Minister Harish Rao : వరంగల్ హెల్త్ సిటీ దేశానికే ఒక మోడల్, దసరా నాటికి నిర్మాణం పూర్తి- మంత్రి హరీశ్ రావు

Minister Harish Rao : వరంగల్ హెల్త్ సిటీని దేశానికే ఒక మోడల్ గా నిర్మిస్తున్నట్లు మంత్రి హరీశ్ రావు తెలిపారు. దసరా నాటికి హెల్త్ సిటీ నిర్మాణ పనులు పూర్తిచేస్తామన్నారు.

వరంగల్ హెల్త్ సిటీ పనులు పరిశీలించిన మంత్రి హరీశ్ రావు

Minister Harish Rao : వరంగల్ లో హెల్త్ సిటీ నిర్మాణ పనులను వైద్యారోగ్య మంత్రి హరీశ్ రావు శనివారం పరిశీలించారు. అనంతరం మంత్రి హరీశ్ రావు మాట్లాడుతూ... అత్యంత ప్రతిష్టాత్మకంగా చేపట్టిన హెల్త్ సిటీ నిర్మాణం పరిశీలించామన్నారు. వరంగల్ తో పాటు, ఉత్తర తెలంగాణ ప్రజల కోసం కార్పొరేట్ స్థాయి వైద్యం అందించేందుకు సీఎం కేసీఆర్  2000 పడకల ఆసుపత్రికి శ్రీకారం చుట్టామన్నారు. హెల్త్ సిటీ నిర్మాణ పనులు అత్యంత వేగంగా జరుగుతున్నాయన్నారు. 2023 చివరి నాటికి భవనం పూర్తి అవుతుందన్నారు. దసరా నాటికే పూర్తి అయ్యేలా అవసరమైన అన్ని చర్యలు తీసుకోవాలని ఆర్ అండ్ బి, ఏజెన్సీ, వైద్యారోగ్య శాఖ అధికారులను ఆదేశించామని మంత్రి తెలిపారు.  మొత్తం 16.5 లక్షల ఎస్ఎఫ్టీలో  24 అంతస్తుల భవనం నిర్మిస్తున్నట్లు తెలియజేశారు.  

216 ఎకరాల్లో హెల్త్ సిటీ 

"వరంగల్ హెల్త్ సిటీ చారిత్రాత్మక భవనం. రాష్ట్రానికే కాదు దేశంలోనే అత్యుత్తమ వైద్య సేవలు ఇక్కడ అందబోతున్నాం. 216 ఎకరాల్లో ఈహెల్త్ సిటీ రూపుదిద్దుకుంటోంది. అవయవమార్పిడి ఆపరేషన్లు కూడా వరంగల్ లో అందుబాటులోకి రాబోతాయి. హైదరాబాద్ తర్వాత వరంగల్ ను అంతగా అభివృద్ధి చేయాలని సీఎం భావిస్తున్నారు. రాజకీయాల కోసం కొందరు విమర్శలు చేస్తారు. గతంలో కాళేశ్వరం ప్రాజెక్టుపై కూడా విమర్శలు చేశారు. విమర్శలు చేసినోళ్లే ఇవాళ నోరెళ్లబెడుతున్నాయి. కాంగ్రెస్ హయాంలో నేను రానుబిడ్డో సర్కారు దవాఖనాకు అనే వారు. ఇప్పుడు నేను పోత బిడ్డో సర్కార్ దవాఖనాకు అంటుతున్నారు. ఎంబీబీఎస్ సీట్లలో తెలంగాణ నెంబర్ వన్ పొజిషన్ లో ఉంది. పీజీ సీట్లలో రెండో స్థానంలో ఉంది. మెడికల్ చదువు కోసం మన పిల్లలు ఇతర దేశాలకు వెళ్లాల్సిన అవసరం లేకుండా కృషి చేస్తున్నాం. సమైక్య రాష్ట్రంలో మెడికల్ విద్యలో వెనకబడ్డాం" - మంత్రి హరీశ్ రావు 

వరంగల్ హెల్త్ సిటీ దేశానికే ఒక మోడల్  

తెలంగాణలో మంచి పథకాలు అమలు చేస్తున్నారని ఇతర రాష్ట్రాల ముఖ్యమంత్రులు, నేతలు చెబుతున్నారని మంత్రి హరీశ్ రావు అన్నారు. దిల్లీలో, పంజాబ్ లో కంటి వెలుగు ప్రారంభిస్తామని ప్రకటించారన్నారు. కంటి వెలుగుకు భారీ స్పందన వస్తోందని, ప్రభుత్వ ఆసుపత్రుల వద్దకు ప్రజలు కాదు, ప్రజల వద్దకే ప్రభుత్వం వెళ్లి పరీక్షలు చేస్తుందన్నారు. కేంద్రం ప్రభుత్వం తెలంగాణపై వివక్ష చూపుతోందని ఆరోపించారు. కాళేశ్వరం స్ఫూర్తితో వరంగల్ మల్టీ సూపర్ స్పెషాలిటీ ఆస్పత్రిని నిర్మిస్తున్నామని తెలిపారు. కాళేశ్వరం ప్రాజెక్ట్ కట్టినప్పుడు కూడా ఇలాగే అన్నారని, నీళ్లు వచ్చి వరంగల్ లో రెండు పంటలు పండుతున్నాయని తెలిపారు. యాసంగిలో రెండు పంటలు పండుతున్నాయి అంటే కాళేశ్వరం ప్రాజెక్టే కారణమన్నారు. వరంగల్ నగరానికే కాదు జాతీయ స్థాయిలో అద్భుతమైన అవసరాలు తీర్చే ఆసుపత్రి నిర్మిస్తున్నట్లు తెలిపారు. ఈ ఆసుపత్రి దేశానికే ఒక మోడల్ కానున్నదని మంత్రి తెలిపారు. దీంతో పేద ప్రజలకు కార్పొరేట్ వసతులు కలుగుతాయన్నారు. వరంగల్ లో హెల్త్ యూనివర్సటీ, వెటర్నిటీ యునివర్సటీ ఏర్పాటు చేశామని, హైదరాబాద్ పబ్లిక్ స్కూల్ కూడా ఏర్పాటు చేయాలని ఆలోచిస్తున్నామన్నారు.  

జిల్లాకో మెడికల్ కాలేజీ

"రాష్ట్రంలో జిల్లాకు ఒక మెడికల్ కాలేజీ ఏర్పాటు చేస్తున్నాం. 926 మంది డాక్టర్లు నియామకం చేశాం. 12,13 వందల ప్రొఫెసర్ పోస్టుల రిక్రూట్ చేస్తున్నాం. కేంద్రం సహకారం ఇవ్వడం లేదు. వివక్ష పూరిత వైఖరితో 157 కాలేజీలు ఇస్తే తెలంగాణకు ఒక్కటి ఇవ్వలేదు. రాష్ట్ర సొంత నిధులతో సీఎం  8 మెడికల్ కాలేజీలు కట్టారు. జిల్లాకు ఒకటి ఏర్పాటు చేస్తున్నారు. సీఎం స్వయంగా హెల్త్ సిటీ పనులు సమీక్ష చేస్తున్నారు. ఎలాంటి నిధుల కొరత లేదు." - మంత్రి హరీశ్ రావు