Paytm Shares Crash: అతిపెద్ద క్రాష్‌..! పేటీఎం పతనంతో ఇన్వెస్టర్ల విలవిల..! ఎవరు ఎంత నష్టపోయారంటే?

ఇన్వెస్టర్లను పేటీఎం ఐపీవో కంటతడి పెట్టించింది. రిటైల్‌ మదుపర్లు దాదాపుగా రూ.600 కోట్ల వరకు నష్టపోయారు. ఐపీవో చరిత్రలోనే తొలిరోజు అతిపెద్ద క్రాష్‌ ఇదేనని అంటున్నారు.

paytm_listing

'భర్తలు తమ భార్యల సౌంధర్య సాధనాలకు ఖర్చు పెట్టిన సొమ్ముకు నైకా ఐపీవో ఐదు రెట్లు చెల్లించింది! పేటీఎం మాత్రం పదేళ్లలో ఇచ్చిన క్యాష్‌బ్యాక్‌ మొత్తం లాగేసుకుంది!'

- పేటీఎం లిస్టింగ్‌ తర్వాత సోషల్‌ మీడియాలో పేలుతున్న జోకులివీ!

దశాబ్దంలోనే అతిపెద్ద ఐపీవో. రూ.18,500 కోట్ల విలువైన ఇష్యూ. డిజిటల్‌ చెల్లింపుల్లో దేశంలోనే నంబర్‌వన్‌ కంపెనీ. చాలారోజులుగా ఎంతోమంది ఆసక్తితో ఎదురు చూసిన ఈ ఐపీవో చివరికి ఇన్వెస్టర్లకు చుక్కలు చూపించింది! ఒక్కరోజే 27 శాతం షేరు ధర నష్టపోవడంతో మదుపర్లు దాదాపుగా కంటతడి పెట్టుకున్నారు.

పేటీఎం ఒక్కో షేరు ధరను రూ.1250గా నిర్ణయించింది. గ్రే మార్కెట్లో ప్రీమియం పడిపోవడంతో ఐపీవో రోజు ఇన్వెస్టర్లు కాస్త ఇబ్బందిగానే ఫీలయ్యారు. వారు ఊహించినట్టుగానే గురువారం 9 శాతం డిస్కౌంట్‌తో రూ.1950 వద్ద షేరు నమోదైంది. అటు మార్కెట్లు పతనం అవుతుండటం, నెగెటివ్‌ సెంటిమెంటు ఉండటం, మదుపర్లు విక్రయాలకు దిగడంతో పేటీఎం షేరు ధర అమాంతం పడిపోవడం మొదలైంది. వందో, రెండొందలో కాదు.. ఏకంగా రూ.500కు పైగా పతనమైంది. చివరికి 1564 వద్ద ముగిసింది. దాదాపుగా మార్కెట్లో ఐపీవోల్లో ఇదే అతిపెద్ద క్రాష్‌! ఇన్వెస్టర్లు రూ.1000 కోట్లకు పైగా షేర్లను అమ్మేశారు.

ఈ భారీ పతనంలో చిన్న మదుపరి కుంగిపోయాడు! తొలిరోజు అందరూ నష్టాలనే చవిచూశారు. రూ.8235 కోట్ల విలువైన షేర్లు కొనుగోలు చేసిన యాంకర్‌ ఇన్వెస్టర్లు అందరికన్నా ఎక్కువగా రూ.2,444 కోట్లు నష్టపోయారు. క్వాలిఫైడ్‌ ఇన్‌స్టిట్యూషనల్‌ ఇన్వెస్టర్లు (QIIs) రూ.7,375 కోట్లలో రూ.2,010 కోట్లు, రూ.2,081 కోట్లు పెట్టిన రిటైల్‌ ఇన్వెస్టర్లు రూ.567 కోట్లు, హై నెట్‌వర్త్‌ ఇండివిజ్యువల్స్‌ రూ.608 కోట్లకు రూ.166 కోట్లు నష్టపోయారు. అంటే రిటైల్‌, హెచ్‌ఎన్‌ఐలు తొలిరోజు రూ.733 కోట్ల వరకు తమ డబ్బును కోల్పోయారు.

మదుపర్లు ఇంతగా నష్టపోతే పేటీఎం ఫౌండర్‌ విజయ్‌ శేఖర్‌ మాత్రం ఇన్వెస్టర్లకు తమ బిజినెస్‌ మోడల్‌ అర్థం కాలేదని అంటున్నారు!

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి