హోండా ఎలివేట్ ఫేస్‌లిఫ్ట్ రివ్యూ: మోడ్రన్‌ ఫీచర్లు ఉన్న ఈ కారు డ్రైవింగ్ ఎక్స్‌పీరియన్స్‌ ఎలా ఉంది?
హోండా ఎలివేట్ ఫేస్‌లిఫ్ట్ రివ్యూలో డ్రైవింగ్ పనితీరు, ఇంజిన్, మైలేజీ, కొత్త ఫీచర్లు, భద్రత, ధర, ప్రయోజనాలు, లోపాలు & కొనుగోలు చేయాలా అనే వివరాలు తెలుసుకోండి.
Honda Elevate facelift review: కొత్త ఎస్‌యూవీ కొనాలని చూస్తున్నవారి కోసం కొత్తగా యాడ్ అయిన ఆప్షన్‌.. హోండా ఎలివేట్ ఫేస్‌లిఫ్ట్. ఇప్పటికే మార్కెట్లో ఉన్న ఈ మిడ్‌సైజ్‌ ఎస్‌యూవీకి హోండా కొన్ని కీలక మార్పులు చేసింది. కొత్త లుక్‌, మెరుగైన క్యాబిన్, అదనపు భద్రత సదుపాయాలతో కస్టమర్లను ఆకట్టుకునే ప్రయత్నం చేసింది. ముఖ్యంగా.. ముందు, వెనుక సీట్లకు వెంటిలేషన్ సదుపాయం ఇవ్వడం ప్రత్యేక ఆకర్షణగా నిలుస్తోంది. అయితే, నిజమైన రోడ్డుపై దీని పనితీరు ఎలా ఉంది? మైలేజీ, సౌకర్యం, ఫీచర్ల విషయంలో ప్రత్యర్థి కార్లతో పోటీపడగలదా? రివ్యూ రిపోర్ట్‌ ఇదిగో.
కొత్త రూపంలో హోండా ఎలివేట్
ఎలివేట్ ఫేస్‌లిఫ్ట్‌లో బయటికి కనిపించే మార్పులు ప్రధానంగా ముందు భాగంలో ఉన్నాయి. కొత్త మెరిసే బ్లాక్‌ కలర్‌ గ్రిల్, సెగ్మెంటెడ్‌ LED లైట్ బార్, మారిన బంపర్ డిజైన్ వంటివి కారుకు కొత్త లుక్‌ ఇచ్చాయి. గ్రిల్‌పై ఉన్న హోండా లోగోను బానెట్ ముందు భాగానికి మార్చారు. వెనుకవైపు టెయిల్ ల్యాంపులను కలుపుతూ కొత్త LED లైట్ బార్‌ను ఇచ్చారు.
కారు పక్క భాగంలో నలుపు రంగు బాడీ క్లాడింగ్, కొత్త అలంకరణలు కనిపిస్తాయి. 17 అంగుళాల అల్లాయ్ వీల్స్ డిజైన్ మాత్రం యథాతథంగా ఉంది. నార్డిక్ ఫారెస్ట్ పెర్ల్ అనే కొత్త రంగు కూడా అందుబాటులోకి వచ్చింది. మొత్తంగా చూస్తే, భారీ మార్పుల కంటే పాత రూపానికి ఆధునిక హంగులు జోడించినట్లు కనిపిస్తుంది.
క్యాబిన్‌లో సౌకర్యం పెరిగింది
కారు లోపల మాత్రం కొన్ని ముఖ్యమైన మార్పులు చేశారు. ఐవరీ, బ్లాక్‌ కలర్స్‌ కలయికతో కొత్త సీటింగ్ థీమ్‌ను అందించారు. డ్యాష్‌బోర్డుపై ఉన్న పాత చెక్క తరహా అలంకరణ స్థానంలో లెదరెట్ ప్యాడింగ్, స్టిచింగ్‌ను ఇచ్చారు. ఏసీ కంట్రోల్‌ బటన్లలోనూ మార్పులు చేశారు.
డ్రైవర్ సీటుకు 8 విధాలుగా, ముందు ప్రయాణికుడి సీటుకు 4 విధాలుగా ఎలక్ట్రానిక్‌గా సర్దుబాటు చేసుకునే సదుపాయం ఉంది. ముందు సీట్ల వెంటిలేషన్‌తో పాటు వెనుక సీట్లకూ ఈ సదుపాయం కల్పించడం విశేషం. అయితే వెనుక సీట్ల వెంటిలేషన్ అత్యున్నత ZX+ వేరియంట్‌లో మాత్రమే లభిస్తుంది.
