Annaatthe Teaser: వింటేజ్ రజనీ విశ్వరూపం.. అన్నాత్తే టీజర్ వచ్చేసింది!

రజనీకాంత్ నటిస్తున్న తమిళ చిత్రం అన్నాత్తే టీజర్ విడుదల అయింది. దసరా కానుకగా ఈ టీజర్‌ను నిర్మాతలు విడుదల చేశారు.

By: ABP Desam | Updated at : 14 Oct 2021 09:27 PM (IST)

Edited By: Eleti Saketh Reddy

Rajinikanth New Movie Annaatthe Teaser Released Know Details

రజనీకాంత్ అన్నాత్తే సినిమా టీజర్ విడుదల అయింది.

రజినీకాంత్ హీరోగా, దర్శకుడు శివ దర్శకత్వంలో రూపొందుతున్న తమిళ చిత్రం ‘అన్నాత్తే’. నవంబర్ 4వ తేదీన విడుదల కానున్న ఈ సినిమా టీజర్‌ను నిర్మాతలు దసరా సందర్భంగా విడుదల చేశారు. టీజర్ నిడివి ఒక నిమిషం 44 సెకన్లు ఉంది. గ్రామంలో జరిగే వేడుకల విజువల్స్‌తో ప్రారంభం అయిన టీజర్ వెంటనే యాక్షన్ టర్న్ తీసుకుంది.

టీజర్‌లో యాక్షన్, ఎలివేషన్ సీన్లు చూస్తుంటే.. వింటేజ్ రజనీకాంత్‌ను చూస్తున్న ఫీలింగ్ కలుగుతుంది. టీజర్ చివర్లో రజనీకాంత్ నడుచుకుంటూ వస్తుంటే.. పక్కన లారీలు గాల్లోకి ఎగిరే షాట్ టీజర్‌కు హైలెట్ అని చెప్పవచ్చు. డి.ఇమాన్ అందించిన బ్యాక్‌గ్రౌండ్ స్కోర్ కూడా టీజర్‌కు బాగా ప్లస్ అయింది. ఈ సినిమా మీద అంచనాలను రెట్టింపు చేసే విధంగా టీజర్ కట్ చేశారు.

ఈ సినిమాను తెలుగులో ఏషియన్ సినిమాస్, డి.సురేష్ బాబు పంపిణీ చేయనున్నారు. తెలుగులో కూడా నవంబర్ 4వ తేదీనే ఈ సినిమా విడుదల కానుంది. తెలుగు వెర్షన్‌కు ‘పెద్దన్న’ అనే టైటిల్ అనుకుంటున్నారని తెలుస్తోంది. ఈ సినిమాలో మీనా, కుష్బూ, నయనతార, కీర్తి సురేష్, జగపతి బాబు, ప్రకాష్ రాజ్, కమెడియన్లు సూరి, సతీష్, అభిమన్యు సింగ్ కూడా నటిస్తున్నారు.

ఇంత భారీ స్టార్‌కాస్ట్‌తో తెరకెక్కుతున్న ఈ సినిమాపై ఇప్పటికే ఎన్నో అంచనాలు నెలకొన్నాయి. విశ్వాసం వంటి సూపర్ హిట్ తర్వాత శివ రూపొందిస్తున్న సినిమా కావడంతో దీని కోసం తమిళ ప్రజలు ఎంతగానో ఎదురుచూస్తున్నారు. ఇప్పుడు లాంచ్ అయిన టీజర్‌లో కూడా విశ్వాసం చాయలు లీలగా కనపడుతున్నాయి. హీరో గెటప్, రూరల్ బ్యాక్‌గ్రౌండ్, ఫ్యామిలీ ఎమోషన్స్ ఫుల్‌గా చూపించారు.

2019లో ఈ సినిమా షూటింగ్ ప్రారంభం కాగా.. కరోనా వైరస్, రజనీకాంత్ ఆరోగ్య సమస్యల కారణంగా వాయిదా పడుతూ వచ్చింది. ఎస్పీ బాలసుబ్రమణ్యం పాడిన అన్నాత్తే టైటిల్ సాంగ్ పెద్ద హిట్ అయింది. రజనీకాంత్‌కు బాలసుబ్రమణ్యం పాడిన ఆఖరి పాట ఇదే. సినిమాకు సంబంధించిన పోస్ట్ ప్రొడక్షన్ కార్యక్రమాలు ప్రస్తుతం జరుగుతున్నాయి. నవంబర్ 4వ తేదీన తెలుగులో పెద్ద సినిమాలు ఏవీ విడుదల కావడం లేదు కాబట్టి తెలుగులో కూడా ఈ సినిమాకు భారీ ఓపెనింగ్స్ దక్కే అవకాశం ఉంది.