Anchor Suma: జయమ్మ పంచాయతీ దేని కోసం

బుల్లితెర యాంకర్ సుమ ప్రధాన పాత్రలో తెరకెక్కుతున్న చిత్రం ‘జయమ్మ పంచాయితీ’. కలివారపు విజయ్‌కుమార్‌ దర్శకత్వం వహిస్తున్నారు. తుది దశ చిత్రీకరణలో ఉన్న ఈ సినిమా త్వరలోనే ప్రేక్షకుల ముందుకురానుంది. ఈ నేపథ్యంలో నటుడు నాని ఈ చిత్రంలోని తొలి గీతాన్ని విడుదల చేశారు. ‘తిప్పగలనా చూపులు నీ నుంచే ఏ వైపేనా.. ఆపగలనా అడుగులు నా చెంతే కాసేపైనా’ అంటూ సాగే ఈ పాట అన్ని వర్గాల శ్రోతల్ని అలరించేలా ఉంది. రామాంజనేయులు రచించిన ఈ గీతానికి ఎం.ఎం. కీరవాణి స్వరాలు సమకూర్చారు. పీవీఎన్‌ఎస్‌ రోహిత్‌ ఆలపించారు. ఈ సినిమాని వెన్నెల క్రియేషన్స్‌ పతాకంపై బలగ ప్రకాశ్ నిర్మిస్తున్నారు.