Nagarjuna: నాన్నగారు నా మనసులో చెప్పిన మాటను నిజం చేశాను - ‘నా సామిరంగ’ ప్రీ రిలీజ్ ఈవెంట్‌లో నాగార్జున

Naa Saami Ranga Pre Release Event: జనవరి 14న ‘నా సామిరంగ’ సినిమాతో ప్రేక్షకుల ముందుకు రానున్నారు నాగార్జున. తాజాగా జరిగిన ప్రీ రిలీజ్ ఈవెంట్‌లో ఈ సినిమా చేయడానికి కారణాన్ని బయటపెట్టారు నాగ్.

నాగార్జున (Image Credit: Shreyas Media/Twitter)

Nagarjuna at Naa Saami Ranga Pre Release Event: సంక్రాంతి పండగ వచ్చేస్తోంది. ఈసారి పండగకు నాలుగు సినిమాలు థియేటర్లలో సందడి చేయడానికి సిద్ధమవుతున్నాయి. ఒకదానితో పోటీ పడుతూ మరొకటి ప్రమోషన్స్ కూడా చేస్తున్నాయి. ఇక తాజాగా ‘నా సామిరంగ’ మూవీ ప్రమోషన్స్‌లో భాగంగా ప్రీ రిలీజ్ ఈవెంట్‌ను ఏర్పాటు చేశారు. జనవరి 14న విడుదల కానున్న ఈ మూవీ కచ్చితంగా హిట్ అవుతుందని నాగార్జున నమ్మకంతో ఉన్నారు. అందుకే ఈ ఈవెంట్‌లో టెక్నీషియన్ల గురించి, కో స్టార్ల గురించి మాట్లాడనని.. సక్సెస్ మీట్‌లోనే మాట్లాడతానని తెలిపారు. ఎప్పుడూ వెన్నంటే ఉంటూ ‘నా సామిరంగ’ టీమ్‌ను ప్రోత్సహించిన కీరవాణికి ప్రత్యేకంగా ధన్యవాదాలు చెప్పుకున్నారు.

కిష్టయ్య వస్తున్నాడు.. బాక్సాఫీస్ కొడుతున్నాడు..
మూడు నెలల్లో ‘నా సామిరంగ’ షూటింగ్‌ను పూర్తి చేశామని, అంత తక్కువ సమయంలో సినిమా తీయడం అంత ఈజీ కాదని అన్నారు నాగార్జున. అంతే కాకుండా ఈ మూడు నెలల్లో అందరం ఫ్యామిలీ అయిపోయామని అన్నారు. జనవరి 14కే ఈ కష్టం ఫలించిందా లేదా తెలుస్తుందని తెలిపారు. ‘‘సెప్టెంబర్ 20 నాన్నగారి పుట్టినరోజున.. ఆయనకు వందేళ్లు వచ్చినరోజున.. ఆయన విగ్రహం ఆవిష్కరించినప్పుడు.. ఆయనకు దండం పెట్టుకున్నప్పుడు.. ఆయన నా మనసులో చెప్పిన మాట ఇది. వెళ్లి చేయరా సినిమా. నా సామిరంగ అన్నారు. ఆయన చెప్పిన ధైర్యంతోనే ఇలాగే పూర్తిచేశాం సినిమా. సంక్రాంతి పండగకు అక్కినేని అభిమానులకు ఒక మాట చెప్పాలి. ఈసారి పండగకు కిష్టయ్య వస్తున్నాడు. బాక్సాఫీస్ కొడుతున్నాడు’’ అని తన సినిమా హిట్‌పై ధీమా వ్యక్తం చేశారు నాగార్జున.

సినిమాలు చూడరు అన్నారు..
ఈసారి సంక్రాంతికి ‘నా సామిరంగ’తో పాటు మహేశ్ బాబు ‘గుంటూరు కారం’, తేజ సజ్జా ‘హనుమాన్’, వెంకటేశ్ ‘సైంధవ్’ కూడా రిలీజ్ ఉన్నాయని గుర్తుచేసుకున్న నాగార్జున... అందరికీ ఆల్ ది బెస్ట్ చెప్పారు. ఒకప్పటి నుండి ఇప్పటివరకు సినిమాలు చూసే విధానం ఎలా మారిందని కామెంట్స్ చేశారు. ‘‘టీవీలు రాగానే సినిమాలు అయిపోయాయి. ఎవరూ చూడరు అన్నారు. ఫోన్లు వచ్చాయి, డిజిటల్ వచ్చింది, ఈమధ్య ఓటీటీ అనేది ఒక వచ్చింది. సినిమాలు చూడరు అన్నా సినిమాలు చూస్తూనే ఉన్నారు. సంక్రాంతి పండగకు సినిమా చూడడం తెలుగువారి ఆనవాయితీ. నాలుగు సినిమాలు వచ్చినా చూస్తారు’’ అంటూ ఈ సంక్రాంతికి వచ్చే అన్ని సినిమాలు ఆడాలని కోరుకున్నారు.

కీరవాణి సినిమాకు స్టార్..
ఇంతకు ముందు కూడా రెండు సినిమాలతో రెండుసార్లు సంక్రాంతి రేసులో నిలబడ్డారు నాగార్జున. ఆ రెండుసార్లు కూడా ఇతర చిత్రాల నుండి ఎంత పోటీ ఉన్నా... తను నటించిన సినిమాలు మాత్రం మంచి హిట్‌ను అందుకున్నాయి. ఇక ‘నా సామిరంగ’ ప్రీ రిలీజ్ ఈవెంట్‌లో కూడా ఈ విషయాన్ని గుర్తుచేసుకున్నారు నాగ్. ‘‘మీకు మేము ఇచ్చే సినిమా నచ్చితే మీరు ఎంత ఆదరిస్తారో రెండు పండగలు చూశాను. ఈ సినిమాను కూడా ఆదరిస్తారని అనుకుంటున్నాను’’ అని అన్నారు. ఈ సినిమాకు స్టార్ కీరవాణి అని, షూటింగ్ త్వరగా పూర్తిచేయడానికి ఆయన ఇచ్చిన ప్రోత్సాహం ముఖ్య కారణమని బయటపెట్టారు నాగార్జున. కొత్త దర్శకుడు అయిన విజయ్ బిన్నీని కీరవాణి, చంద్రబోస్ కలిసి చాలా ప్రోత్సహించారని తెలిపారు.