Child Murder : భార్యపై అనుమానం - రెండేళ్ల బిడ్డకు మరణ శాసనం ! అనంతపురం ఓ తండ్రి ఘాతుకం !

భార్యపై అనుమానంతో బిడ్డను చంపేశాడో రాక్షస తండ్రి. బిడ్డను కాపాడుకోవడానికి అన్ని ప్రయత్నాలు చేసిన ఆ తల్లి చనిపోయిన తర్వాత మృతదేహాన్ని వదిలి పెట్టి వెళ్లింది. అనంతపురం జిల్లాలో ఈ ఘటన చోటు చేసుకుంది.

అనంతపురం జిల్లాలో బిడ్డను చంపిన తండ్రి

రెండేళ్ల బిడ్డకు బుడిబుడి నడకలు.. గలగల మాటలు నేర్పే తండ్రులను చూసి ఉంటాం కానీ చేజేతులా బండకేసి కొట్టి చంపేవాళ్లు ఉంటారా ?. అనుమానం పెనుభూతమైన .. దానికి మద్యంమత్తు తోడైతే అలాంటి రాక్షసులు తయారవుతారు. అనంతపురం జిల్లా మడకశిరలో తన రెండేళ్ల బిడ్డను మద్యం మత్తులో చేజేతులా నేలకేసి కొట్టి చంపాడు ఓ తండ్రి. దానికి కారణం ఆ బిడ్డ తనకు పుట్టలేదన్న అనుమానం. పాప పుట్టినప్పటి నుండి ఆ అనుమానాన్ని అలా పెంచుకుని పెంచుకుని అభం.. శుభం తెలియని పాప ప్రాణాలను తీసేశాడు. 

అనంతపురం జిల్లా మడకశిర ప్రాంతంలో శివ, రెడ్డెమ్మ నివసిస్తున్నారు. ఇద్దరూ కూలి పని చేసుకుంటూ ఉంటారు. వీరికి ఇద్దరు పిల్లలు ఉన్నారు. వీరిలో  బాబుకు నాలుగేళ్లు కాగా పాపకు రెండేళ్లు. అయితే బాబుతో పోలిస్తే పాప కాస్త నల్లగా ఉంటుంది. దీంతో శివ పాప పుట్టినప్పటి నుండి ఆ పాప తనకు పుట్టలేదని భార్యతో గొడవపడేవాడు. పాపను అసహ్యించుకునేవాడు. అప్పుడప్పుడూ హింసించేవాడు. దగ్గరకు తీసేవాడు కాదు. కానీ ముందు ముందు తెలుసుకుంటాడులే అని ఆ తల్లి అనుకునేది. 

అయితే రెండు రోజుల కిందట మద్యం మత్తులో ఇంటికి వచ్చిన శివ..భార్య రెడ్డెమ్మతో గొడవ పడ్డాడు. ఆ కోపాన్ని పాప అంజలిపై చూపాడు. ఎత్తి నేలకేసి గట్టిగా కొట్టడంతో తీవ్ర గాయాలయ్యాయి. అయినా పట్టించుకోకుండా నిద్రపోయాడు. ఆ తల్లే పాపను హిందూపురం ఆస్పత్రికి తీసుకెళ్లింది. సీరియస్‌గా ఉండటంతో అనంతపురం తీసుకెళ్లాలని సూచించారు. బిడ్డను తీసుకుని ఆమె హిందూపురం ఆస్పత్రికి వెళ్లింది. అయితే అక్కడ చికిత్స పొందుతూ ఆ  బిడ్డ చనిపోయింది. 

బిడ్డ చనిపోవడంతో పోస్ట్ మార్టం కోసం మార్చురీకి తరలించారు. అయితే ప్రాణంతో లేని బిడ్డను తీసుకెళ్లి అంత్యక్రియలు చేయని అశక్తతో .. మరో కారణమో కానీ ఆమె తల్లి మృతదేహాన్ని తీసుకోకుండానే వెళ్లిపోయింది. పాపను నేలకేసి కొట్టి చనిపోవడానికి కారణమైన తండ్రి అసలు అడ్రస్ లేడు. పోలీసు కేసు అవుతుందన్న ఉద్దేశంతో ఆ తల్లి కూడా పోయిన బిడ్డఎలాగూ తిరిగి రాదన్న కారణంతో వెళ్లిపోయిందని భావిస్తున్నారు. ఈ ఘటనపై పోలీసులు దర్యాప్తు చేస్తున్నారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి