నట్లు తెలుస్తోంది. విజయ్ కెరీర్ లో ఖాకీ పాత్ర చేయడం ఇదే తొలిసారి. శ్రీలీల, రష్మిక మందన్న హీరోయిన్లుగా నటిస్తున్నారు. ఇప్పటికే విడుదలైన ఫస్ట్ లుక్ పోస్టర్ సినిమాపై భారీగా అంచనాలు పెంచింది. ఈ సినిమాను సితార ఎంటర్ టైన్ మెంట్స్ బ్యానర్ లో సూర్యదేవర నాగ వంశీ నిర్మిస్తున్నారు. ఈ సినిమాను వచ్చే ఏడాది సమ్మర్ కానుకగా మార్చి 23న విడుదల చేయనున్నట్లు మేకర్స్ వెల్లడించారు. రీసెంట్ గా విజయ్ దేవరకొండ ‘కల్కి 2898 ఏడీ’ సినిమాలో కనిపించారు. ఈ చిత్రంలో ఆయన అర్జునుడి పాత్ర పోషించారు. కనిపించింది కాసేపే అయినా ప్రేక్షకులను ఆకట్టుకున్నాడు. ఇక ఆయన హీరోగా చివరగా ‘ఫ్యామిలీ స్టార్’ మూవీలో కనిపించారు. ఈ సినిమా అనుకున్న స్థాయిలో సక్సెస్ కాలేదు. అంతకు ముందు నటించి ‘ఖుషీ’ సినిమా కూడా ప్రేక్షకులను పెద్దగా అలరించలేదు. ఈ నేపథ్యంలో VD12 మూవీపై రౌడీ బాయ్ బోలెడు ఆశలు పెట్టుకున్నాడు. ఎలాగైనా ఈ సినిమాతో హిట్ ట్రాక్ లోకి రావాలని భావిస్తున్నాడు.