Chittoor News: మద్యం మత్తులో దారుణం.. పొట్టేలుకు బదులు వ్యక్తి తల నరకడంతో గ్రామస్తులు షాక్

సంక్రాంతి సంబరాలు విషాదాన్ని నింపాయి. ఎల్లమ్మ ఆలయం వద్ద మద్యం మత్తులో ఉన్న తలారి.. పొట్టేలు అనుకుని ఓ వ్యక్తి తలపై కత్తితో వేటు వేశాడు.

మదనపల్లెలో దారుణం (Representational Image)

Man Killed Instead Of Sheep: జంతుబలులు చేయకూడదని, వాటిని నిషేధించాలని మానవతావాదులు వాదిస్తుంటారు. అయితే కొన్ని చోట్ల జంతుబలులే కాదు గుట్టు చప్పుడు కాకుండా నరబలులు చేసిన ఘటనలు వెలుగు చూస్తుంటాయి. కొందరు మందుబాబులు మద్యం మత్తులో ఏం చేస్తారో వారికే తెలియదు.. పీకల వరకు మద్యం సేవించి ఈ లోకంలో తనకు మించిన హీరో ఎవరూ లేరండూ రోడ్లపై విన్యాసాలు, కేకలతో తెప్పిస్తుంటారు. మద్యం మత్తులో ఓ వ్యక్తి చేసిన పని ఆ గ్రామాన్నే విషాదంలోకి నెట్టింది. జంతుబలి చేయబోతే అది నరబలిగా మారడంతో పెను విషాదం చోటుచేసుకుంది. చిత్తూరు జిల్లా మదనపల్లె రూరల్ మండలంలో ఈ ఘటన జరిగింది.

సంక్రాంతి సంబరాలు విషాదాన్ని నింపాయి. గ్రామ దేవతలకు జంతుబలులు ఇస్తుంటారు. పొలిమేరలో ఉన్న గ్రామ దేవతకు ప్రత్యేక పూజలు పొంగళ్ళు నిర్వహించారు. ఈ క్రమంలో మదనపల్లె రూరల్ మండలం వలసపల్లెలో సంక్రాంతి సంబరాలు జరిగాయి. అయితే స్థానిక ఎల్లమ్మ ఆలయం వద్ద పొట్టెలును బలిచ్చేందుకు తీసుకొచ్చారు. మద్యం మత్తులో ఉన్న తలారి.. పొట్టేలు అనుకుని ఓ వ్యక్తి తల నరికేశాడు. అక్కడ జరిగింది చూసిన వారు ఒక్కసారిగా షాకయ్యారు. జంతుబలి నరబలిగా మారిపోవడంతో స్థానికంగా ఆందోళనకర పరిస్థితులు నెలకొన్నాయి.

మద్యం తాగిన తలారి..
పొలిమేరలో గ్రామదేవతకు బలి ఇచ్చేందుకు పొట్టేలును తీసుకొచ్చారు. తలారి లక్ష్మణ్ కుమారుడు తలారి సురేష్‌(35) పొట్టేలును పట్టుకుని నిల్చున్నాడు. మరో తలారి చలపతి అప్పటికే మద్యం సేవించి ఉన్నాడు. బలిచ్చే సమయం కాగా, అంతా ఒకే అన్నారు. కానీ మద్యం మత్తులో ఉన్న తలారి చలపతి పొట్టేలు తలకు బదులుగా తలారి సురేష్ తలపై కత్తితో వేటు వేశాడు.  ఒక్కసారిగా కుప్పకూలిపోయిన అతడ్ని చికిత్స నిమిత్తం మదనపల్లె జిల్లా ఆసుపత్రికి తరలించారు. తీవ్ర రక్తస్రావం కావడంతో చికిత్స పొందుతూ సురేష్ మృతి చెందాడు. మృతునికి భార్య, ఇద్దరు పిల్లలు ఉన్నారు. స్థానికుల నుంచి సమాచారం అందుకున్న పోలీసులు నిందితుడు చలపతిని అదుపులోకి తీసుకున్నారు. కేసు నమోదు చేసి విచారణ చేపట్టారు. మద్యం మత్తులో ఉండటం వల్లే ఘటన జరిగినట్లు పోలీసులు ప్రాథమికంగా నిర్ధారించారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి