Actress Jayasudha: శోభన్‌బాబు నా మీద జోకులు వేసేవారు, ఆయన ఏం చెప్పినా చేసేదాన్ని కాదు: జయసుధ

తెలుగు సినిమా పరిశ్రమలో తనకంటూ ఓ ప్రత్యేక గుర్తింపు తెచ్చుకున్న నటి జయసుధ. ఎన్నోఅద్భుత సినిమాల్లో నటించి సహజ నటిగా గుర్తింపు తెచ్చుకున్నారు. తాజాగా ఓ స్టార్ హీరో గురించి కీలక విషయాలు చెప్పారు.

నటి జయసుధ(Photo Credit: X)

Actress Jayasudha About Shoban Babu : తెలుగు సినిమా పరిశ్రమలో సహజ నటిగా గుర్తింపు తెచ్చుకున్న వ్యక్తి జయసుధ. టాలీవుడ్ లోని స్టార్ హీరోలందరితోనూ కలిసి నటించారు. ఎన్టీఆర్, ఏఎన్నార్ మొదలుకొని శోభన్ బాబు, చిరంజీవి వంటి నటులతో ఎన్నో బ్లాక్ బస్టర్ హిట్ సినిమాలు చేశారు. ప్రస్తుతం క్యారెక్టర్ ఆర్టిస్టుగా కొనసాగుతున్నారు. సెకెండ్ ఇన్నింగ్స్ లో తల్లిగా, అక్కగా, అత్తగా నటిస్తూ సక్సెస్ ఫుల్ గా కెరీర్ కొనసాగిస్తున్నారు.

జయసుధ - శోభన్ బాబు కాంబోలో బోలెడు హిట్ సినిమాలు

ఇక శోభన్ బాబు- జయసుధ కాంబినేషన్ లో వచ్చిన పలు సినిమాలు సూపర్ డూపర్ హిట్ అందుకున్నాయి. వెండితెరపై వీరి జోడీ ఎంతో అద్భుతంగా అలరించేది. వీరిని చూసి అభిమానులు నిజంగానే ప్రేమికులు, భార్యాభర్తల మాదిరిగా ఫీలయ్యే వారు. వీరికి కెమిస్ట్రీకి ఆడియెన్స్ ఫిదా అయ్యేవారు. తాజాగా ఓ ఇంటర్వ్యూలో పాల్గొన్న జయసుధ శోభన్ బాబు గురించి పలు ఆసక్తికర విషయాలు వెల్లడించారు.

నా మీద ఎన్నో జోకులు వేసేవారు- జయసుధ  

హీరో శోభన్ బాబుతో తనకు మంచి స్నేహం ఉందని జయసుధ చెప్పుకొచ్చారు. ఆయన తన మీద బోలెడు జోకులు వేసే వారిని చెప్పారు. “మా జనరేషన్ హీరోయిన్లలో నేను శోభన్ బాబుతో ఎక్కువ సినిమాలు చేశాను. ఆయనతో అందరు హీరోయిన్లు బాగుంటారు. నన్ను మాత్రం స్పెషల్ గా చూసేవారు. ఆయనకు నేనంటే ప్రత్యేకమైన ఇష్టం ఉండేది. నా మీద జోకులు వేసే వారు. ఏమోయ్ అంటూ సరదాగా పిలిచేవారు. మా జయసుధ చాలా తెలివిగలది అంటూ సెటైర్లు వేసే వారు. ఆమెను చూసి ప్రపంచం చాలా నేర్చుకోవాలి అని జయసుధ ఫీల్ అవుతుంది. మేం మాత్రం ఫీల్ కావట్లేదంటూ కామెడీ చేసే వారు. నేను చాలా అమాయకురాలిని అని తనకు తెలుసు. నాకు స్పోర్ట్స్, న్యూస్ పేపర్స్ అంటే చాలా ఇష్టం. బాగా బుక్స్ చదివేదాన్ని. అందుకే నన్ను అలా అనేవారు. నేను శోభన్ బాబు ఏం చెప్పినా చేసేదాన్ని కాదు. ఆయన ప్రాపర్టీస్ కొనమన్న చోట కొనేదాన్ని కాదు. ఆయన చెప్పేదానికి ఓకే సర్ అనేదాన్ని. నాకు నచ్చింది చేసేదాన్ని. ఆయన చాలా తెలివైన వారు. కానీ, నేను ఆయన తెలివి తక్కువ వారు అని ఫీలయ్యేదాన్ని. చాలా కాలం తర్వాత నాకు ఆ విషయం తెలిసింది. ఆయన చాలా మంచి ఫ్రెండ్. మంచి చెడులు చెప్పుకునే వ్యక్తి ఎవరైనా ఉన్నారంటే అది శోభన్ బాబు గారు మాత్రమే. ఇద్దరి మధ్య బాండింగ్ ఎక్కువగా ఉండేది. నా మీద తను ఎన్ని జోకులు వేసినా, నేను మళ్లీ ఆయన మీద జోకులు వేసేదాన్ని కాదు. ఈ లక్షణం మానాన్న నుంచి నాకు వచ్చింది” అని జయసుధ చెప్పుకొచ్చారు.