వెనుక సీటులో ఇద్దరు పెద్దవాళ్లు సౌకర్యంగా కూర్చోవచ్చు. కాళ్లకు, తలకు తగినంత స్థలం ఉంది. కానీ మధ్యలో మూడో వ్యక్తి కూర్చుంటే కొంత ఇరుకుగా అనిపించవచ్చు. 458 లీటర్ల బూట్ స్పేస్ కుటుంబ ప్రయాణాలకు ఉపయోగపడుతుంది. అదనంగా, వెనుక ప్రయాణికుల కోసం ఏసీ వెంట్లు, యూఎస్‌బీ ఛార్జింగ్ పోర్టులు, కప్ హోల్డర్లతో కూడిన ఆర్మ్‌రెస్ట్ ఉన్నాయి.
ఇది కూడా చదవండి: మారుతి బలెనోకు పోటీగా 2026 టయోటా గ్లాంజా ఫేస్‌లిఫ్ట్.. కొత్త ఇంజిన్‌తో మైలేజీ పెరుగుతుందా?
భద్రత, ఫీచర్లలో మెరుగుదల
కొత్త ఎలివేట్‌లో 360 డిగ్రీల కెమెరా, ముందు పార్కింగ్ సెన్సార్లు అదనంగా వచ్చాయి. అయితే కెమెరా స్క్రీన్‌ సైజ్‌ చిన్నగా ఉండటం, వ్యూ యాంగిల్స్‌ పరిమితంగా ఉండటం లోపాలుగా కనిపిస్తున్నాయి. CVT వేరియంట్లలో ఎలక్ట్రానిక్ పార్కింగ్ బ్రేక్, ఆటో హోల్డ్, వెనుక డిస్క్ బ్రేకులు కూడా ఉన్నాయి.
అడాప్టివ్ క్రూయిజ్ కంట్రోల్‌లో తక్కువ వేగంతో ముందు వాహనాన్ని అనుసరించే సదుపాయాన్ని జోడించారు. ట్రాఫిక్‌లో ప్రయాణించేటప్పుడు ఇది ఉపయోగపడుతుంది. 10.25 అంగుళాల టచ్‌స్క్రీన్, వైర్‌లెస్ స్మార్ట్ఫోన్ అనుసంధానం, వైర్‌లెస్ ఛార్జర్, సింగిల్ పేన్ సన్‌రూఫ్, ఆరు ఎయిర్‌బ్యాగులు, స్థిరత్వ నియంత్రణ వ్యవస్థ, గాలి నాణ్యతను మెరుగుపరిచే PM2.5 ఎయిర్ ప్యూరిఫైయర్ వంటి ఫీచర్లు ఉన్నాయి.
పనితీరులో కీలక మార్పుల్లేవు
హోండా ఎలివేట్ ఫేస్‌లిఫ్ట్‌లో ఇంజిన్ మారలేదు. ఇందులో 1.5 లీటర్ నాలుగు సిలిండర్ల సహజ పెట్రోల్ ఇంజిన్ ఉంది. ఇది 121hp శక్తిని, 145Nm టార్క్‌ను ఉత్పత్తి చేస్తుంది. 6-స్పీడ్‌ మాన్యువల్, 7-స్టెప్‌ CVT ఆటోమేటిక్ గేర్‌బాక్స్ ఎంపికలు కొనసాగుతున్నాయి.
ఈ ఇంజిన్ స్పందన బాగుంది. యాక్సిలరేటర్ నొక్కగానే వేగంగా స్పందిస్తుంది. తక్కువ వేగం నుంచి అధిక rpm వరకు సాఫీగా పనిచేస్తుంది. ముఖ్యంగా అధిక ఇంజిన్ వేగం వద్ద మరింత ఉత్సాహంగా అనిపిస్తుంది.
CVT ఆటోమేటిక్ గేర్‌బాక్స్ నగర ప్రయాణాల్లో సౌకర్యంగా పనిచేస్తుంది. అయితే, వేగంగా వెళ్లేందుకు ఒక్కసారిగా యాక్సిలరేటర్ నొక్కితే ఇంజిన్ ఎక్కువసేపు అధిక వేగంతో తిరుగుతోంది. దీంతో శబ్దం పెరిగి ప్రయాణం కొంత అసౌకర్యంగా అనిపించవచ్చు. మాన్యువల్ వేరియంట్ గంటకు 100 కిలోమీటర్ల వేగాన్ని 10.82 సెకన్లలో అందుకోగా, పాత సీవీటీ మోడల్‌కు 11.89 సెకన్లు పట్టాయి.
ఇది కూడా చదవండి: 39hp పవర్‌తో కవాసాకి కొత్త బైక్‌ Kawasaki Z300.. రూ.3 లక్షల లోపే! ఇందులో ప్రత్యేకతలు ఏంటంటే?
రోడ్డుపై ప్రయాణం ఎలా ఉంది?
డ్రైవింగ్ సౌకర్యం విషయంలో ఎలివేట్ బలంగా నిలుస్తుంది. ఎత్తైన ఎస్‌యూవీ అయినప్పటికీ రోడ్డుపై స్థిరంగా ప్రయాణిస్తుంది. సస్పెన్షన్ కొంత గట్టిగా ఉన్నా గుంతలు, రోడ్డు ఎగుడుదిగుళ్ల ప్రభావాన్ని బాగానే తగ్గిస్తుంది. మలుపుల్లో కారు ఎక్కువగా ఒరిగిపోకుండా (బాడీ రోల్‌) నియంత్రణలో ఉంటుంది. తక్కువ వేగంలో స్టీరింగ్ తేలికగా ఉండటం వల్ల నగర రోడ్లపై నడపడం సులభం. వేగం పెరిగే కొద్దీ స్టీరింగ్ బరువు పెరిగి మంచి నియంత్రణను ఇస్తుంది.
అయితే హైవేపై అధిక వేగంతో ప్రయాణించేటప్పుడు వెనుక సీట్లలో కొంత పైకి కిందికి కదలిక కనిపించాయి. ఇంజిన్, రోడ్డు శబ్దాలను తగ్గించేందుకు హోండా ప్రయత్నించినప్పటికీ, ముఖ్యంగా హైవేలపై అవి క్యాబిన్‌లోకి వస్తూనే ఉంటాయి.
మైలేజీ ఎలా ఉంది?
కొత్త మోడల్‌కు సంబంధించిన వాస్తవ మైలేజీ పరీక్షలను ఈ టెస్ట్‌లో నిర్వహించలేదు. పాత ఎలివేట్ సీవీటీ మోడల్ నగరంలో లీటరుకు 8.60 కిలోమీటర్లు, హైవేపై 13.10 కిలోమీటర్ల మైలేజీ ఇచ్చింది. మాన్యువల్ మోడల్ నగరంలో 8.7 కిలోమీటర్లు, హైవేపై 13.30 కిలోమీటర్లు ఇచ్చింది. ఇవి పాత మోడల్ పరీక్షల ఫలితాలు మాత్రమే. వీటి ఆధారంగా కొత్త మోడల్ మైలేజీని అధికారికంగా నిర్ధారించలేము.
ధర ఎంత? కొనవచ్చా?
హోండా ఎలివేట్ ఫేస్‌లిఫ్ట్ ధర ఎక్స్‌షోరూమ్‌లో రూ.11.80 లక్షల నుంచి రూ.18.40 లక్షల వరకు ఉంది. ధరకు తగ్గ ఫీచర్లు, విశాలమైన క్యాబిన్, సౌకర్యవంతమైన డ్రైవింగ్ అనుభవం దీని ప్రధాన బలాలు.
డీజిల్, టర్బో పెట్రోల్, హైబ్రిడ్ వంటి ఇంజిన్ ఎంపికలు లేకపోవడం ప్రధాన లోపం. మైలేజీకి ఎక్కువ ప్రాధాన్యం ఇచ్చేవారికి ఇతర ప్రత్యామ్నాయాలను కూడా పరిశీలించడం మంచిది. పనితీరు, సౌకర్యం, రోజువారీ వినియోగం, హోండా బ్రాండ్‌పై నమ్మకానికి ప్రాధాన్యం ఇచ్చేవారికి ఈ ఎస్‌యూవీ మంచి ఎంపిక కావచ్చు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
