Salaar : ప్రముఖ టీవీ ఛానెల్ లో 'సలార్' - టెలికాస్ట్ ఎప్పుడంటే?

Salaar Movie: ప్రభాస్ హీరోగా నటించిన 'సలార్' మూవీ బుల్లితెరపై సందడి చేయబోతోంది. ఏప్రిల్ 21న స్టార్ మా ఛానెల్ లో ఈ సినిమా టెలికాస్ట్ కానుంది.

ప్రభాస్ 'సలార్'(Image Credit : Salaar/Twitter)

Salaar seals its world television premiere : పాన్ ఇండియా హీరో ప్రభాస్, 'కేజిఎఫ్' డైరెక్టర్ ప్రశాంత్ నీల్ కాంబినేషన్లో తెరకెక్కిన 'సలార్' గత ఏడాది చివర్లో విడుదలై మంచి సక్సెస్ అందుకున్న విషయం తెలిసిందే. 'బాహుబలి' తర్వాత వరుస అపజయాలతో సతమతమవుతున్న ప్రభాస్ కి 'సలార్' మంచి కం బ్యాక్ ఇచ్చింది. ఈ చిత్రం బాక్స్ ఆఫీస్ వద్ద సుమారు రూ.700 కోట్లకు పైగా వసూళ్లు రాబట్టి పాన్ ఇండియా స్థాయిలో విజయం సాధించింది. రీసెంట్గా ఓటీటీ లోనూ మంచి రెస్పాన్స్ సొంతం చేసుకున్న 'సలార్' ఇప్పుడు టీవీల్లోకి రాబోతోంది.

'సలార్' టీవీల్లోకి వచ్చేస్తుంది

'సలార్' మూవీ శాటిలైట్ రైట్స్ ని స్టార్ మా భారీ ధరకు కొనుగోలు చేసింది. తాజా సమాచారం ప్రకారం ఈ మూవీ స్టార్ మా ఛానెల్ లో ఏప్రిల్ 21 ఆదివారం సాయంత్రం 5 గంటల 30 నిమిషాలకు టెలికాస్ట్ కానుంది. కాగా థియేటర్ లో రిలీజ్ అయిన నెల రోజులలోపే ఓటీటీ లోకి వచ్చేసిన ఈ సినిమా టీవీల్లోకి మాత్రం రిలీజ్ అయిన నాలుగు నెలలకి దర్శనం ఇవ్వబోతోంది. మరి బుల్లితెర పై 'సలార్' ఎలాంటి రెస్పాన్స్ అందుకుంటుందో చూడాలి.

రెండు ఓటీటీల్లో అందుబాటులో ఉన్న 'సలార్'

ప్రస్తుతం 'సలార్' మూవీ నెట్ ఫ్లిక్స్, హాట్ స్టార్ రెండు ఓటీటీల్లో అందుబాటులో ఉంది. నెట్ ఫ్లిక్స్ లో తెలుగు, తమిళ్, కన్నడ, మలయాళ, ఇంగ్లీష్ వెర్షన్స్ స్ట్రీమింగ్ అవుతుండగా.. హిందీ వెర్షన్ మాత్రం డిస్ని ప్లస్ హాట్ స్టార్ లో అందుబాటులో ఉంది. 'సలార్' హిందీ వెర్షన్ చాలా ఆలస్యంగా రిలీజ్ చేశారు. దీని కంటే ముందు రిలీజ్ చేసిన తెలుగు, తమిళ్, కన్నడ, మలయాళ వెర్షన్స్ కి ఓటీటీలో మంచి వ్యూస్ వచ్చాయి. ఇక సలార్ ఇంగ్లీష్ వెర్షన్ కి సైతం డిమాండ్ రావడంతో మేకర్స్ ఓటీటీ లో ఇంగ్లీష్ వెర్షన్ రిలీజ్ చేయగా.. దానికి ఎవరూ ఊహించని విధంగా భారీ రెస్పాన్స్ వచ్చింది.

'సలార్ 2' సెట్స్ పైకి వెళ్ళేది ఎప్పుడు?

'సలార్' క్లైమాక్స్ లో ప్రాణ స్నేహితులైన దేవ, వరదరాజ మన్నార్‌ మధ్య యుద్ధం కూడా రెండో భాగంలో ఉంటుందని మేకర్స్ హింట్ ఇచ్చారు. దీంతో 'సలార్ పార్ట్-2' ఎప్పుడు వస్తుందా అని ప్రేక్షకులు ఎదురుచూస్తున్నారు. పార్ట్ 2పై భారీ అంచనాలు పెరిగిపోయాయి. కాగా డైరెక్టర్ ప్రశాంత్ నీల్ 'సలార్ 2' కోసం అంత సిద్ధం చేశారట. లీడ్ రోల్స్ లో నటించే యాక్టర్స్ కాల్ షీట్స్ సైతం దక్కించుకున్నట్లు తెలుస్తోంది. వచ్చే ఏడాది 'సలార్ 2'ని సెట్స్ పైకి తీసుకెళ్లి అదే ఏడాది ప్రేక్షకుల ముందు తీసుకురావాలని మూవీ టీమ్ ప్లాన్ చేస్తున్నట్లు సమాచారం. 'సలార్' సినిమాని హోంబలే నిర్మాణ సంస్థ భారీ బడ్జెట్ తో నిర్మించారు. సినిమాలో ప్రభాస్ తో పాటూ మళయాళ స్టార్ హీరో పృథ్విరాజ్ సుకుమారన్, శృతిహాసన్, జగపతిబాబు, శ్రీయా రెడ్డి, బాబీ సింహా, ఈశ్వరీ రావ్, టినూ ఆనంద్ తదితరులు కీలకపాత్రలో నటించారు. రవి బాస్రూర్ సంగీతం అందించారు.