Janasena News : మనమేం చేస్తామో ప్రజలకు చెప్పండి - అభ్యర్థులకు బీఫాంలు ఇచ్చి దిశానిర్దేశం చేసిన పవన్ కల్యాణ్

Andhra News : జనసేన అభ్యర్థులకు పవన్ కల్యాణ్ బీఫాంలు ఇచ్చారు. ప్రజలు ఏం చేస్తామో చెప్పేందుకు విస్తృతంగా ప్రచారం చేయాలని సూచించారు.

జనసేన అభ్యర్థులకు బీఫామ్స్ ఇచ్చిన పవన్ కల్యాణ్

Pawan Kalyan gave B forms to Janasena candidates :  ఆంధ్రప్రదేశ్‌లో గురువారం నుంచి నామినేషన్లు ప్రారంభం కానున్నాయి. ఈ క్రమంలో పవన్ కల్యాణ్ తమ అభ్యర్థులకు బీఫాంలు అందించారు. మొదటి బీఫాంను తెనాలి అభ్యర్థి నాదెండ్ల మనోహర్‌కు అందించారు. తనతో సహా 20 మంది ఎమ్మెల్యే, ఇద్దరు ఎంపీ అభ్యర్థులకు బి ఫారాలను పవన్ ఇచ్చారు. పాలకొండ నుంచి జయకృష్ణ వ్యక్తిగత కారణాలతో రాలేకపోయారు.ఏపీలోని 175 అసెంబ్లీ, 25 పార్లమెంట్‌ స్థానాలుండగా టీడీపీ, జనసేన, బీజేపీలతో కుదుర్చుకున్న పొత్తుల కారణంగా 21 అసెంబ్లీ, రెండు పార్లమెంట్‌ స్థానాలకు జనసేన పోటీ చేస్తుంది . ఈ సందర్భంగా ఇప్పటికే ప్రచారాన్ని ప్రారంభించిన పవన్‌కల్యాణ్ ‌(Pawankalyan) పండుగ రోజున బీ ఫారాలు అందజేసి దిశానిర్దేశం చేశారు.                                                                            

2019 ఎన్నికల తర్వాత రాష్ట్రం ఇబ్బందులు ఎదుర్కొందని ఆయన తెలిపారు. ఓట్లు చీలకుండా ఎన్డీఏ కూటమిగా ఏర్పడ్డామని.. ఎలాగైనా రాక్షస పాలనను అంతమొందించాలన్నారు. ఏపీని అన్ని రకాలుగా అభివృద్ధి చేయడమే లక్ష్యంగా పని చేయాలని నేతలకు సూచించారు. శ్రీరామ నవమి రోజు బీ-ఫారాలు అందివ్వడం సంతోషంగా ఉందన్న ఆయన.. రామరాజ్యం వైపు రాష్ట్రాన్ని అడుగులు వేయించాలన్నారు. అనంతరం అభ్యర్థులతో పవన్‌ కళ్యాణ్ ప్రతిజ్ఞ చేయించారు.                           

పవన్ అభ్యర్థులతో చేయించిన ప్రతిజ్ఞ : 

మూడు కాలాల ప్రకృతి ఆశీస్సులతో, తరగని సహజ వనరులతో, సుదీర్ఘ సాగరతీరంతో సకల సంపదలకు నెలవైనది ఆంధ్రప్రదేశ్‌. అప్పుల ఆర్థిక విధానాలు, తప్పుడు పరిపాలన వల్ల ఇప్పుడు మనకీ తిప్పలు తప్పడం లేదు. అయిదేళ్ల పాలనలో రాష్ట్రం అదోగతి పాలయింది. మనమంతా కలిసికట్టుగా నడుం బిగించి, మళ్లీ మన అన్నపూర్ణ ఆంధ్రప్రదేశ్‌ను పునర్నిర్మించుకోవాల్సిన అవసరం ఎంతో ఉంది. ప్రజాస్వామ్యంలో ప్రజలే ప్రభువులు కనుక వారికి జవాబుదారుగా ఉంటూ పారదర్శక పాలనను అందించాల్సిన కర్తవ్యం రాజకీయ వ్యవస్థది. తెలుగు వారి జీవన రేఖ పోలవరం పూర్తి, నదుల అనుసంధానం, సామాజిక న్యాయం, యువతకు విద్య`ఉద్యోగావకాశాలు, మహిళలకు సముచిత స్థానం, జనం మెచ్చే రాజధాని, ప్రజలకు నచ్చే ప్రభుత్వమే పాలనకు గీటురాయి కావాలి. మన లక్ష్యమైన ప్రతి చేతికి పని, ప్రతి చేనుకు నీరు అందించడం ద్వారా… వలసలు, పస్తులు లేని వికసిత ఆంధ్రప్రదేశ్‌ ఆవిష్కరణకు భూమిక సిద్దం చేయడమే మనందరి ఉమ్మడి బాధ్యత. ఇందుకోసం వచ్చే ఎన్నికల్లో తెలుగుదేశం-జనసేన-బీజేపీలతో కూడిన ఎన్డీయే కూటమి గెలుపే కర్తవ్యంగా కృషిచేస్తానని, మన పార్టీ నియమ`నిబంధనలకు కట్టుబడుతూ, కూటమి అభ్యర్థిగా పైన తెలిపిన ప్రతిమాటకు కట్టుబడి ఉంటానని భారత రాజ్యాంగం సాక్షిగా ప్రతిజ్ఞ చేస్తున్నాను.