PaPa Telugu Movie: తెలుగులో డబ్బింగ్ అవుతున్న తమిళ్ బ్లాక్ బస్టర్!

కవిన్, అపర్ణా దాస్ జంటగా నటించిన తమిళ హిట్ 'దా... దా...'ను తెలుగులో 'పా...  పా'గా డబ్బింగ్ చేశారు. బ్లాక్ బస్టర్ డైరెక్టర్ త్రినాథరావు నక్కిన చేతుల మీదుగా ట్రైలర్ విడుదల చేశారు.

'పాపా' సినిమాలో కవిన్, అపర్ణా దాస్

మలయాళ నటి అపర్ణా దాస్ (Aparna Das)కు తెలుగులోనూ కొందరు అభిమానులు ఉన్నారు. ఆమె నటించిన సినిమాలు తక్కువే అయినప్పటికీ... ప్రశంసలు ఎక్కువ వచ్చాయి. తెలుగులో మెగా మేనల్లుడు పంజా వైష్ణవ్ తేజ్ 'ఆదికేశవ'లో నటించారు. గతేడాది ఆమె నటించిన తమిళ సినిమా 'దా... దా' బ్లాక్ బస్టర్ అయ్యింది. ఇప్పుడు ఆ సినిమాను తెలుగులో 'పా... పా' పేరుతో అనువదించారు.

'పాపా... ఓ నాన్న'గా దాదా...
ట్రైలర్ విడుదల చేసిన నక్కిన!
'పాపా' సినిమాకు 'ఓ నాన్న' అనేది ఉపశీర్షిక. ఇందులో కవిన్, అపర్ణా దాస్ జంటగా నటించారు. కె భాగ్యరాజ్, ఐశ్వర్య భాస్కరన్ హీరోకి తల్లిదండ్రులుగా.. వీటీవీ గణేష్, ప్రదీప్ ఆంటోనీ ఇతర ప్రధాన పాత్రల్లో  కనిపించనున్నారు. గణేష్ కె బాబు దర్శకత్వం వహించారు. తమిళంలో ఈ చిత్రాన్ని ఎస్ అంబేత్ కుమార్ ప్రొడ్యూస్ చేశారు. నీరజ సమర్పణలో పాన్ ఇండియా మూవీస్, జె కె ఎంటర్టైన్మెంట్స్ పతాకాలపై ఎంఎస్. రెడ్డి తెలుగులో విడుదల చేస్తున్నారు. బ్లాక్ బస్టర్ డైరెక్టర్ త్రినాథరావు నక్కిన చేతుల మీదుగా 'పాపా' ట్రైలర్ విడుదల చేశారు.

సినిమా చూశా... చాలా బావుంది - త్రినాథరావు నక్కిన
'పాపా' ట్రైలర్ విడుదల కార్యక్రమానికి రావడానికి ముందు తనకు నిర్మాత ఎంఎస్ రెడ్డి గారు తమిళ సినిమా 'దాదా'ను చూపించారని దర్శకుడు త్రినాథరావు నక్కిన తెలిపారు. ఇంకా ఆయన మాట్లాడుతూ... ''దాదా... అంటే నాన్న. పాపా... అంటే కూడా నాన్నే. తమిళ రచయిత, దర్శకుడు గణేష్ కె బాబు సినిమాలో ప్రతి సన్నివేశాన్ని చాలా బాగా రాసుకున్నాడు. ఏదైతే రాసుకున్నాడో... అది తెరపైకి తీసుకు వచ్చాడు. నాకు ఆయన రైటింగ్ స్టైల్ నచ్చింది. పాపా... ఇదొక నాన్న కథ మాత్రమే కాదు, స్నేహితుడు కథ, అమ్మ కథ, ప్రేమికుడి కథ. రెండు షేడ్స్ ఉన్న పాత్రలో హీరో కవిన్ చక్కగా నటించాడు. అతని క్యారెక్టరైజేషన్ కూడా బాగుంది. తన హెయిర్ స్టైల్ దగ్గర నుంచి బాడీ లాంగ్వేజ్ వరకు ప్రతి విషయంలో చాలా కేర్ తీసుకుని చేశారు. నాకు నచ్చిన చిత్రమిది. సంగీతం, సినిమాటోగ్రఫీ ఈతరం ప్రేక్షకులకు నచ్చేలా ఉన్నాయి. థియేటర్లలో సినిమా చూసి సక్సెస్ చేయాలి'' అని అన్నారు.

నిర్మాత ఎంఎస్ రెడ్డి మాట్లాడుతూ... ''బిజీగా ఉన్నప్పటికీ మాకోసం ట్రైలర్ లాంచ్ చేయడానికి వచ్చిన త్రినాథరావు నక్కిన గారికి థాంక్స్. గతంలో 'సాహసం చేయరా డింభకా' సినిమా ప్రొడ్యూస్ చేశా. ఇప్పుడు 'పా...పా' సినిమాతో ప్రేక్షకుల ముందుకు వస్తున్నాం. తమిళంలో విడుదలైన 50 రోజుల తర్వాత థియేటర్లకు వెళితే హౌస్ ఫుల్స్ అవుతున్నాయి. అప్పుడు అమెరికాలో నా స్నేహితుడు శ్రీకాంత్ కి ఫోన్ చేసి 'మంచి సినిమా చూశా' సినీ చెప్పారు. తన సహకారంతో తెలుగులోకి తీసుకొస్తున్నా. అతి త్వరలో 'ఆత్రేయపురం ఆణిముత్యం' సినిమా ఫస్ట్ లుక్ విడుదల చేయడానికి రెడీ అవుతున్నారు. ఆ సినిమాతో మణికంఠ అనే కొత్త దర్శకుని పరిచయం చేయబోతున్నాను'' అని చెప్పారు. 'పాపా' చిత్రానికి సహ నిర్మాతలు: శ్రీకాంత్ నూనెపల్లి - శశాంక్ చెన్నూరు, ఛాయాగ్రహణం: కె ఎళిల్ అరుసు, సంగీతం: జెన్ మార్టిన్.