Nandamuri Balakrishna : మెగాఫోన్ పడుతున్న బాలకృష్ణ - కల్ట్ క్లాసిక్ సీక్వెల్‌కు ఆయనే డైరెక్టర్

Balakrishna To Direct Aditya 999 Max : నట సింహం నందమూరి బాలకృష్ణ క్రేజీ అప్‌డేట్ ఇచ్చారు. తాను డైరెక్షన్ చేస్తున్నట్లు చెప్పారు.

నట సింహం నందమూరి బాలకృష్ణ

నట సింహం నందమూరి బాలకృష్ణ (Nandamuri Balakrishna) కథానాయకుడు మాత్రమే కాదు... నిర్మాత! గాయకుడు! స్టూడియో అధినేత కుమారుడు! ఇప్పుడు కొత్తగా హోస్ట్‌గా కూడా చేస్తున్నారు. ఆయనలో దర్శకుడు కూడా ఉన్నారు. ఆ దర్శకుడు వచ్చే ఏడాది మెగాఫోన్ పడుతున్నారు. ఈ విషయం బాలకృష్ణే స్వయంగా వెల్లడించారు.  
 
బాలకృష్ణ దర్శకత్వంలో 'ఆదిత్య 999' 
బాలకృష్ణ కెరీర్‌లో కొన్ని స్పెషల్ సినిమాలు ఉన్నాయి. అందులో 'ఆదిత్య 369'ది మరీ మరీ స్పెషల్ ప్లేస్. కంటెంట్, టెక్నాలజీ పరంగా హాలీవుడ్ స్థాయి సినిమా అది. దానికి సీక్వెల్ 'ఆదిత్య 999 మ్యాక్స్' తెరకెక్కించనున్నట్లు 'అన్‌స్టాపబుల్ 2' ఎపిసోడ్‌లో బాలకృష్ణ చెప్పారు. స్క్రిప్ట్ తానే రాస్తున్నానని కూడా వెల్లడించారు. లేటెస్ట్ అప్‌డేట్ ఏంటంటే... ఆ సినిమాకు దర్శకత్వం కూడా బాలకృష్ణ వహించనున్నారు.
 
విశ్వక్ సేన్ కథానాయకుడిగా నటించిన 'దాస్ కా ధమ్కీ' ట్రైలర్ 1.0 విడుదల కార్యక్రమానికి బాలకృష్ణ ముఖ్య అతిథిగా వచ్చారు. హీరోగా నటిస్తుండటంతో పాటు ఆ చిత్రానికి విశ్వక్ దర్శకత్వం కూడా వహిస్తున్నారు. అతడు చేసిన వర్క్ గురించి చెబుతూ 'ఆదిత్య 999 మ్యాక్స్' విషయం చెప్పేశారు. 

Nandamuri Balakrishna On Aditya 369 Sequel Aditya 999 Max Direction : ''నేను ఒక సినిమా డైరెక్ట్ చేద్దామనుకున్నాను. కానీ, నా వల్ల కాలేదు. మధ్యలో ఆ సినిమా ఆగిపోయింది. అది 'నర్తనశాల'. ఆ తర్వాత మళ్ళీ దాని జోలికి వెళ్ళలేదు. నాకు టైమ్ లేదు. కొన్ని సబ్జెక్టులు తట్టలేదు'' అని బాలకృష్ణ అన్నారు. అప్పుడు మళ్ళీ మీ దర్శకత్వంలో సినిమా లేదా? అంటూ వేదిక కింద ఉన్న అభిమానులు అడిగితే... ''ఉంది ఉంది తప్పకుండా! 'ఆదిత్య 999' ఉంది'' అని బాలకృష్ణ చెప్పారు. దాంతో ఆయన దర్శకత్వంలో ఆ సినిమా రూపొందనుందని క్లారిటీ వచ్చింది. 

'ఆదిత్య 369' సినిమాకు సీక్వెల్ వస్తే చూడాలని ప్రేక్షకులు ఎప్పటి నుంచో కోరుకుంటున్నారు. బాలకృష్ణ కూడా సీక్వెల్ చేయాలని చాలా రోజులుగా అనుకుంటున్నారు. ఆయన వందో సినిమాగా అదే చేస్తారని వినిపించింది. అయితే... కుదరలేదు అనుకోండి! ఇప్పుడు ఆ సినిమా పట్టాలు ఎక్కే సమయం వచ్చిందని బాలకృష్ణ మాటలను బట్టి అర్థం అవుతోంది.
  
వచ్చే ఏడాది సెట్స్ మీదకు!
Aditya 999 Max will be launched in February 2023 : వచ్చే ఏడాది 'ఆదిత్య 999 మాక్స్' సెట్స్ మీదకు వెళ్లనుందని, రెగ్యులర్ షూటింగ్ స్టార్ట్ చేయడానికి సన్నాహాలు చేస్తున్నామని బాలకృష్ణ వెల్లడించారు. మరో నాలుగు నెలల తర్వాత... ఫిబ్రవరిలో ఈ సినిమా పూజా కార్యక్రమాలు జరగనున్నాయట. ఇందులో బాలకృష్ణతో పాటు ఆయన తనయుడు మోక్షజ్ఞ కూడా నటించే అవకాశాలు ఉన్నాయని వినికిడి. 

'ఆదిత్య 999 మాక్స్'తో మోక్షజ్ఞను కథానాయకుడిగా బాలకృష్ణ పరిచయం చేస్తారా? లేదా? అనేది కొన్ని రోజులు ఆగితే స్పష్టత వస్తుంది. మొత్తం మీద... కల్ట్ క్లాసిక్‌కి సీక్వెల్ రావటం పక్కా అన్నమాట. ఇప్పుడు ఈ విషయమే బాలయ్య, నందమూరి అభిమానులను  ఖుషీ చేస్తోంది.  

ప్రస్తుతం బాలకృష్ణ చేస్తున్న సినిమాల విషయానికి వస్తే... దర్శకుడు గోపీచంద్ మలినేనితో 'వీర సింహా రెడ్డి' చేస్తున్నారు. ఆ తర్వాత అనిల్ రావిపూడి దర్శకత్వంలో మరో సినిమా చేయడానికి గ్రీన్ సిగ్నల్ ఇచ్చారు. ఆ రెండిటి తర్వాత 'ఆదిత్య 999 మాక్స్' స్టార్ట్ కావచ్చు. దర్శకులు పరశురామ్, వెంకటేష్ మహా కూడా ఆయనతో సినిమాలు చేయడానికి ఆసక్తిగా ఉన్నారు.