APSRTC: వాట్సప్ బస్ టికెట్లు అనుమతించండి - అధికారులకు ఏపీఎస్ఆర్టీసీ కీలక ఆదేశాలు, టికెట్లు బుక్ చేసుకోండిలా!

Andhra News: వాట్సప్ గవర్నెన్స్‌లో భాగంగా బస్ టికెట్లు బుక్ చేసుకున్న ప్రయాణికులను అనుమతించాలని యాజమాన్యం ఆదేశాలు జారీ చేసింది. దీనిపై క్షేత్ర స్థాయి సిబ్బందికి అవగాహన కల్పించాలని ఆదేశాలిచ్చింది.

వాట్సప్ ఆర్టీసీ టికెట్లకు అనుమతించాలని ఆదేశాలు

Source : Twitter (X)

APSRTC Bus Tickets Booking Process In Whatsapp: ప్రజలకు మరింత సులువుగా సేవలు అందించేలా ఏపీ ప్రభుత్వం వాట్సాప్ ఆధారిత సేవలను అందుబాటులోకి తీసుకొచ్చిన విషయం తెలిసిందే. ఇందులో భాగంగా ఆర్టీసీ (APSRTC) బస్ టికెట్లను వాట్సప్ ద్వారా బుక్ చేసుకున్న ప్రయాణికులను బస్సుల్లో అనుమతించాలని జిల్లాల యంత్రాంగానికి యాజమాన్యం ఆదేశాలు జారీ చేసింది. దూరప్రాంత బస్ సర్వీసులు అన్నింటా వాట్సప్ ద్వారా టికెట్ బుకింగ్‌కు అవకాశం కల్పించినట్లు పేర్కొంది. దీనిపై క్షేత్రస్థాయి సిబ్బందికి అవగాహన కల్పించాలని అన్ని జిల్లాల అధికారులు, డిపో మేనేజర్లకు ఆదేశాలిచ్చింది.

బస్ టికెట్లు బుక్ చేసుకోండిలా..

వాట్సప్ ద్వారా ప్రభుత్వ సేవలు పొందాలనుకునే వారు.. 9552300009 నెంబరుకు తొలుత హాయ్ అని మెసేజ్ పంపాలి. ఆ తర్వాత ఏయే సేవలు అందుబాటులో ఉన్నాయో చూపిస్తుంది. అందులో ఆర్టీసీ టికెట్ బుకింగ్/రద్దు ఆప్షన్ ఎంపిక చేసుకోవాలి. ఆ తర్వాత బయల్దేరే ప్రదేశం, గమ్యస్థానం, ప్రయాణ తేదీ వంటి వివరాలు ఎంటర్ చేయాలి. అనంతరం ఏయే సర్వీసులు, ఎన్ని సీట్లు అందుబాటులో ఉన్నాయో చూపిస్తుంది. వీటిలో సీట్లు ఎంపిక చేసుకుని ఆన్ లైన్ డిజిటల్ చెల్లింపులు చేస్తే సరిపోతుంది. ఆన్ లైన్ పేమెంట్ జరిగిన వెంటనే టికెట్ బుక్ చేసుకున్న వ్యక్తి వాట్సాప్ నెంబరుకు టికెట్ వస్తుంది. ఈ సేవలు సద్వినియోగం చేసుకోవాలని అధికారులు సూచిస్తున్నారు.

తొలిదశలో 161 ప్రభుత్వ సేవలు

దేశంలోనే తొలిసారి వాట్సప్ గవర్నెన్స్ సేవల్ని ఏపీ ప్రభుత్వం ప్రారంభించింది. ఇటీవల మంత్రి నారా లోకేష్ దీని ద్వారా 161 ప్రభుత్వ సేవల్ని ప్రారంభించారు. మీరు వాట్సాప్ నెంబర్‌కు ఒక్క మెస్సేజ్ చేస్తే చాలు.. గవర్నమెంట్ ఆఫీసుల చుట్టూ తిరగకుండానే మీకు సర్టిఫికెట్స్ సైతం ఆన్‌లైన్‌లోనే అందిస్తుంది ప్రభుత్వం. వాట్సాప్ గవర్నెన్స్ మొదటి విడతలో రెవెన్యూ, దేవాదాయ, ఏపీఎస్ఆర్టీసీ, ఎనర్జీ, అన్న క్యాంటీన్, సీఎంఆర్ఎఫ్, మున్సిపల్ వంటి పలు శాఖల్లో సేవలను అందుబాటులోకి తెచ్చింది. రెండో దశలో 360 సేవలు అందుబాటులోకి తీసుకొస్తామన్నారు. నారా లోకేష్ చొరవ తీసుకుని మెటా సంస్థతో గత ఏడాది అక్టోబర్ నెలలో చర్చలు జరిపి, ప్రాసెస్ మొదలుపెట్టారు. 'మన మిత్ర - ప్రజల చేతిలో ప్రభుత్వం' వాట్సాప్ గవర్నెన్స్ సేవల్ని అందుబాటులోకి తీసుకొచ్చారు.

ఏ సేవలంటే..?

దేవాదాయ బుకింగ్ సేవలు, ఫిర్యాదు సంబంధిత సేవలు, ఏపీఎస్ఆర్టీసీ సేవలు, సీఎంఆర్ఎఫ్ సేవలు, సీడీఎంఏ సేవలు, ఎనర్జీ సేవలు, వ్యవసాయ, మౌలిక వసతుల అభివృద్ధి, విద్యుత్తు, పర్యాటక తదితర సేవలు వాట్సప్ గవర్నెన్స్ ద్వారా అందుబాటులోకి వచ్చాయి. దీని ద్వారా మీరు ఫిర్యాదులు కూడా ఇవ్వొచ్చు. మీ పేరు, అడ్రస్, ఫోన్ నెంబర్ ఎంటర్ చేసి సబ్మిట్ చేస్తే మీకు రిఫరెన్స్ నెంబర్ వస్తుంది. దాని ద్వారా మీ ఫిర్యాదు గురించి లేటెస్ట్ అప్డేట్ సైతం తెలుసుకునే వీలుంటుంది. ప్రభుత్వ సంక్షేమ పథకాలు, పథకాల ద్వారా కలిగే లబ్ధి లాంటి అంశాలు సైతం వాట్సాప్ గవర్నెన్స్ ద్వారా ప్రభుత్వం అందుబాటులోకి తెచ్చింది.