ఆ ముగ్గురు సంగతి తేల్చేస్తారా? నెల్లూరు టూర్‌లో చంద్రబాబు ప్లాన్ ఏంటీ?

సార్వత్రిక ఎన్నికలకోసం టీడీపీ శ్రేణుల్ని సిద్ధం చేస్తున్న చంద్రబాబు.. జోన్ల వారీగా ప్రాంతీయ సదస్సులు పెడుతున్నారు. తాజాగా ఆయన నెల్లూరుకు వస్తున్నారు.

నేడు నెల్లూరులో చంద్రబాబు పర్యటన

ఏ జిల్లా అయితే వైసీపీకి పెట్టనికోట అనుకున్నారో.. ఏ జిల్లాలో టీడీపీ తరపున పోటీ చేసిన మహామహులు మట్టికరిచారో.. ఇప్పుడు అదే జిల్లా టీడీపీకి బలంగా మారుతోంది. ఏకంగా ముగ్గురు వైసీపీ ఎమ్మెల్యేలు ఆ పార్టీకి దూరమై, టీడీపీకి దగ్గరవుతున్నారు. టీడీపీలో చేరతారా, వారికి టికెట్ ఇస్తారా, వారు గెలుస్తారా అనే విషయం పక్కనపెడితే.. నెల్లూరు జిల్లాలో టీడీపీ బలం పెరిగింది, వైసీపీ బలం తగ్గింది అనే ప్రచారం మాత్రం జోరుగా సాగుతోంది. ఈ సమయంలో చంద్రబాబు నెల్లూరుకు వస్తున్నారు. జోన్-4 సమావేశంలో ఆయన పాల్గొంటారు. దీనికోసం ఏర్పాట్లు పూర్తయ్యాయి. 

సార్వత్రిక ఎన్నికలకోసం టీడీపీ శ్రేణుల్ని సిద్ధం చేస్తున్న చంద్రబాబు.. జోన్ల వారీగా ప్రాంతీయ సదస్సులు పెడుతున్నారు. తాజాగా ఆయన నెల్లూరుకు వస్తున్నారు. ఈరోజు నెల్లూరులో జోన్-4 సమావేశం జరుగుతుంది. పట్టభద్రుల ఎమ్మెల్సీ ఎన్నికల్లో విజయం సాధించిన తర్వాత చంద్రబాబు తొలిసారి జిల్లాకు వస్తుండటంతో.. నాయకులు, శ్రేణులు ఘన స్వాగతం పలికేందుకు ఏర్పాట్లు చేశారు. 

మీటింగ్ ఎక్కడ..?

నెల్లూరులో నేషనల్ హైవే సమీపంలో ఉన్న వేణుగోపాలస్వామి కాలేజీ గ్రౌండ్ లో జోన్-4 సదస్సుకు సంబంధించిన ఏర్పాట్లు పూర్తయ్యాయి. జోన్‌-4 పరిధిలోని ఒంగోలు, నెల్లూరు, చిత్తూరు, తిరుపతి, రాజంపేట పార్లమెంట్‌ నియోజకవర్గాల్లోని 35 అసెంబ్లీ నియోజకవర్గాల నుంచి నాయకులు ఈ కార్యక్రమానికి హాజరవుతారు. నెల్లూరు జిల్లా నాయకులు ఏర్పాట్లు పూర్తి చేశారు. ఆరు జిల్లాల పరిధిలోని నియోజకవర్గ ఇన్ చార్జ్ లు, ఎమ్మెల్యేలు, మాజీ ఎమ్మెల్యేలు, ఎమ్మెల్సీలు, ఎంపీలు, మాజీ ఎంపీలు.. ఇందులో పాల్గొంటారు. 

2500మందితో భారీ కార్యక్రమం..
కీలక నేతలంతా కలసి 2,500 మంది వరకు ఈ కార్యక్రమంలో పాల్గొనే అవకాశం ఉంది. పార్టీ అధినేత చంద్రబాబునాయుడు సదస్సులో పార్టీ శ్రేణులకు దిశా నిర్దేశం చేస్తారని తెలుస్తోంది. 

కార్యక్రమం షెడ్యూల్‌.. 
ఉదయం 10 గంటలకు పార్టీ రాష్ట్ర అధ్యక్షుడు అచ్చెన్నాయుడు, జోనల్‌ అధ్యక్షుల ప్రసంగాలుంటాయి. టెలిగ్రామ్‌ బాట్‌ ద్వారా సభ్యత్వ నమోదుపై శిక్షణ ఇస్తారు. ఆర్టీఎస్‌, ఓటరు పరిశీలన, కుటుంబ సాధికార సారధి నియామక ప్రక్రియపైన అవగాహన కల్పిస్తారు. న్యూట్రిఫుల్‌ యాప్‌, సోషల్ మీడియా, వాట్సప్‌ గ్రూపులపై అవగాహన కార్యక్రమం ఉంటుంది. అక్రమ అరెస్టులు, కేసుల్ని ఎలా ఎదుర్కోవాలనేదానిపై శిక్షణ ఇస్తారు. మధ్యాహ్నం 2.40 గంటల నుంచి ఇదేం ఖర్మ మన రాష్ట్రానికి అంశంపై జోనల్‌, పార్లమెంట్‌ వారీగా సమీక్షలు ఉంటాయి. చంద్రబాబు ఉండవల్లినుంచి రోడ్డు మార్గం ద్వారా నెల్లూరుకు వస్తారు. మధ్యాహ్నం 2 గంటలకు ఆయన సదస్సు ప్రాంతానికి చేరుకుంటారని అంచనా. సాయంత్రం ప్రసంగం అనంతరం ఆయన తిరిగి ఉండవల్లి బయలుదేరుతారు. 

జిల్లాలో వైసీపీ సస్పెండ్ చేసిన ముగ్గురు ఎమ్మెల్యేలు చంద్రబాబుతో భేటీ అయ్యే అవకాశాలున్నట్టు తెలుస్తోంది. నేరుగా వారు చంద్రబాబుని కలసి చర్చిస్తారా లేక రహస్య మంతనాలు సాగిస్తారా అనేది తేలాల్సి ఉంది. ఎమ్మెల్యే కోటంరెడ్డి శ్రీధర్ రెడ్డి సోదరుడు, కోటంరెడ్డి గిరిధర్ రెడ్డి ఈపాటికే టీడీపీలో చేరారు. ఆయన జిల్లా నాయకులతో ఇంకా కలసిపోలేదు. ఈ కార్యక్రమం ద్వారా ఆయన కూడా జిల్లా టీడీపీ నేతలతో కలసిపోతారని, రూరల్ నాయకులను సమన్వయం చేసుకుంటూ పార్టీకోసం కృషి చేస్తారని అంటున్నారు. తమ్ముడిని టీడీపీలోకి పంపించిన శ్రీధర్ రెడ్డి, చంద్రబాబుని కలుస్తారా లేదా అనేది తేలాల్సి ఉంది.