39hp పవర్‌తో కవాసాకి కొత్త బైక్ Kawasaki Z300.. రూ.3 లక్షల లోపే! ఇందులో ప్రత్యేకతలు ఏంటంటే?
కవాసాకి Z300 బైక్ ఆవిష్కరణ, 296 సీసీ ఇంజిన్, 39 హెచ్‌పీ శక్తి, టీఎఫ్‌టీ తెర, బుకింగ్స్ తేదీ, అంచనా ధర & కేటీఎం 390 డ్యూక్‌తో పోటీ వివరాలు తెలుసుకోండి.
Kawasaki Z300 Revealed: కవాసాకి నుంచి కొత్త బైక్ వచ్చేస్తోంది. యువతను ఆకట్టుకునేలా రూపొందించిన Z300 స్ట్రీట్ నేకెడ్ బైక్‌ను కంపెనీ ఆవిష్కరించింది. నింజా 300 ఆధారంగా రూపొందించిన ఈ కొత్త మోటార్‌సైకిల్.. కవాసాకి Z సిరీస్‌లో ప్రారంభ స్థాయి మోడల్‌గా నిలవనుంది. పెద్ద బైక్‌లా కనిపించే రూపం, పవర్ఫుల్ ఇంజిన్, మోడ్రన్‌ టెక్నాలజీతో ఈ బైక్‌పై అంచనాలు పెరుగుతున్నాయి. దీని ధర ఎంత ఉండబోతోందన్నది ఇప్పుడు ఆసక్తికరంగా మారింది.
కవాసాకి Z300 డిజైన్ ఎలా ఉంది?
బెంగళూరులో జరిగిన కార్యక్రమంలో కవాసాకి Z300ను ప్రదర్శించింది. ఈ బైక్ రూపకల్పనలో పెద్దదైన Z900 ప్రభావం స్పష్టంగా కనిపిస్తోంది. స్పోర్టీ లుక్‌తో పాటు వీధుల్లో సులభంగా నడిపేందుకు అనువైన ఆకృతిని కంపెనీ అందించింది. నేకెడ్ బైక్ కావడంతో ఇందులో ముందు భాగం మినహా పూర్తి ఫెయిరింగ్ బాడీవర్క్ ఉండదు. దీనివల్ల బైక్‌కు ప్రత్యేకమైన స్ట్రీట్ ఫైటర్ రూపం వచ్చింది.
ఈ బైక్‌లో వెడల్పైన, నిటారుగా ఉండే ఒకే హ్యాండిల్‌బార్‌ను ఇచ్చారు. దీనివల్ల రైడర్ కూర్చునే భంగిమ సౌకర్యవంతంగా ఉంటుంది. రోజువారీ ప్రయాణాలతో పాటు నగర రోడ్లపై బైక్ నడిపేవారికి ఈ తరహా డిజైన్ ఉపయోగపడుతుంది. ఆకుపచ్చ, నలుపు రంగుల్లో Z300 అందుబాటులోకి రానుంది.
296 సీసీ ఇంజిన్.. 39 హెచ్‌పీ శక్తి
కవాసాకి Z300లో 296 సీసీ లిక్విడ్‌ కూల్డ్‌ సదుపాయం ఉన్న ప్యార్లల్‌ ట్విన్ ఇంజిన్‌ను అమర్చారు. ఇదే ఇంజిన్‌ను Ninja 300లోనూ ఉపయోగిస్తున్నారు. ఈ ఇంజిన్ గరిష్ఠంగా 39 హెచ్‌పీ శక్తిని, 26.1 ఎన్ఎం టార్క్‌ను ఉత్పత్తి చేస్తుంది. దీనికి ఆరు గేర్ల గేర్‌బాక్స్‌ను జత చేశారు.
ఇంజిన్ విషయంలో నింజా 300తో పోలికలు ఉన్నప్పటికీ, Z300లో రైడింగ్ అనుభవం భిన్నంగా ఉండనుంది. నిటారుగా కూర్చునే భంగిమ, వెడల్పైన హ్యాండిల్‌బార్ కారణంగా నగర ప్రయాణాలకు ఇది అనుకూలంగా ఉండే అవకాశం ఉంది.
ఇది కూడా చదవండి: Small Hybrid Cars: ఇక చిన్న కార్లలోనూ హైబ్రిడ్ టెక్నాలజీ.. దాని వల్ల మైలేజ్ పెరుగుతుందా ?
TFT స్క్రీన్‌తో మోడ్రన్‌ ఫీచర్లు
కొత్త Z300లో మరో ప్రధాన ఆకర్షణ దాని స్క్రీన్‌. నింజా 300లో ఉండే సెమీ డిజిటల్ మీటర్‌కు బదులుగా ఇందులో టీఎఫ్‌టీ ఇన్‌స్ట్రుమెంట్ క్లస్టర్‌ను అందించారు. ఇందులో స్మార్ట్‌ఫోన్‌ను కనెక్ట్‌ చేసుకునే ఫెసిలిటీ సహా చాలా ఆధునిక ఫీచర్లు ఉండనున్నాయి. అయితే, పూర్తి ఫీచర్ల వివరాలను కంపెనీ అధికారికంగా వెల్లడించాల్సి ఉంది.
అక్టోబర్ 19 నుంచి బుకింగ్స్
బెంగళూరులో తొలి ప్రదర్శన తర్వాత అక్టోబర్ 18న ముంబై, పుణెలోనూ ఈ బైక్‌ను ప్రదర్శించనున్నారు. అక్టోబర్ 19 నుంచి బుకింగ్స్ ప్రారంభం కానున్నాయి. సాంకేతిక వివరాలు, వేరియంట్లు, ధరను అక్టోబర్ 20న కవాసాకి అధికారిక వెబ్‌సైట్‌లో వెల్లడించనుంది.
ధర ఎంత ఉండొచ్చు?
ప్రస్తుతం కవాసాకి నింజా 300 ఎక్స్‌షోరూమ్ ధర రూ.3.34 లక్షలు. ఈ నేపథ్యంలో Z300 ధరపై ఆసక్తి నెలకొంది. కొత్త బైక్‌లో ఫెయిరింగ్ బాడీవర్క్ తక్కువగా ఉన్నప్పటికీ, ఆధునిక ఎలక్ట్రానిక్ సదుపాయాలు ఉన్నాయి. అందువల్ల ధరను కంపెనీ ఎలా నిర్ణయిస్తుందన్నది కీలకం.
ఇది కూడా చదవండి: రోజూ ఆఫీసుకు వెళ్లడానికి ఏ Two Wheeler బెస్ట్.. బైక్, స్కూటీనా లేదా ఈవీనా?
Z300 ధర రూ.3 లక్షల లోపు ఉండొచ్చని మార్కెట్‌ వర్గాల అంచనా. ఇదే జరిగితే మార్కెట్లో పోటీ పెరిగే అవకాశం ఉంది. ముఖ్యంగా KTM 390 Duke, TVS Apache RTR 310 వంటి బైక్‌లతో పోలికలు మొదలవుతాయి. ధర, పూర్తి ఫీచర్లు అధికారికంగా వెల్లడైన తర్వాతే Z300 మార్కెట్లో ఎంతవరకు ప్రభావం చూపుతుందో స్పష్టమవుతుంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
