Gruhalakshmi July 7th: దివ్య చేతికి డబ్బులిచ్చి దెబ్బకొడుతున్న లాస్య- విక్రమ్ దృష్టిలో దోషులుగా తులసి, నందు

రాజ్యలక్ష్మి ఇంట్లో లాస్య పాగా వేయడంతో సీరియల్ ఇంట్రెస్టింగ్ గా సాగుతోంది. ఈరోజు ఎపిసోడ్లో ఏం జరిగిందంటే..

Image Credit: Disney Plus Hotstar/ Star Maa

కూతురు, అల్లుడితో తులసి కేఫ్ రీఓపెన్ చేయిస్తుంది. అది చూసి లాస్య తెగ కుళ్ళుకుంటుంది. తన కూతురితోనే రాజ్యలక్ష్మి ఇంటి నుంచి గెంటిస్తానని తులసి ఛాలెంజ్ చేస్తుంది. మీ సంతోషాలు తర్వాత నాకు ఇవ్వాల్సిన 50 వేల భరణం గురించి ఆలోచించమని అంటుంది. నందు కేఫ్ అలా ఓపెన్ చేశారో లేదో అడుక్కునే వాళ్ళు వచ్చారు త్వరగా ముష్టి వేయమని అనసూయ కౌంటర్ వేస్తుంది. అందరూ కేఫ్ నుంచి బయల్దేరతారు. దివ్య మీద పై చేయి సాధించలేకపోతున్నామని రాజ్యలక్ష్మి లాస్యతో చెప్తుంది. తులసి కూతుర్ని కాపాడుకుంటూ వస్తుందని అంటుంది. ఇక నుంచి డోస్ పెంచి దెబ్బ మీద దెబ్బ కొడదామని మూడు లక్షలు రెడీ చేసుకోమని లాస్య చెప్తుంది. కానీ డబ్బులతో వేసే ప్లాన్ ఏది కలిసి రావడం లేదని రాజ్యలక్ష్మి అంటే వాటితోనే విక్రమ్, దివ్య మధ్య మనస్పర్థలు వచ్చేస్తాయని నమ్మకంగా చెప్తుంది. మూడు లక్షలు చాలు దివ్య మూడు ముళ్ళ బంధం తెగిపోవడానికని అంటుంది. దివ్యని ఇరకాటంలో పెట్టేందుకు మరొక ప్లాన్ రెడీ చేస్తారు.

తులసి కేఫ్ రూపు మార్చాలని డిసైడ్ అవుతుంది. పాత ఐటెమ్స్ బై చెప్పేసి కొత్త ఫుడ్ తీసుకురావాలని ప్లాన్ చేశానని తులసి చెప్తుంది. కస్టమర్స్ మైండ్ ఆరోగ్యం మీద ఫోకస్ పడేలా చేయాలని జంక్ ఫుడ్ ఆపేసి హెల్తీ ఫుడ్ పరిచయం చేయాలని ఐడియా ఇస్తుంది. రోగనిరోధక శక్తి అంటూ ఏవేవో చెప్తే నందు మాత్రం అది వేస్ట్ అవుతుందని అంటాడు. జనాల ఆరోగ్యాన్ని కాపాడాలని తులసి కంకణం కట్టుకుంటుంది. లాస్య డబ్బులు తీసుకొచ్చి రాజ్యలక్ష్మి చేతికి ఇస్తుంటే తనకి కాదని దివ్యకి ఇవ్వమని చెప్తుంది. ఇక నుంచి ఇంటికి సంబంధించిన డబ్బు వ్యవహారాలన్నీ దివ్య చేతుల మీదుగానే జరగాలని స్కెచ్ వేస్తుంది. డబ్బులు తీసుకుని లోపల పెట్టమని విక్రమ్ అంటాడు. తమ ప్లాన్ వర్కౌట్ అవుతున్నందుకు తెగ సంతోషపడతారు. చేప వలకి చిక్కిందని నవ్వుకుంటారు.

తులసి ఫుడ్ కొత్త ఆలోచన బాగుందని కేఫ్ కి వచ్చిన ఒక కస్టమర్ మెచ్చుకుంటుంది. ఇలాంటి ఫుడ్ ఎక్కడా దొరకదని డబ్బా కొడుతుంది. ఇక నందు నువ్వే కరెక్ట్ అని మెచ్చుకుంటాడు. లాస్య నందు ఫోటోలు చూస్తూ ఉంటే దివ్య అది చూసి కోపంగా తిడుతుంది. మా నాన్న ఫోటోస్ నీ దగ్గర ఉండటానికి వీల్లేదు డిలీట్ చేయమని చెప్తుంది. త్వరలోనే మీ నాన్న చేతులెత్తేసి కేఫ్ క్లోజ్ చేస్తాడని దివ్యని రెచ్చగొట్టేలా మాట్లాడుతుంది. డబ్బులు అయిపోయాక బిచ్చగాడిలా మారతాడని ఫోటో చూపిస్తుంది. కావాలని తన తండ్రి గురించి నెగిటివ్ గా ప్రచారం చేస్తున్నావని లాస్యని తిడుతుంది. కానీ లాస్య మాత్రం గట్టిగా బదులిస్తుంది.