అన్వేషించండి

Nayeem Diaries: 'న‌యీం డైరీస్‌'పై ఆమె కుటుంబ సభ్యులు అభ్యంతరం... టీమ్ ఏమంటోందంటే?

గ్యాంగ్‌స్ట‌ర్‌ న‌యీం జీవితం ఆధారంగా రూపొందిన సినిమా 'న‌యీం డైరీస్'. దీనికి ఓ మహిళ కుటుంబ సభ్యులు అభ్యంతరం చెప్పారు. మరి, టీమ్ ఏమంటోంది?

By : ABP Desam | Updated at : 10 Dec 2021 06:14 PM (IST)

Objections on 'Naeem Diaries' from a woman family and the movie team responds about this issue Nayeem Diaries: 'న‌యీం డైరీస్‌'పై ఆమె కుటుంబ సభ్యులు అభ్యంతరం... టీమ్ ఏమంటోందంటే?

వశిష్ట సింహ

గ్యాంగ్‌స్ట‌ర్‌ న‌యీం జీవితం ఆధారంగా రూపొందిన 'న‌యీం డైరీస్' సినిమా ఈ నెల 10న (శుక్రవారం) థియేటర్లలో విడుదల అయ్యింది. సినిమాలో ఏం చూపించారు? ఏమిటి? అనే ఆసక్తితో చాలా మంది వెళ్లారు. న‌యీంతో పలువురు రాజకీయ నాయకులకు, పోలీస్ అధికారులతో సంబంధాలు ఉన్నాయనే ప్రచారం సాగిన సంగతి తెలిసిందే. అది పక్కన పెడితే... ఆయన జీవితంలో ఉన్న ఓ మహిళ ప్రస్తావన కూడా సినిమాలో ఉంది. సదరు మహిళ కుటుంబ సభ్యులు సినిమాలో సన్నివేశాల పట్ల అభ్యంతరం వ్యక్తం చేశారు. దాంతో ఆ సన్నివేశాలను బేషరతుగా సినిమా నుంచి తొలగిస్తామని చిత్రదర్శకుడు దాము బాలాజీ, నిర్మాత సీఏ వరదరాజు ఓ పత్రికా ప్రకటన విడుదల చేశారు.

"ఈ రోజు (శుక్రవారం, డిసెంబర్ 10) థియేటర్లలో విడుదల అయిన 'న‌యీం డైరీస్' సినిమాలో నిజజీవితంలో అమరురాలైన ఒక మహిళ పాత్రను పోలిన పాత్ర చిత్రణ ఆమె కుటుంబ సభ్యులను, అభిమానుల్ని బాధ పెట్టినట్టు మా దృష్టికి వచ్చింది. వారి మనోభావాలను గాయపరిచినందుకు మేము బేషరతుగా క్షమాపణలు చెబుతున్నాం. మా సినిమా ప్రదర్శనను ఆపేసి, ఆ పాత్రకు సంబంధించిన అభ్యంతకర దృశ్యాలను, సంభాషణలను వెంటనే తొలగిస్తున్నామని తెలియ చేస్తున్నాం" అని సినిమా దర్శకుడు దాము బాలాజీ, నిర్మాత సీఏ వరదరాజులు సంయుక్తంగా ఒక ప్రకటన విడుదల చేశారు.