Allu Rjun vs Mahesh Babu: అప్పుడు సుకుమార్‌తో, ఇప్పుడు త్రివిక్రమ్ తో- టాక్ ఆఫ్ ది టౌన్ గా బన్నీ, ప్రిన్స్ పోటీ!

అల్లు అర్జున్- మహేష్ మధ్య మరోసారి పోటీ నెలకొంది. గతంలో సుకుమార్ తో మూవీ చేయాలి అనుకున్న సందర్భంలో, అల్లు అర్జున్ ‘పుష్ప’ మూవీ ప్రకటించగా, ప్రస్తుతం త్రివిక్రమ్ తో కలిసి మరో సినిమాకు రెడీ అయ్యాడు.

అల్లు అర్జున్, మహేష్ బాబు(PhotoCredit: Allu Arjun/MaheshBabu/instagram)

తెలుగు సినిమా పరిశ్రమలో ఇద్దరు స్టార్ హీరోలు, లేదంటే వారి అభిమానుల మధ్య పోటీ చాలా సందర్భాల్లో కనిపించింది. ఇప్పటికీ ఆ ట్రెండ్ కంటిన్యూ అవుతూనే ఉంది. తమ హీరోల సినిమాల రికార్డుల కోసం అభిమానులు ఒకరిపై మరొకరు విమర్శలు చేసుకోవడం చూస్తూనే ఉన్నాం. అయితే, కొన్నిసార్లు తెలిసి తెలియక హీరోలు కూడా ఫలానా హీరోతో కొన్ని సమస్యలు ఉన్నట్లు ప్రవర్తిస్తారు. ఎప్పుడైతే హీరోలు అలా హింట్ ఇస్తారో, అప్పుడు అభిమానులు కూడా దూకుడు పెంచుతారు. ఇద్దరు స్టార్ హీరోలు అయిన అల్లు అర్జున్, మహేష్ బాబు మధ్య అలాంటి పోటీ మరోసారి టాక్ ఆఫ్ ది ఇండస్ట్రీగా మారింది.

అప్పట్లో సుకుమార్ తో ‘పుష్ప’ సినిమా ప్రకటన!

ఈ ఇద్దరు హీరోల నడుమ ‘అల వైకుంఠపురములో’,  ‘సరిలేరు నీకెవ్వరుతో’ సినిమాల సమయంలో మొదలైంది. 2020 సంక్రాంతి సందర్భంగా ఈ రెండు సినిమాలు బరిలో నిలిచాయి. విజయోత్సవ వేడుకలపై ఇద్దరు హీరోల టీమ్‌లు నేరుగా సోషల్ మీడియాలో ఒకరిపై మరొకరు సెటైర్లు వేసుకోవడం సంచలనం కలిగించింది. కొద్ది రోజుల పాటు ఈ వివాదం సోషల్ మీడియాలో కనిపించింది. ఆ తర్వాత అల్లు అర్జున్, అవకాశం దొరికినప్పుడల్లా, సినిమా ప్రమోషన్లలో పరోక్షంగా మహేష్ బాబుపై కొన్ని కౌంటర్లు వేసిన సందర్భాలున్నాయి. అంతేకాదు, సుకుమార్‌తో మహేష్ సినిమా చేయాలనుకున్నప్పుడు కూడా బన్నీ జోక్యం చేసుకున్నాడు. వారి మధ్య స్క్రిప్ట్ విషయంలో కొన్ని విభేదాలు రావడాన్ని తనకు అనుకూలంగా మార్చుకున్నాడు. అల్లు అర్జున్ వెంటనే సుకుమార్‌ని కలిశాడు. అతడితో ‘పుష్ప’ సినిమా ప్రకటన చేయించాడు. ఒక్కసారిగా అందరూ షాక్ అయ్యారు.  

త్రివిక్రమ్-బన్నీ సినిమా దాదాపు కన్ఫామ్!

ప్రస్తుతం మహేష్ బాబు, త్రివిక్రమ్ కాంబోలో ‘గుంటూరు కారం’ అనే సినిమా తెరకెక్కుతోంది. ఈ నేపథ్యంలో ‘గుంటూరు కారం’ టీమ్‌లో మహేష్ బాబుకు విభేదాలు వచ్చినట్లు వార్తలు రావడంతో మరోసారి అల్లు అర్జున్ రంగంలోకి దిగాడు.  అల్లు అర్జున్ వెంటనే త్రివిక్రమ్ ను కలిశాడు. ఆయనతో కొత్త సినిమా చేయబోతున్నట్లు దాదాపుగా కన్ఫామ్ చేశారు. ఇప్పటికే పీఆర్‌ టీమ్‌లు బన్నీ, త్రివిక్రమ్ సినిమాను దాదాపుగా ప్రకటించారు. నిర్మాత కూడా తన ట్వీట్‌ తో హింట్‌ ఇచ్చారు. మహేష్ బాబు,  అల్లు అర్జున్ మధ్య ఈ పోటీకి కారణం ఎవరికీ తెలియదు. కానీ, 3 సంవత్సరాల తర్వాత మళ్ళీ టాక్ ఆఫ్ ది ఇండస్ట్రీగా మారింది.

ఇంతకీ ‘గుంటూరు కారం’ నుంచి తమన్ ను తొలగించారా?   

వాస్తవానికి ‘గుంటూరు కారం’ సినిమాకు సంగీత దర్శకుడిగా తమన్ ఎంపిక అయ్యాడు. అయితే, ప్రస్తుతం ఆయనను సినిమా నుంచి బ‌య‌ట‌కు పంపేశారంటూ  వార్తలు వచ్చాయి. త‌మ‌న్‌ను కాద‌ని కోలీవుడ్ స్టార్ మ్యూజిక్ డైరెక్ట‌ర్ అనిరుద్‌ను మ్యూజిక్ డైరెక్ట‌ర్‌గా తీసుకున్నారని ఊహాగానాలు వినిపించాయి. అనిరుద్ కాదు, జీవీ ప్ర‌కాష్ కుమార్‌ను తీసుకున్నారంటూ  మరికొంత మంది చెప్తున్నారు. ఈ వార్త‌ల‌పై  త‌మ‌న్ త‌న‌దైన స్టైల్లో రియాక్ట్ అయ్యారు. వ‌లిచిన అర‌టిపండును త‌న ట్విట్ట‌ర్‌లో పోస్ట్ చేసిన ఆయ‌న కడుపు మంట‌కు అర‌టిపండ్లు చాలా మంచివంటూ కామెంట్ కూడా చేశారు. ఈ కామెంట్ ను బట్టి ఆయన ‘గుంటూరు కారం’ మూవీ నుంచి బయటకు వెళ్లలేదని అర్థం అవుతోంది.