Bigg Boss 6 Telugu: ‘బిగ్ బాస్’ సీజన్-6లోకి సామాన్యులకు అవకాశం, నాగ్ ఆహ్వానం

మీకు ‘బిగ్ బాస్’ హౌస్‌లో సెలబ్రిటీలతో కలిసి సెలబ్రిటీగా మారిపోవాలని ఉందా? అయితే, నాగ్ చెప్పినట్లు చేసేయండి.

Image Credit: Star Maa

‘బిగ్ బాస్ నాన్ స్టాప్’ ముగిసింది. ఇప్పుడు ‘బిగ్ బాస్’ సీజన్-6కు సన్నహాలు మొదలయ్యాయి. ఈ మేరకు ఈ షో హోస్ట్ అక్కినేని నాగార్జున ఊహించని ఆఫర్ ప్రకటించారు. ఈ సారి ‘స్టార్ మా’, ‘డిస్నీ ప్లస్ హాట్‌స్టార్’లో ప్రసారం కానున్న ‘బిగ్ బాస్’ సీజన్-6లో సామ్యానులకు కూడా అవకాశం ఇస్తున్నామని నాగ్ వెల్లడించారు. ఇది కేవలం ‘వన్ టైమ్ గోల్డెన్ ఆపర్చునిటీ’ అని ప్రకటించారు. ఈ సందర్భంగా బుధవారం ఓ ప్రమోను విడుదల చేశారు. 

‘‘ఇన్నాళ్లూ మీరు ఇంట్లో కూర్చొని ‘బిగ్ బాస్’ హౌస్‌ను చూశారు. అయితే, స్టార్ మా మీకు ఆకాశాన్ని అందుకొనే అవకాశాన్ని ఇస్తుంది’’ అని నాగార్జున వెల్లడించారు. ఇందులో పాల్గొనేందుకు మీరు ఏం చేయాలనే విషయాన్ని వీడియోలో వెల్లడించారు. ‘బిగ్ బాస్’లోకి వెళ్లేందుకు సామాన్యులను ఆహ్వానించడం ఇదే తొలిసారి కాదు. ‘బిగ్ బాస్’ సీజన్-2లో ఇద్దరు సామాన్యులకు అవకాశాన్ని ఇచ్చారు.

నూతన్ నాయుడు, గణేష్‌లు సామాన్యులుగా ‘బిగ్ బాస్’ హౌస్‌లోకి ఎంట్రీ ఇచ్చారు. గణేష్ సుమారు 83 రోజులు హౌస్‌లో సెలబ్రిటీలతో కలిసి ఉండగలిగాడు. ఆ తర్వాత ఎలిమినేట్ అయ్యాడు. అయితే, నూతన్ నాయుడు 54వ రోజు బయటకు వెళ్లి, 75 రోజు మళ్లీ ఎంట్రీ ఇచ్చాడు. గణేష్ వెళ్లిన తర్వాతి రోజు.. అంటే 84వ రోజే ఎలిమినేట్ అయ్యాడు. ఆ షోకు హీరో నాని హోస్ట్‌గా వ్యవహరించారు. ఆ తర్వాత వచ్చిన మిగతా మూడు సీజన్లలో సామాన్యులకు అవకాశం చిక్కలేదు. మరి, మీరు కూడా సెలబ్రిటీ కావాలని అనుకుంటే.. నాగ్ చెప్పినట్లు చేయండి.

డిస్నీ ప్లస్ హాట్ స్టార్‌లో ప్రసారమైన ‘బిగ్ బాస్ నాన్ స్టాప్’ మొదటి సీజన్ ఇటీవలే ముగిసిన సంగతి తెలిసిందే. ఇందులో నటి బిందు మాధవి విజేతగా ట్రోపీని కైవశం చేసుకోగా.. అఖిల్ సార్ధక్ మాత్రం రన్నరప్‌తోనే సరిపెట్టుకోవలసి వచ్చింది. అయితే, యాంకర్ శివ మూడో స్థానంలో నిలిచి అందరినీ ఆశ్చర్యపరిచాడు. ఇక అరియానా ఓటీటీలో కూడా నాలుగో స్థానాన్నే సరిపెట్టుకోవలసి వచ్చింది. అసలు మొదటి వారంలోనే వెళ్లిపోతుందని భావించిన మిత్ర ఏకంగా ఐదో స్థానంలో నిలిచి ఆశ్చర్యపరిచింది. అయితే, ఆరో సీజన్‌లో యాంకర్ శివకు గానీ, మిత్రాకు గానీ మరో ఛాన్స్ లభించే అవకాశం ఉందని తెలుస్తోంది. మరి, ఏం జరుగుతుందో చూడాలి.