Dil Raju Dheera Movie: 'దిల్' రాజు చేతికి 'ధీర' నైజాం, విశాఖ

భారీ సినిమాలతో పాటు చిన్న సినిమాలను సైతం దిల్ రాజు డిస్ట్రిబ్యూట్ చేస్తూ ఉంటారు. ఈ శుక్రవారం విడుదల కానున్న ఓ సినిమాను నైజాంలో ఆయన పంపిణీ చేస్తున్నారు.

దిల్ రాజు

'దిల్' రాజు అగ్ర నిర్మాత మాత్రమే కాదు... పంపిణీదారుడు కూడా! నైజాంతో పాటు విశాఖ ఏరియాలో సినిమాలు డిస్ట్రిబ్యూట్ చేస్తుంటారు. 'దిల్' రాజుది లక్కీ హ్యాండ్ అని భావించే హీరోలు, దర్శక - నిర్మాతలు ఉన్నారు. తెలుగులో ఆయన బ్రాండ్ వేల్యూ తెలిసిందే. 'దిల్' రాజు చేతిలో పడితే సినిమా హిట్ అని కొందరు ఫిక్స్ అయ్యే రోజులు ఇవి. నిర్మాతగా, డిస్ట్రిబ్యూటర్‌గా ఆయనకు ఉన్న అనుభవం అటువంటిది. భారీ సినిమాలతో పాటు చిన్న సినిమాలను కూడా ఆయన డిస్ట్రిబ్యూట్ చేస్తుంటారు. ఈ శుక్రవారం విడుదలకు సిద్ధమైన ఓ చిన్న సినిమాను ఆయన డిస్ట్రిబ్యూట్ చేస్తున్నారు. 

'దిల్' రాజు చేతికి లక్ష్ 'ధీర'
లక్ష్ చదలవాడ హీరోగా నటించిన లేటెస్ట్ సినిమా 'ధీర'. ఇందులో నేహా పఠాన్, సోనియా బన్సాల్ హీరోయిన్లు. 'వలయం', 'గ్యాంగ్‌ స్టర్ గంగరాజు' తర్వాత లక్ష్ నటించిన చిత్రమిది. విక్రాంత్ శ్రీనివాస్ దర్శకత్వం వహించారు. చదలవాడ బ్రదర్స్ సమర్పణలో శ్రీ తిరుమల తిరుపతి వెంకటేశ్వర పతాకంపై పద్మావతి చదలవాడ నిర్మించారు. ఫిబ్రవరి 2న సినిమా విడుదల కానుంది. 

'ధీర'ను నైజాం, విశాఖ ఏరియాల్లో 'దిల్' రాజు విడుదల చేయనున్నారు. సినిమా యూనిట్ దాంతో ఫుల్ హ్యాపీగా ఉంది. విడుదలకు ముందు తమ 'ధీర' హిట్ అని సంబరపడుతోంది. ఆల్రెడీ విడుదలైన ప్రచార చిత్రాలకు మంచి స్పందన లభించిందని, సినిమాకు సైతం అదే స్పందన వస్తుందని ఆశిస్తున్నామని దర్శక నిర్మాతలు పేర్కొన్నారు.

'ధీర' ట్రైలర్ చూస్తుంటే... ఇదొక యాక్షన్ ఎంటర్టైనర్ అని అర్థం అవుతోంది. 'రాజ్‌ గురుని మన అటాక్ నుంచి కాపాడాలంటే... రథం నడిపే కృష్ణుడితో పాటు యుద్ధం చేసే రాముడు రావాలి. ఎవడైనా ఉన్నాడా?' అని క్యారెక్టర్ ఆర్టిస్ట్ డైలాగ్ వచ్చిన తర్వాత... ''వాడి పేరు రణధీర్.. 6.2 ఉంటాడు'' అని లక్ష్ చదలవాడను పరిచయం చేశారు. 'వాడు ఎటాక్ చేస్తే ఎలా ఉంటుందో తెలుసా? భూకంపం తర్వాత భూమిలా ఉంటుంది' అంటూ హీరోకి ఎలివేషన్ ఇచ్చారు. 'నేను యుద్ధం చేయడం ఏంట్రా? యుద్ధమే మిమ్మల్ని వెంటాడుతూ... వేటాడుతూ వస్తోంది. 25 లక్షలతో మొదలైన నా జర్నీ రూ. 2500 కోట్లకు  చేరింది' ట్రైలర్ చివరలో హీరో చెప్పే మాటతో మరింత ఆసక్తి పెంచారు.

లక్ష్ చదలవాడ హీరోగా నేహా పఠాన్, సోనియా బన్సాల్ హీరోయిన్లుగా నటించిన 'ధీర' సినిమాలో 'మిర్చి' కిరణ్, హిమజ, నవీన్ నేని, భరణి శంకర్, సామ్రాట్, బాబీ బేడి, 'వైవా' రాఘవ, భూషణ్, మేక రామకృష్ణ, సంధ్యారాణి తదితరులు ఇతర ప్రధాన తారాగణం. ఈ సినిమాకు కూర్పు: వినయ్ రామస్వామి, ఫైట్ మాస్టర్: జాషువా - 'వింగ్ చున్' అంజి, ఛాయాగ్రహణం: కన్నా పీసీ, సంగీతం: సాయి కార్తీక్, సమర్పణ: చదలవాడ బ్రదర్స్, నిర్మాణ సంస్థ: బ్యానర్: శ్రీ తిరుమల తిరుపతి వెంకటేశ్వర ఫిలిమ్స్, నిర్మాత: పద్మావతి చదలవాడ, రచన - దర్శకత్వం: విక్రాంత్ శ్రీనివాస్.