Nara Lokesh : అక్టోబర్ 4 వరకూ లోకేష్‌ను అరెస్ట్ చేయవద్దు - సీఐడీకి హైకోర్టు ఆదేశం !

స్కిల్ డెవలప్‌మెంట్ కేసులో అక్టోబర్ నాలుగో తేదీ వరకూ అరెస్ట్ చేయవద్దని సీఐడీని హైకోర్టు ఆదేశించింది. లోకేష్ దాఖలు చేసుకున్న ముందస్తు బెయిల్ పై విచారణ అప్పటికి వాయిదా వేసింది.

హైకోర్టులో నారాలోకేష్‌కి ఊరట

Nara Lokesh : టీడీపీ జాతీయ ప్రధాన కార్యదర్శి నారా లోకేశ్‌కు ఊరట లభించింది. పైబర్ గ్రిడ్,  స్కిల్ డెవలప్‌మెంట్ కేసుల్లో ముందస్తు బెయిల్ ఇవ్వాలని లోకేష్ దాఖలు చేసుకున్న పిటిషన్లపై విచారణ జరిగిదంి.  అక్టోబర్ 4 వరకు లోకేశ్‌ను అరెస్ట్ చేయవద్దని పోలీసులను హైకోర్టు ఆదేశించింది. విచారణను వచ్చే బుధవారానికి వాయిదా వేసింది.   ఈ స్కిల్ డెవలప్ మెంట్ కేసు, ఫైబర్ గ్రిడ్ కేసుల్లో ముందస్తు బెయిల్ ఇవ్వాలని లోకేశ్ తరఫున హైకోర్టులో పిటిషన్ దాఖలు అయింది. ఈ పిటిషన్‌పై విచారణ చేపట్టిన ధర్మాసనం ఇరువర్గాల వాదన విని కీలక ఉత్తర్వులు ఇచ్చింది.  

అంతకు ముందు  ఇన్నిర్ రింగ్ రోడ్ అలైన్‌మెంట్ మార్పునకు సంబంధించిన అక్రమ కేసులో ఏపీ హైకోర్టులో శుక్రవారం కీలక పరిణామం చోటుచేసుకుంది. ఈ కేసులో ఏ14గా చేర్చిన నారా లోకేష్ దాఖలు చేసిన ముందస్తు బెయిల్‌పై విచారణ సందర్భంగా అడ్వకేట్ జనరల్ కోర్టుకు కీలక విషయాలు వెల్లడించారు. సీఆర్‌పీసీలోని 41ఏ కింద లోకేష్‌కు నోటీసులు ఇస్తామని ఏజీ అన్నారు. ఈ మేరకు దర్యాప్తు అధికారి ఎఫ్ఐఆర్‌లో మార్పు చేశారని కోర్టుకు నివేదించారు. 41ఏ నిబంధనలు పూర్తిగా పాటిస్తామని, విచారణకు సహకరించకపోతే కోర్టు దృష్టికి తీసుకొస్తామని ఏజీ వివరించారు. 

దీంతో సీఆర్‌పీసీ 41ఏ నోటీసులు అంటే అరెస్ట్‌ ప్రస్తావన రాదు కాబట్టి ముందస్తు బెయిల్‌పై విచారణను ముగిస్తున్నట్లు న్యాయమూర్తి వెల్లడించారు. దీనినిబట్టి ముందస్తు బెయిల్‌కు ఆస్కారమున్న అవినీతి నిరోధక చట్టంలోని సెక్షన్లను ఎఫ్ఐఆర్ నుంచి తొలగించి ఉండొచ్చని న్యాయనిపుణులు అభిప్రాయపడుతున్నారు. ఈ విషయం నిర్ధారణ కావాల్సి ఉంది. అసలు లోకేష్‌పై ఎఫ్ఐఆర్‌లో ఏ సెక్షన్లు పెట్టారు.. ఏ సెక్షన్లు తీసేశారు.. మళ్లీ ఏ సెక్షన్లు పెట్టారు అన్నది మొత్తం సస్పెన్స్ గానే ఉంది. ఎఫ్ఐఆర్‌లు కూడా లేకుండా అరెస్టులు చేస్తున్నారన్న విమర్శలు వినిపిస్తున్నా అదే పరిస్థితి కనిపిస్తోందంటున్నారు. 

ఇన్నర్‌ రింగ్‌ రోడ్డు కేసులో తెదేపా అధినేత చంద్రబాబు దాఖలు చేసిన బెయిల్‌ పిటిషన్‌పై హైకోర్టులో వాదనలు కొనసాగుతోన్నాయి. ఈ కేసులో చంద్రబాబును సీఐడీ మొదటి నిందితుడిగా పేర్కొంది. బెయిల్‌ పిటిషన్‌పై ఈనెల 27న వాదనలు జరిగాయి. అనంతరం తదుపరి విచారణను న్యాయమూర్తి నేటికి వాయిదా వేశారు. ఇవాళ వాయిదాల అనంతరం నాలుగో తేదీకి వాయిదా వేశారు. రాజధాని నగరానికి సంబంధించిన బృహత్‌ ప్రణాళిక డిజైనింగ్‌, ఇన్నర్‌ రింగ్‌రోడ్డు, దాన్ని అనుసంధానించే రహదారుల ఎలైన్‌మెంట్‌లో అక్రమాలు చోటు చేసుకున్నాయని వైకాపా ఎమ్మెల్యే ఆళ్ల రామకృష్ణారెడ్డి 2022 ఏప్రిల్‌ 27న ఇచ్చిన ఫిర్యాదు ఆధారంగా అదే ఏడాది మే 9న సీఐడీ పలువురిపై కేసు నమోదు చేసింది. చంద్రబాబును మొదటి నిందితుడిగా పేర్కొంది. ఈ కేసులో తనకు బెయిలు మంజూరు చేయాలని చంద్రబాబు పిటిషన్‌ వేశారు. చంద్రబాబు తరఫున వర్చువల్‌గా సుప్రీంకోర్టు సీనియర్‌ న్యాయవాది సిద్ధార్థ లూథ్రా ఇన్నర్‌ రింగ్‌ రోడ్డు కేసు పూర్వాపరాలను కోర్టు దృష్టికి తెచ్చారు. రాజకీయ కారణాలతోనే కేసు నమోదు చేశారని వివరించారు.