Ponnam Prabhakar: నేనేమీ అల‌గ‌లేదు, అందువల్లే గుడి బయట కూర్చున్నాం - ప్రొటోకాల్ వివాదంపై మంత్రి పొన్నం
Balkampet Yellamma Temple: తాను అలిగిన‌ట్లు వచ్చిన వార్తల్లో నిజం లేద‌న్నారు మంత్రి పొన్నం. మ‌హిళ‌లు వెళ్లే సమయంలో తోపులాట జ‌రిగింద‌ని అందుకు కాసేపు అలా డివైడర్ పై కూర్చున్నట్లు తెలిపారు.
Ponnam Prabhakar: హైదరాబాద్‌లోని బల్కంపేట ఎల్లమ్మ కల్యాణంలో ప్రోటోకాల్‌ వివాదం దుమారం రేపడం తెలిసిందే. అధికారుల తీరుపై అలిగిన మంత్రి పొన్నం ప్రభాకర్, జీహెచ్ఎంసీ మేయర్ గద్వాల్ విజయలక్ష్మి గుడి బయటే ఉండిపోయారు. ఎల్లమ్మ తల్లి కల్యాణ వేడుకల ఏర్పాట్లలో నిర్లక్ష్యంపై మంత్రి ఆగ్రహం వ్యక్తం చేశారని ప్రచారం జరిగింది. ప్రొటోకాల్ పాటించడం లేద‌ని అలిగి మంత్రి ఆలయం బయటే కూర్చుండిపోయినట్టు వార్తలు హల్ చల్ చేశాయి.
ఈ విష‌య‌ంపై మంత్రి పొన్నం ప్రభాకర్ స్పందించారు. తాను అలిగిన‌ట్లు వచ్చిన వార్తల్లో ఏ మాత్రం నిజం లేద‌న్నారు. అమ్మవారి భక్తులమైన మేము ఎందుకు అలుగుతామ‌న్నారు. అధికారం, హోదా తోటి రాలేదన్నారు. భక్తులుగా మాత్రమే అమ్మవారిని దర్శించుకునేందుకు వచ్చినట్లు తెలిపారు. మ‌హిళ‌లు వెళ్లే సమయంలో తోపులాట జ‌రిగింద‌ని పేర్కొన్నారు. దాంతో మేయర్ విజయలక్ష్మి కూడా తోపులాట‌లో ఇబ్బంది ప‌డ్డార‌ని అన్నారు. తోపులాట‌ను నిలువ‌రించేందుకు కొద్దిసేపు ఆగిన‌ట్లు మంత్రి పొన్నం తెలిపారు. అదే సమయంలో తోపులాట గురించి అధికారులను ప్రశ్నించినట్లు చెప్పుకొచ్చారు. మహిళా రిపోర్టర్‌కు ఎదురైన చేదు అనుభ‌వానికి క్షమాపణలు తెలిపారు. అలాగే ఇలాంటి ఘ‌ట‌న‌లు పున‌రావృతం కాకుండా చూస్తామ‌ని మంత్రి హామీ ఇచ్చారు.
అట్టహాసంగా బోనాలు
చారిత్రాత్మక బోనాల పండగ హైదరాబాద్‌లో అట్టహాసంగా ప్రారంభమైంది. గోల్కొండ బోనాల జాతరతో సుమారు 45 రోజుల వేడుకలకు శ్రీకారం చుట్టారు. గోల్కొండలో వెలిసిన జగదంబికా అమ్మవారికి భక్తులు తొలి బోనం సమర్పించారు.. అమ్మవారికి తొట్టెలు, ఫలహార బండ్లు, రంగం, బలిగంప ఊరేగింపు వంటి కార్యక్రమాలతో జంటనగరాల్లో ఆధ్మాత్మిక వాతావరణం నెలకొంది. ఈ నెల 14న సికింద్రాబాద్ ఉజ్జయిని మహంకాళి అమ్మవారికి బోనం సమర్పించనున్నారు. 21న పాతబస్తీ లాల్ దర్వాజా సింహ వాహిని అమ్మవారికి భక్తులు బోనం సమర్పిస్తారు. అందుకు సంబంధించిన అన్ని ఏర్పాట్లు పూర్తయ్యాయి. ఇదివరకే తెలంగాణ ప్రభుత్వం రూ.20 కోట్లను మంజూరు చేసింది. తాజాగా బల్కంపేట్‌లో వెలిసిన ఎల్లమ్మ తల్లికి భక్తులు బోనాలను సమర్పిస్తున్నారు. ఈ తెల్లవారుజాము నుంచే ఆలయానికి భారీగా భక్తులు తరలి వచ్చారు. భక్తులకు ఎలాంటి అసౌకర్యం కలగకుండా అధికారులు, ఆలయ కమిటీ సభ్యులు ముందుజాగ్రత్త చర్యలు తీసుకున్నారు. పెద్ద ఎత్తున పోలీసు బలగాలను మోహరింపజేశారు.
బోనం ఎత్తిన మంత్రి కొండా సురేఖ
దేవాదాయ శాఖ మంత్రి కొండా సురేఖ ఈ ఉదయం ఎల్లమ్మ తల్లికి బోనాన్ని సమర్పించారు. సుమారు 40 నిమిషాల పాటు ఆలయంలో ప్రత్యేక పూజల్లో పాల్గొన్నారు. మంత్రి కొండా సురేఖ, దేవాదాయ మంత్రిత్వ శాఖ అధికారులు, కొందరు కాంగ్రెస్ పార్టీ సీనియర్ నాయకులు ఈ పూజల్లో పాల్గొన్నారు. అధికారులు, ఆలయ సిబ్బంది ముందు జాగ్రత్త చర్యలు తీసుకున్నారు అయినా తోపులాట మాత్రం తప్పలేదు. అమ్మవారికి కల్యాణోత్సవాన్ని తిలకించడానికి భక్తులు ఎగబడ్డారు. ఫలితంగా క్యూలైన్లల్లో తోపులాట జరిగింది. ఈ ఘటనలోనే రవాణా శాఖ మంత్రి పొన్నం ప్రభాకర్, గ్రేటర్ హైదరాబాద్ మున్సిపల్ కార్పొరేషన్ మేయర్ గద్వాల్ విజయలక్ష్మి కిందపడ్డారు. దీంతో వారు ఆలయం ఎదురుగా రోడ్డు డివైడర్‌పై కూర్చున్నారు. అధికారుల తీరుపై ఆగ్రహం వ్యక్తం చేశారు.
టాప్ హెడ్ లైన్స్
ట్రెండింగ్ వార్తలు
