Srisailam: శ్రీశైలం ఎడమగట్టు కాల్వ పనులను రెండుగా చూపటం సరికాదు.. కేఆర్ఎంబీకి తెలంగాణ లేఖ

శ్రీశైలం ఎడమగట్టు కాల్వ పనులను గెజిట్ నోటిఫికేషన్​లో రెండుగా చూపడంపై తెలంగాణ ప్రభుత్వం అభ్యంతరం వ్యక్తం చేసింది. దీనిపై కేఆర్ఎంబీకి లేఖ రాసింది.

ప్రతీకాత్మక చిత్రం

శ్రీశైలం ఎడమగట్టు కాల్వ పనులను గెజిట్ నోటిఫికేషన్​లో రెండుగా చూపడంపై తెలంగాణ ఈఎన్సీ మురళీధర్ కృష్ణా నదీ యాజమాన్య బోర్డుకు లేఖ రాశారు.  కేంద్ర జలశక్తి మంత్రిత్వశాఖకు కూడా లేఖ ప్రతిని పంపించారు. శ్రీశైలం ఎస్ఎల్ బీసీ అంశం గురించి పేర్కొన్నారు. గెజిట్ నోటిఫికేషన్​లో రెండు కాంపోనెంట్లుగా చూపారని తెలిపారు. 10 టీఎంసీల పనులను అదనంగా ఎలా చూస్తారని లేఖలో మురళీధర్ అన్నారు. 

ఎస్ఎల్ బీసీకి సంబంధించిన విషయంపైనా.. బోర్డు దృష్టికి తీసుకెళ్లారు. ఉమ్మడి రాష్ట్రంలోనే అప్పటి ప్రభుత్వం ఆయకట్టును మూడు నుంచి నాలుగు లక్షల ఎకరాలకు పెంచిందని మురళీదర్ గుర్తు చేశారు. నీటి కేటాయింపులు మాత్రం పెంచలేదనే విషయాన్ని ప్రస్తావించారు. ఈ విషయాన్ని దృష్టిలో పెట్టుకునే.. రాష్ట్రం ఏర్పాడ్డాక ఆయకట్టుకు అనుగుణంగా.. నీటి కేటాయింపులను పెంచినట్టు చెప్పారు. ఈ మేరకు ప్రభుత్వం 30 నుంచి 40 టీఎంసీలకు పెంచిందని వివరించారు.

అయితే 10 టీఎంసీలకు సంబంధించిన పనులు అదనపు కాంపోనెంట్ కిందకు రాదన్నారు. 75 శాతం నీటి లభ్యత కింద ప్రాజెక్టుకు కేటాయింపుల అంశాన్ని సైతం.. కృష్ణా జలవివాదాల రెండో ట్రైబ్యునల్ ముందుకు తీసుకొచ్చినట్టు చెప్పారు. బేసిన్​లోని అవసరాలకు ముందు ప్రాధాన్యం ఇవ్వాలని మొదటి ట్రైబ్యునల్ కూడా స్పష్టం చేసిందని మురళీధర్ పేర్కొన్నారు. ఇలాంటివి అన్నీ.. చూసి.. తెలంగాణకు అన్యాయం జరగకుండా చూడాలని కేఆర్ఎంబీకి రాసిన లేఖలో కోరారు. గెజిట్ నోటిఫికేషన్ లోని ఒకటి, రెండు షెడ్యూళ్లలో ఉన్న ఎస్ఎల్ బీసీ రెండో కాంపోనెంట్​ను తొలగించాలని విజ్ఞప్తి చేశారు.

ఇటీవలే కల్వకుర్తి ఆయకట్టుపై లేఖ

కల్వకుర్తి ఆయకట్టు విషయంలో కొత్తగా ఆయకట్టు పెంచలేదని తెలంగాణ ప్రభుత్వం చెప్పింది. ఆయకట్టు పెంచుతూ ఏపీ ప్రభుత్వం జారీ చేసిన జీవోలను.. జతచేస్తూ.. కేఆర్ఎంబీకి ఈఎన్సీ మురళిధర్  లేఖ రాశారు. కల్వకుర్తి లిఫ్ట్ ఇరిగేషన్ ప‌థ‌కాన్ని రెండు కాంపోనెంట్లుగా గెజిట్ నోటిఫికేషన్‌లో పొందుప‌రచడాన్ని తెలంగాణ ప్రభుత్వం తప్పుపట్టింది.  2 అంశాల‌ను ఒకటిగా పొందుప‌ర‌చాల‌ని కోరుతూ కృష్ణా న‌దీ యాజ‌మాన్య బోర్డుకు రాసిన లేఖలో ప్రస్తావించారు.

ఉమ్మడి ఆంధ్రప్రదేశ్ లో కల్వకుర్తి ఆయకట్టును 2.5 లక్షల నుంచి 3.65 లక్షల ఎకరాలకు పెంచినా.. నీటి కేటాయింపులు పెంచలేదని కేఆర్ఎంబీకి తెలంగాణ చెప్పింది. అయితే కొత్త ఆయకట్టును పెంచలేదని.. పెరిగిన.. ఆయకట్టుకు సరిపడేలా మాత్రమే.. నీటి కేటాయింపులు చేసినట్టు చెప్పారు.