Guntur Crime: ప్రియుడితో కలిసి భర్తను హత్య చేసిన భార్య... మృతదేహాన్ని కాలువలో పడేసి డ్రామా

గుంటూరు జిల్లా పొన్నూరులో ప్రియుడితో కలిసి భర్తను హత్య చేసిందో మహిళ. గుట్టుచప్పుడు కాకుండా భర్త మృతదేహాన్ని కాలువలో పడేశారు. కుటుంబ సభ్యుల ఫిర్యాదుతో అసలు విషయం బయటపడింది.

గుంటూరు జిల్లాలో భర్తను చంపిన భార్య(ప్రతీకాత్మక చిత్రం)

వివాహేతర సంబంధం... ఇటీవల తరచూ హత్య కేసుల్లో పోలీసులు చెబుతున్న ముఖ్య కారణం. వివాహేతర సంబంధంతో భార్యను చంపిన భర్త లేదా ప్రియుడితో కలిసి భర్తను హత్య చేసిన భార్య అన్న వార్తలు వింటుంటాం. అలాంటి ఘటనే గుంటూరు జిల్లాలో చోటుచేసుకుంది. గుంటూరు జిల్లా పొన్నూరు భావనగర్‌ కాలనీలో జలచిత్ర నాగరాజు అనే వ్యక్తి దారుణంగా హత్యకు గురయ్యాడు. ఈ హత్యపై దర్యాప్తు చేసిన పోలీసులకు నివ్వెరపోయే విషయాలు తెలిశాయి. నాగరాజును అతడి భార్య హత్య చేసింది. భర్తను చంపడానికి వెనుక కారణం వివాహేతర సంబంధం అని పోలీసులు తేల్చారు. ప్రియుడితో కలిసి భర్తను హతమార్చింది. రెండు రోజుల క్రితం జరిగిన ఈ ఘటన ఆలస్యంగా వెలుగుచూసింది. భర్తను హత్య చేసి మృతదేహాన్ని అప్పికట్ల కాలువలో పడేశారు. మృతదేహాన్ని పొన్నూరు అర్బన్‌ పోలీసులు వెలికితీయడంతో అసలు విషయం వెలుగులోకి వచ్చింది. 

ప్రియుడితో కలిసి హత్య

గుంటూరు జిల్లా తాడేపల్లికి చెందిన నాగరాజుకు షెమా సోనీతో ఎనిమిదేళ్ల క్రితం పెళ్లి జరిగింది. భార్యభర్తలు పొన్నూరులో ఇల్లు అద్దెకు తీసుకొని జీవిస్తున్నారు. షెమా సోనీకి అదే కాలనీకి చెందిన మరో వ్యక్తితో పరిచయం ఏర్పడింది. వీళ్లద్దరూ కలిసి నాగరాజును హత్యకు ప్లాన్ చేశారు. ఈ నెల 7న నాగరాజును ఇంట్లోనే హత్య చేసి బాపట్ల మండలం అప్పిగట్ల సమీపంలోని కాలువలో మృతదేహాన్ని పడేశారు. నాగరాజు కనిపించకపోయే సరికి కుటుంబ సభ్యులు పోలీసులకు ఫిర్యాదు చేశారు. ఈ ఫిర్యాదుపై విచారణ చేపట్టిన పోలీసులు అసలు విషయం రాబట్టారు. నాగరాజు భార్యను విచారించగా హత్య చేసినట్లు ఒప్పుకున్నారు. అనంతరం అప్పికట్ల కాలువలో గాలింపు చర్యలు చేపట్టారు. గురువారం నాగరాజు మృతదేహం లభ్యమైంది. పోస్టుమార్టం తర్వాత నాగరాజు మృతదేహాన్ని బంధువులకు అప్పగించారు. ఈ ఘటనపై దర్యాప్తు చేస్తున్నట్లు అర్బన్‌ సీఐ శరత్‌బాబు వెల్లడించారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి