Hyderabad: మీకు పని మనిషి ఉన్నారా? తస్మాత్ జాగ్రత్త! మీకూ ఇలా జరగొచ్చు.. ఇదో కొత్త రకం మోసం

హైదరాబాద్‌‌తో పాటు దేశంలోని మెట్రో నగరాల్లోని ఖరీదుగా కనిపించే ఇళ్లను ఎంపిక చేసుకుని ఈ కైలాలీ ముఠా సభ్యులు ఇంటి పనికి చేరతారు.

ప్రతీకాత్మక చిత్రం

ఇంట్లో పని మనుషులను పెట్టుకోవాలని చూస్తున్నారా? లేదా ఇప్పటికే మీ ఇంటికి పని మనుషులు వచ్చి అన్ని పనులూ చేసి వెళ్తుంటారా? అయితే, కాస్త అప్రమత్తంగా ఉండాల్సిన సమయం వచ్చింది. వారు ఎక్కడి నుంచి వస్తున్నారు.. మూలాలు ఎక్కడివీ అన్న అంశాలపై కన్నేయండి. ఎందుకంటే.. ఓ దొంగల ముఠా పని మనుషుల ముసుగులో మొత్తం దోచుకెళ్తోంది. హైదరాబాద్‌లోనే వీరు చోరీ చేసిన ఘటనలు వెలుగు చూశాయి. అతి వినయం, ఎక్కడ లేని నమ్మకం ప్రదర్శించి.. చివరికి అందర్నీ మత్తులో పడేసి ఉన్నదంతా ఊడ్చుకుపోతున్న వ్యవహారం బయటికి వచ్చింది. ఈ ముఠాను నేపాలీ దేశస్థులుగా, అక్కడి కైలాలీ దొంగల ముఠాగా పోలీసులు గుర్తించారు.

నేపాల్ నుంచి వచ్చి ఖరీదైన ఇళ్లలో పనికి..
హైదరాబాద్‌‌తో పాటు దేశంలోని మెట్రో నగరాల్లోని ఖరీదుగా కనిపించే ఇళ్లను ఎంపిక చేసుకుని ఈ కైలాలీ ముఠా సభ్యులు ఇంటి పనికి చేరతారు. ఇల్లు శుభ్రం చేయడం, తోట పని వంటివి చేస్తూ ఉంటారు. ఈ సమయంలో యజమానులు ఏవైనా విలువైన వస్తువులు ఇంట్లో ఎక్కడైనా మర్చిపోతే.. అవి తమకు దొరికాయంటూ తిరిగి వారికి ఇచ్చేసి బాగా నమ్మకం పొందుతారు. ఇలా కొన్ని రోజుల తర్వాత తమ వారిని కూడా పరిచయం చేస్తారు. ఈ లోపు ఇళ్లలో ఎక్కడెక్కడ సీసీటీవీ కెమెరాలు ఉన్నాయి.. డబ్బులు, బంగారు ఆభరణాలు వంటి ఎక్కడ పెడతారు.. వాటిని కొట్టేసి పారిపోవడానికి దారి ఎక్కడి నుంచి ఉంటుందనే విషయాలన్నింటినీ పసిగడతారు. 

ఆ తర్వాత యజమానులు ఎక్కడికైనా వెళ్లిన సందర్భంలో అదను చూసి లూటీ చేస్తారు. తిరిగి యజమానులు వచ్చేలోపే సొమ్ముతో సహా మాయం అవుతారు. సీసీటీవీ కెమెరాలకు సంబంధించి డీవీఆర్‌ను కూడా వెంట తీసుకెళ్తారు. ఈ చోరీ ఘటనలు తాజాగా కోకాపేట్‌లోని ఓ గేటెడ్‌ కమ్యూనిటీలో విల్లా నంబర్‌ 44లో, కుషాయిగూడ స్టేషన్ పరిధిలో జరిగాయి. మొదటి ఘటనలో రూ.2 కోట్ల విలువైన వజ్రాలు, బంగారు ఆభరణాలను దోచుకెళ్లారు. సైనిక్‌పురిలోని ఓ రియల్ ఎస్టేట్ వ్యాపారి ఇంట్లో రూ.2 కోట్లు విలువైన వజ్రాలు, బంగారు ఆభరణాలు, నగదును దోచుకుపోయారు. రాయదుర్గం, నాచారం, ముసారాంబాగ్‌ ప్రాంతాల్లోనూ వీరు చేతివాటం ప్రదర్శించినట్లుగా పోలీసులు చెప్పారు.

అనంతరం, ఈ ముఠా దొంగలు ఫోన్లను పడేసి పోలీసులకు దొరక్కుండా విడివిడిగా రోడ్డు మార్గం ద్వారా నాందేడ్‌, పుణె, ఇండోర్‌, లక్నో మీదుగా భారత సరిహద్దులు దాటి నేపాల్‌లోకి చేరుకుంటారు.  ఒక్కసారి నేపాల్‌కు చేరుకున్నారంటే ఇక వారు దొరకరు. ఆ దేశానికి ఖైదీల అప్పగింతకు సంబంధించిన ప్రత్యేక ఒప్పందం అమల్లో లేకపోవడం వరంగా మారింది. సైబరాబాద్‌, రాచకొండ పోలీసులు  అక్కడ మకాం వేసి నిందితులను గుర్తించినా ఇక్కడికి తీసుకురాలేకపోతున్నారు. స్వాధీనం చేసుకున్న సొత్తును కూడా స్థానిక పోలీస్‌ స్టేషన్‌లోనే డిపాజిట్‌ చేసి రావాల్సి వచ్చింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి