మయోసైటీస్‌తో సమంత ఎంతలా పోరాడిందో చెప్పలేను - ఆమె ముఖంలో నవ్వు చూడాలి, అదే నా కోరిక : విజయ్ దేవరకొండ

మంగళవారం రాత్రి హైదరాబాదులోని నోవాటెల్ లో విజయ్ దేవరకొండ సమంత జంటగా నటించిన 'ఖుషి' సినిమాకు సంబంధించి మ్యూజికల్ కాన్సర్ట్ జరిగింది. ఈ ఈవెంట్ లో విజయ్ దేవరకొండ సమంత గురించి ఆసక్తికర వ్యాఖ్యలు చేశారు.

Photo Credit: Mythri Movie Makers/Twitter

విజయ్ దేవరకొండ, సమంత జంటగా నటిస్తున్న లేటెస్ట్ మూవీ 'ఖుషి'. శివ నిర్వాణ దర్శకత్వంలో మైత్రి మూవీ మేకర్స్ రూపొందించిన ఈ చిత్రం సెప్టెంబర్ 1న విడుదల కాబోతోంది.ఈ నేపథ్యంలో సినిమా ప్రమోషన్స్ లో భాగంగా మంగళవారం హైదరాబాద్లోని నోవాటెల్ లో 'ఖుషి మ్యూజికల్ కాన్సర్ట్' ఈవెంట్ ని నిర్వహించారు. ఈ ఈవెంట్ లో సమంత గురించి విజయ్ దేవరకొండ చేసిన వ్యాఖ్యలు ఇప్పుడు వైరల్ గా మారుతున్నాయి. ముందుగా ఈ ఈవెంట్లో విజయ్ దేవరకొండ, సమంత అదిరిపోయే ఎంట్రీ ఇచ్చారు. ఆ తర్వాత డాన్సులతో అదరగొట్టారు. విజయ్ దేవరకొండ షర్ట్ విప్పి మరి డాన్సులు చేయడం హైలైట్ గా నిలిచింది.

ఇక తర్వాత ఈవెంట్లో విజయ్ దేవరకొండ మాట్లాడుతూ.." గత ఏడాది ఏప్రిల్ లో నవ్వుతూ ఈ సినిమాని స్టార్ట్ చేసాం. అంతా సాఫీగా సాగింది. ఇంకా 30 శాతం షూటింగ్ పెండింగ్ ఉంది. సమంత మూడు రోజులు వస్తే ఆమె పార్ట్ షూటింగ్ అయిపోతుంది. సమంత వస్తుందని అందరం భావించారు. కానీ ఆ సమయంలో తన ఆరోగ్యం బాగాలేదని చెప్పింది. రెండు, మూడు రోజులు రెస్ట్ తీసుకుంటే అయిపోతుందిలే అనుకున్నాం. కానీ ఆరోగ్యం ఇంకా కుదుటపడలేదని చెప్పింది. ఆ తర్వాత రెండు, మూడు వారాలు రెస్ట్ తీసుకుంటే సెట్ అవుతుంది అనుకున్నాం. కానీ కాలేదు. ఆ తర్వాత ఒక ఈవెంట్లో సమంత ఓ పెద్ద హెల్త్ ఇష్యూ తో బాధపడుతుందని తెలిసింది. అప్పుడు నాకు చాలా బాధగా అనిపించిందని" విజయ్ అన్నారు.

" నిజానికి సమంత గురించి ఈ విషయాలు చెప్పకూడదని అనుకున్నాం. కానీ ఇప్పుడు చెప్పాలనిపిస్తుంది. ఎందుకంటే ఇలాంటి ప్రాబ్లం చాలామందికి వచ్చింది  కరోనా తర్వాత చాలామంది ఇలాంటి ఆరోగ్య సమస్యలను ఎదుర్కొంటున్నారు. మనకు హెల్త్ ఇష్యూ ఉన్నప్పటికీ పనిచేయచ్చు. బాధపడాల్సిన అవసరం లేదు. సరిగ్గా సమంత కూడా అదే చేసింది. తన లైఫ్ లో చాలా కష్టాలను ఎదుర్కొంది. ఎంతో పోరాడింది. ఆరోగ్యం నుంచి కోలుకొని సినిమా షూటింగ్ లు చేసింది. ఇప్పుడు మీకోసం డాన్స్ చేసింది. ఇప్పటికీ సమంత హెల్త్ సరిగ్గా లేదు. లైట్స్ పడితే ఆమెకు తలనొప్పి వస్తుంది. కళ్ళకి ఇబ్బంది ఉంటుంది. అయినా కూడా మీ అందరి కోసం ఇక్కడికి వచ్చింది. 'ఖుషి' హిట్టుతో ఆమె ముఖంలో నవ్వు చూడాలనుకుంటున్నాను" అంటూ సమంత గురించి మాట్లాడారు విజయ్.

ఆ తర్వాత డైరెక్టర్ శివ నిర్మాణ గురించి మాట్లాడుతూ.." నాతో సినిమా చేయడం కోసం ఎంతో వెయిట్ చేశాడు. మధ్యలో ఒకటి, రెండుసార్లు ఆగిపోయినా ఆయన ముఖంలో నవ్వు తగ్గలేదు. అదే మెయింటైన్ చేశారు. నన్ను ఆయన ఎంత ప్రేమించాడో ఆ ప్రేమని సినిమాలో పెట్టాడు. అంతే ప్రేమించి సినిమాను తీశాడు. కచ్చితంగా ఈ సినిమా అలరిస్తుంది. నాకు హిట్ వచ్చి చాలా రోజులు అవుతుంది. హీరోగా నా జర్నీ స్టార్ట్ అయి 6 నుంచి 7 సంవత్సరాలు అవుతుంది. ఈ జర్నీలో ఎంతో హైట్స్ చూసా, లోస్ చూసా. నా చుట్టూ ఉన్న చాలామంది మారిపోయారు. కానీ నాపై మీ ప్రేమ అసలు తగ్గలేదు. అదే ప్రేమను చూపిస్తున్నారు. అలాగే మీరంతా చాలా కాలంగా హిట్ కోసం ఎదురుచూస్తున్నారు. మీ ముఖంలో నవ్వు చూడాలని కోరుకుంటున్నా. సెప్టెంబర్ 1న మీ ముఖంలో నవ్వు చూస్తానని ఆశిస్తున్నా" అంటూ చెప్పుకొచ్చారు విజయ్ దేవరకొండ.

Join Us on Telegram: https://t.me/abpdesamofficial