AR Rahman Vs Kangana Ranaut: ఏఆర్ రెహమాన్‌పై విమర్శలు గుప్పించిన కంగనా రనౌత్... నన్ను కలవలేదు, అంత ద్వేషమా?

ఏఆర్ రెహమాన్ వ్యాఖ్యలపై బాలీవుడ్ సెలబ్రిటీలు కొందరు భగ్గుమన్నారు. హిందీ ఇండస్ట్రీలో మతపరమైన వివక్ష ఉందని చెప్పడాన్ని తప్పుబట్టారు. కంగనా రనౌత్ అయితే పెద్ద స్టోరీ పెట్టారు. 

ఏ ఆర్ రెహమాన్ పై కంగనా రనౌత్ విమర్శలు

Source : Instagram

సంగీత దర్శకుడు ఏఆర్ రెహమాన్ మరోసారి వార్తల్లో నిలిచారు. ఇటీవల ఓ ఇంటర్వ్యూలో ఆయన చేసిన వ్యాఖ్యలపై దుమారం రేగుతోంది. రెహమాన్ తీరు పట్ల పలువురు విమర్శలు వ్యక్తం చేస్తున్నారు. హిందీ సినిమా ఇండస్ట్రీలో మతపరమైన వివక్ష ఉండటం వల్ల తనకు ఛాన్సులు రాలేదని చెప్పడంతో పాటు విక్కీ కౌశల్ నటించిన 'ఛావా'పై స్పందించారు. ప్రజలను విభజించే సినిమా 'ఛావా' అని ఆయన అన్నారు. ఏఆర్ రెహమాన్ వ్యాఖ్యలపై కథానాయిక - రాజకీయ నాయకురాలు కంగనా రనౌత్ విమర్శలు గుప్పించారు. తన జీవితంలో ఇంత పక్షపాత ధోరణి, ద్వేషపూరిత వ్యక్తిని చూడలేదని ఆమె అన్నారు.

కంగనా రనౌత్ తన ఇన్‌స్టాగ్రామ్ స్టోరీలో ఓ పోస్ట్ షేర్ చేశారు. అందులో విమర్శలు గుప్పించారు. ఏఆర్ రెహమాన్ ఇంటర్వ్యూ వీడియోను షేర్ చేసిన కంగనా రనౌత్... ''డియర్ ఏఆర్ రెహమాన్ జీ, నేను చిత్ర పరిశ్రమలో చాలా వివక్ష, పక్షపాతాన్ని ఎదుర్కొన్నాను. ఎందుకంటే... నేను ఒక కాషాయ పార్టీకి మద్దతు ఇస్తున్నాను. అయినప్పటికీ... నేను మీ కంటే ఎక్కువ వివక్ష చూపే, ద్వేషించే వ్యక్తిని చూడలేదు'' అని అన్నారు.

రెహమాన్ మీద కంగనా రనౌత్ ఏం విమర్శలు చేశారంటే?

ఇంకా కంగనా రనౌత్ మాట్లాడుతూ... ''నేను దర్శకత్వం వహించిన 'ఎమర్జెన్సీ' కథను మీకు చెప్పాలనుకున్నాను. కథ చెప్పడం పక్కన పెడితే, మీరు నన్ను కలవడానికి కూడా నిరాకరించారు. మీరు అటువంటి ప్రచార చిత్రంలో భాగం కాలేనని నాకు చెప్పారు. ఆశ్చర్యకరమైన విషయం ఏమిటంటే... 'ఎమర్జెన్సీ'ని విమర్శకులు మాస్టర్‌ పీస్ అని పిలిచారు. ప్రతిపక్ష పార్టీ నాయకులు కూడా నా సినిమాను మెచ్చుకుంటూ అభిమాన లేఖలు పంపారు. ఇందులో సినిమా తీసిన విధానాన్ని ప్రశంసించారు. కానీ మీరు మీ ద్వేషంలో గుడ్డివారు అయ్యారు. మీ గురించి నాకు చాలా బాధగా ఉంది'' అని చెప్పారు.

కంగనా రనౌత్ చివరిసారిగా 'ఎమర్జెన్సీ' సినిమాలో కనిపించారు. ఆ సినిమా గత ఏడాది జనవరిలో విడుదలైంది. బాక్సాఫీస్ వద్ద ఘోరంగా పరాజయం పాలైంది. ఆ తర్వాత కంగనా మరే సినిమాలోనూ కనిపించలేదు. ఆమె తన తదుపరి సినిమాను ప్రకటించలేదు.