Kia EV6 Lease: రూ.65 లక్షలు విలువ చేసే కారుని కేవలం లక్షా 29 వేలకే ఇంటికి తీసుకువెళ్లండి, ప్రాసెస్‌ ఇదే!

Kia EV6:కియా ఈవీ6 మోడల్‌ని లీజు విధానంలో అందుబాటులో తీసుకువస్తున్నట్లు ఆ సంస్థ ప్రకటించింది. ఈ కారుని కేవలం నెలకు 1.29 లక్షలు చెల్లించడం ద్వారా లీజ్‌కి తీసుకోవచ్చని తెలిపింది.

EV6 కారు

Source : twitter

Kia EV6 Price: దేశవ్యాప్తంగా కియా మోటార్స్ కార్లను సేల్‌ చేయడమే కాకుండా లీజు ప్రాతిపదికన కార్లను అందిస్తుంది. ఈ సదుపాయం వల్ల కమర్షియల్‌ లేదా ఇతర రెంటల్‌ కార్ల కోసం చూసేవారికి కలిసి రానుంది. ఏదైనా బిజినెస్‌ లేదా సొంత అవసరాల కోసం కార్లను కొనుగోలు చేయాల్సి వస్తే ఈ విధానం లాభదాయకంగా ఉంటుంది. ఆయా కంపెనీలు అందించే లీజింగ్‌ విధానంతో నెలవారీ వాయిదాలు చెల్లించడం ద్వారా సొంత కారులా వాడుకోవచ్చు. ప్రస్తుతం కంపెనీ కియా సోనెట్, కియా సెల్టోస్ మరియు కియా కేరన్స్ మోడళ్లను లీజ్‌ కింద అందుబాటులో ఉంచింది.

లీజుకు EV6

కియా నుంచి విక్రయానికి అందుబాటులో ఉన్న హై-ఎండ్ వేరియంట్‌ కియా EV6 (Kia EV6) మోడల్‌ని కూడా లీజు విధానం కింద అందుబాటులో తీసుకువస్తున్నట్లు ఆ సంస్థ ప్రకటించింది. ఈ కారు ఎక్స్-షోరూమ్ ధర సుమారు 64.11 నుంచి రూ. 69.39 లక్షలు మధ్య ఉంది. అయితే దీన్ని కేవలం నెలకు 1.29 లక్షలు చెల్లించడం ద్వారా లీజ్‌కి తీసుకోవచ్చని తెలిపింది. దీంతో భారీ ఖరీదైన ఈ కారుని తక్కువ ధరకే మీరు ఇంటికి తీసుకెళ్లవచ్చు అన్నమాట.

బ్రాండ్ అలవాటు చేసేలా

ఆటోమొబైల్ కంపెనీలు ఇప్పుడు వినియోగదారులకు నేరుగా విక్రయించే బదులు లీజు ప్రాతిపదికన వాహనాలను విక్రయిస్తున్నాయి. తయారీదారులకు నెలవారీ అద్దె చెల్లింపుల ద్వారా ప్రయోజనం లభించడంతో పాటు.. ఎక్కువ మంది కస్టమర్‌లకు తమ బ్రాండ్‌ కారు సేవలను మరింత అందుబాటులోకి తెచ్చినట్లు అవుతుంది. ప్రస్తుతం మార్కెట్‌లో కార్ల బ్రోకరేజీలు ప్రస్తుతం ఈ సేవలను అందిస్తున్నాయి. ఇప్పుడు కారు కంపెనీలు సైతం ఈ బిజినెస్‌లోకి రంగ ప్రవేశం చేస్తున్నాయి.

17,999 నుంచి మొదలు

సరిగ్గా రెండు నెలల క్రితం కియా తన వాహనాలకు లీజింగ్ విధానాన్ని ప్రవేశపెట్టింది. ఆ కంపెనీ నుంచి అందుబాటులో ఉన్న కియా సోనెట్‌ కోసం నెలవారీ లీజు కోసం రూ.17,999, కియా సెల్టోస్ కోసం రూ. 23,999, కియా కేరన్స్ కోసం రూ. 24,999 నెల వారి అద్దె (Rent) చెల్లిస్తే సరిపోతుంది. ఇప్పుడు, ఖరీదైన EV6 కేవలం నెలకు రూ. 1.29 లక్షల లీజ్‌కి అందుబాటులోకి వచ్చింది.

లీజ్‌ వల్ల ప్రయోజనాలు
లీజ్‌ తీసుకోవడం వల్ల కేవలం మీరు పూర్తి అమౌంట్‌ చెల్లిస్తే సరిపోతుంది. ఉదాహరణకు  ఇన్సూరెన్స్‌, పికప్ మరియు డ్రాప్ సేవలు, 24-గంటల రోడ్‌ అసిస్టన్స్‌, కియా నుంచి ఉచిత సర్వీసింగ్‌ కవరేజ్‌ లభిస్తుంది. కారును లీజుకు తీసుకునే కస్టమర్లు ఎలాంటి అదనపు ఖర్చులు లేకుండా లీజ్‌కి తీసుకోవచ్చు. ఈ లీజింగ్ అనేది కొందరి వ్యక్తులకు మాత్రమే అందుబాటులో ఉంటుంది. నాలుగు విభాగాల్లోని వారు మాత్రమే ఈ వాహనాన్ని కొనుగోలు చేయగలరు. అందులో మెడికల్ కౌన్సిల్ ఆఫ్ ఇండియా (MCI)లో రిజిస్టర్ అయిన వైద్యులు, ICAIలో నమోదు చేసుకున్న చార్టర్డ్ అకౌంటెంట్లు, సొంత వ్యాపారం కలిగి ఉన్న యజమానులు, కొన్ని కార్పొరేట్ కంపెనీలకు చెందిన ఉద్యోగులు ఈ కార్లను లీజ్‌కి తీసుకోవచ్చు.

EV6 స్పెసిఫికేషన్‌లు
ఇక కియా EV6 77.4 kWh బ్యాటరీ ప్యాక్‌తో 225.86 bhp నుంచి 320.55 bhp మధ్య పవర్ అవుట్‌పుట్ ఉత్పత్తి చేస్తుంది. కారుని AC ఛార్జర్‌తో కేవలం 18 నిమిషాల్లో ఫుల్‌ 10-80% ఛార్జ్ చేయవచ్చు. ఇక కారుతో అందిచే DC ఛార్జర్‌తో 0-80% ఛార్జ్ చేయవచ్చు. ఈ కారు గంటకు 192 కి.మీ వేగంతో ప్రయాణించగలదు. పూర్తి ఛార్జ్‌పై ఇది 708 కిలోమీటర్ల వరకు ప్రయాణించగలదు. ఇక కేవలం 5.2 సెకన్లలో ఈ కారు 0 నుండి 100 కి.మీ వేగాన్ని అందుకుంటుంది.