Malla Vijay Prasad Arrested: వైసీపీ నేత, మాజీ ఎమ్మెల్యే మళ్ల విజయప్రసాద్ అరెస్ట్... చిట్ ఫండ్ కేసులో అరెస్టు చేసిన ఒడిశా సీఐడీ పోలీసులు

మాజీ ఎమ్మెల్యే, ఏపీ ఎడ్యుకేషన్‌ వెల్ఫేర్‌ డెవల్‌పమెంట్‌ కార్పొరేషన్‌ ఛైర్మన్‌ మళ్ల విజయప్రసాద్ ను ఒడిశా పోలీసులు అరెస్ట్ చేశారు. ఆయనపై చిట్ ఫండ్ వ్యాపారానికి సంబంధించి ఒడిశాలో కేసు నమోదయ్యింది.

మాజీ ఎమ్మెల్యే మళ్ల విజయ ప్రసాద్(ఫైల్ ఫొటో)

మాజీ ఎమ్మెల్యే, వైకాపా నేత మళ్ల విజయప్రసాద్‌ను ఒడిశా పోలీసులు అదుపులోకి తీసుకున్నారు. ఆర్థిక నేరాలకు సంబంధించి 2019లో మళ్ల విజయప్రసాద్‌పై ఒడిశాలో కేసు నమోదైంది. ఈ  కేసు విచారణలో భాగంగా మళ్ల విజయప్రసాద్‌ను ఒడిశా సీఐడీ, నేరవిభాగం పోలీసులు అదుపులోకి తీసుకున్నారు. కేజీహెచ్‌లో వైద్య పరీక్షలు నిర్వహించిన అనంతరం మళ్ల విజయప్రసాద్‌ను విశాఖ మేజిస్ట్రేట్‌ ఎదుట హాజరుపరిచారు. మేజిస్ట్రేట్‌ అనుమతితో విజయప్రసాద్‌ను ఒడిశా తీసుకెళ్లారు.  కాగా ఆయన ప్రస్తుతం రాష్ట్ర విద్యారంగ మౌలిక వసతుల అభివృద్ధి సంస్థ ఛైర్మన్‌గా ఉన్నారు. 

ఒడిశాలో చిట్ ఫండ్ సంస్థ

మాజీ ఎమ్మెల్యే, ఏపీ ఎడ్యుకేషన్‌ వెల్ఫేర్‌ డెవల్‌పమెంట్‌ కార్పొరేషన్‌ ఛైర్మన్‌ మళ్ల విజయప్రసాద్ అరెస్ట్ అయ్యారు. చిట్‌ఫండ్‌ కేసులో ఆయన్ని ఒడిశా సీఐడీ పోలీసులు సోమవారం అరెస్టు చేశారు. వెల్ఫేర్‌ సంస్థ పేరుతో మళ్ల విజయ ప్రసాద్ రియల్‌ ఎస్టేట్‌, చిట్‌ఫండ్‌ వ్యాపారం చేస్తున్నారు. ఆంధ్రప్రదేశ్ తో పాటు పలు రాష్ట్రాల్లో వీటి బ్రాంచీలు నిర్వహిస్తున్నారు. దీనిలో భాగంగా ఒడిశాలోనూ చిట్‌ఫండ్‌ వ్యాపారం నిర్వహించారు. అక్కడ డిపాజిట్‌దారులకు సక్రమంగా చెల్లింపులు జరపకపోవడంతో వారు పోలీసులకు ఫిర్యాదు చేశారు. 

రెండేళ్ల క్రితమే కేసు

ఈ ఫిర్యాదులపై ఒడిశా సీఐడీ పోలీసులు రెండేళ్ల కిందటే కేసు నమోదు చేశారు. ఈ కేసు విచారణలో భాగంగా సీఐడీ పోలీసులు సోమవారం విశాఖ వచ్చారు. మళ్ల విజయ ప్రసాద్‌ను స్థానిక అధికారుల అనుమతితో ఒడిశా సీఐడీ పోలీసులు అదుపులోకి తీసుకున్నారు. విచారణ నిమిత్తం అదుపులోకి తీసుకున్నట్లు స్థానిక పోలీసులకు సమాచారం అందించారు. ఈ కేసుకు సంబంధించిన పూర్తి వివరాలు ఇంకా తెలియాల్సి ఉంది.