CPIని జాతీయ హోదా నుంచి తప్పించడం అవివేకం: కూనంనేని

ఈసీ నిర్ణయంపై త్వరలో సవాల్ చేస్తాందేశ స్వాతంత్య్రంలో, అనంతరం కీలక మలుపులో సిపిఐది కీలక పాత్ర

ఈసీ నిర్ణయంపై త్వరలో సవాల్ చేస్తాం

దాదాపు వందేళ్ల చరిత్ర కలిగిన భారత కమ్యూనిస్టు పార్టీకి  ఎన్నికల కమిషన్ జాతీయ హోదాను ఉపసంహరించడం అవివేక చర్య అన్నారు CPI  రాష్ట్ర కార్యదర్శి కూనంనేని సాంబశివరావు.  ఈ సమయంలో ఉపసంహరించడం అనేక అనుమానాలకు తావిస్తోందని, జాతీయ హోదాకు గుర్తింపు సంబంధించిన నిబంధనలే తప్పుగా ఉన్నాయని విమర్శించారు. ఈసీ నిర్ణయంపై త్వరలో సవాల్ చేస్తామని తెలిపారు. కేవలం ఎన్నికల ఫలితాల ఆధారంగా జాతీయ స్థాయి గుర్తింపు ఇవ్వడం సరైంది కాదని కూనంనేని అభిప్రాయపడ్డారు. మన దగ్గర పార్లమెంటరీ ప్రజాస్వామ్యంలో బహుళ పార్టీ విధానం ఉందని అన్నారు.

ప్రతి ఎన్నికలో అన్ని పార్టీలు, అన్ని స్థానాల్లో పోటీ చేయలేవని తెలిపారు. ఎన్నికల అవగాహనలు, సర్దుబాట్లు ఉంటాయన్నారు.  వీటన్నింటిని పరిగణలోకి తీసుకోకుండా తప్పుడు విధానంలో జాతీయ హోదాను ఎన్నికల కమిషన్ నిర్దారించడం సరైనది కాదన్నారు కూనంనేని. ఎన్నికలు డబ్బులు, ప్రలోభాలమయం అయిపోయాయని, వీటిని అరికట్టలేక ఎన్నికల కమిషన్, ప్రతి ఎన్నికల్లో తన అసమర్థతను చాటుకుంటోందన్నారు.  ప్రతి అభ్యర్థికి పోటీలో సమాన అవకాశాలు కల్పించలేకపోతున్నదని విమర్శించారు. పైగా గత ఎన్నికల్లో ప్రధాని కోడ్ ఉల్లంఘనలకు సంబంధించిన ఆరోపణలపై చర్యలు తీసుకోలేకపోయిందని ఆరోపించారు. గుజరాత్ ఎన్నికల షెడ్యూలు విడుదలను అధికార పార్టీకి అనుకూలంగా ఆలస్యం చేసిందన్నారు.

జాతీహోదాపై నిర్ణయించే నైతికత ఈసీకి లేదు

ఇలాంటి వివక్షాపూరితమైన ఎన్నికల కమిషన్‌కు ప్రతిపక్ష రాజకీయ పార్టీలకు  సంబంధించిన  హోదాపై నిర్ణయించే నైతికత లేదని మండిపడ్డారు కూనంనేని. ప్రస్తుతం మన దేశంలో అవలంభిస్తున్న ఫస్ట్ పాస్ట్ ద పోస్ట్ ఎన్నికల విధానమే సరైంది కాదనే చర్చ సాగుతోందని అభిప్రాయపడ్డారు. బహుముఖ పోటీలో 20, 30 శాతం ఓట్లు వచ్చిన అభ్యర్థులు కూడా గెలుస్తున్నారని, కనీసం 50 శాతం ఓట్లు దాటని విజేతకు జనామోదం లేదని భావిస్తామా? అని ప్రశ్నించారు. ప్రస్తుత ఫస్ట్ పాస్ట్ ద పోస్ట్ విధానాన్ని రద్దు చేసి, దామాషా పద్ధతిలో నిష్పాక్షిక ఎన్నికలు నిర్వహిస్తే రాజకీయ పార్టీల వాస్తవ బలం బైటపడుతుందన్నారు. ఎన్నికల్లో ధన ప్రభావాన్ని నియంత్రించేందుకు ప్రభుత్వమే అభ్యర్థుల ఎన్నికల ఖర్చును భరించాలని డిమాండ్ చేశారు. దేశ స్వాతంత్రోద్యమం, అనంతరం ప్రతి కీలక మలుపుతో  ముడిపడి ఉన్న సీపీఐ చరిత్ర, అన్ని రాష్ట్రాల్లో ఉన్న సభ్యత్వాలు, అనుబంధ ప్రజాసంఘాల సభ్యుల సంఖ్యను పరిగణలో తీసుకోకుండా కేవలం సాంకేతిక అంశాలతో జాతీయ హోదాను తొలగించడం ఎన్నికల కమిషన్ అవివేక చర్య అన్నారు.

CPI కంకి కొడవలికి వచ్చిన ముప్పేమీ లేదు

సీపీఐ జాతీయ హోదాను ఎన్నికల కమిషన్ ఉపసంహరించినంత మాత్రాన పార్టీ ఎన్నికల గుర్తు కంకి కొడవలి గుర్తు పోదని కూనంనేని సాంబశివరావు స్పష్టం చేశారు. కంకి కొడవలి సీపీఐకే ఉంటుందని, ఇతర పార్టీలకు ఇవ్వబోరని, దేశ వ్యాప్తంగా కిందిస్థాయి వార్డు మెంబర్ నుంచి MP వరకు ఇలా ఏ ఎన్నికలోనైనా  CPI బీ ఫామ్  పోటీచేసే అభ్యర్థికి కచ్చితంగా కంకి కొడవలి గుర్తును ఇకముందు కూడా ఎన్నికల కమిషన్ కేటాయిస్తుందని తెలిపారు. జాతీయహోదా అనేది సాంకేతిక అంశం మాత్రమేనని, దీనివల్ల దూరదర్శన్, రేడియోల్లో ప్రచారానికి కేటాయించే సమయంలో తేడా వస్తుంది తప్ప, ఇతర ఎలాంటి నష్టం ఉంబోదని వివరించారు. త్వరలోనే సాంకేతిక అంశాన్ని కూడా అధిగమనిస్తామని, గతంలో కూడా ఇలాంటి పరిస్థితి వచ్చినా, అన్ని అంశాలను పరిగణలో తీసుకొని జాతీయహోదాను కొనసాగించిన విషయాన్ని కూనంనేని గుర్తు చేశారు.