Aspiring acto tragedy: సినిమా అవకాశాల కోసం తిరిగి తిరిగి అలసిపోయాడు - సినీ ఆఫీసులోనే కన్నుమూసిన ఔత్సాహిక నటుడు
Hyderabad film office ఛ సినిమాల్లో నటించాలన్న ఆసక్తితో తిరిగి తిరిగి ఓ వ్యక్తి అలసిపోయి చనిపోయాడు. వృత్తి రీత్యా రైతు అయినా.. వేషాల కోసం తిరిగినా ప్రయోజనం లేకపోయింది.
Man died of heart attack at Hyderabad film office: ఆ గొంతులో ఎన్నో సినిమా డైలాగులు.. ఆ కళ్లలో వెండితెరపై తనను తాను చూసుకోవాలన్న వేల కలలు. నాగలి పట్టి పొలం దున్నినా, మనసంతా మాత్రం రంగుల ప్రపంచం చుట్టూనే తిరిగేది. కానీ, విధి ఆ పచ్చని కలలను పటాపంచలు చేసింది. సినిమా అవకాశాల వేటలో విశాఖపట్నం నుంచి వచ్చిన ఒక మధ్యవయస్కుడు, చివరకు నగర నడిబొడ్డున గుండెపోటుతో కుప్పకూలిపోయి అనంతలోకాలకు వెళ్ళిపోయిన ఘటన ఫిలింనగర్ పరిసరాల్లో విషాదాన్ని నింపింది.
అనకాపల్లికి చెందిన వాడపల్లి సంజయ్ వృత్తిరీత్యా రైతు. వయసు 55 ఏళ్లు. వ్యవసాయం చేస్తూనే సినిమాపై మక్కువ పెంచుకున్నాడు. తనలోని నటుడిని లోకానికి పరిచయం చేయాలని, పెద్ద హీరోల డైలాగులను వల్లె వేస్తూ, పాటలు పాడుతూ తనలోని కళను నిత్యం పోషించుకునేవాడు. ఎప్పటికైనా వెండితెరపై మెరుస్తానన్న మొండి ధైర్యంతో, నగరంలో ఉంటున్న సోదరి ఇంటికి వచ్చినప్పుడల్లా ఫిలిం నగర్, కృష్ణానగర్ వీధుల్లో అవకాశాల కోసం చెప్పులు అరిగేలా తిరిగేవాడు.
గత నెల 14న గంపెడు ఆశలతో నగరానికి చేరుకున్న సంజయ్, బుధవారం ఉదయం బంజారాహిల్స్లోని ఒక నిర్మాణ సంస్థ కార్యాలయానికి వెళ్ళాడు. ఏదైనా చిన్న అవకాశం వస్తుందేమో అని ఆరా తీసిన అతడికి చేదు అనుభవం ఎదురైంది. ఆడిషన్స్ ఇప్పటికే పూర్తయ్యాయని, ప్రస్తుతం ఎవరూ అవసరం లేదని సిబ్బంది చెప్పిన సమాధానం అతడిని నిరాశకు గురిచేసిందో ఏమో గానీ.. అక్కడే ఉన్న కుర్చీలో కూర్చున్న సంజయ్, కొద్దిసేపటికే పక్కకు ఒరిగిపోయాడు. నిమిషాల వ్యవధిలోనే ఆ కుర్చీలోనే ఆయన ప్రాణాలు గాలిలో కలిసిపోయాయి.
So Sad.. 🥺🥺
— ibomma Ravi (@ibomma_Ravi) April 2, 2026
సినిమా ఆడిషన్స్ కోసం వచ్చి గుండెపోటుతో మృతిచెందిన వ్యక్తి..
సినిమాల మీద ఉన్న ప్రేమతో ఆడిషన్స్ కి వచ్చి బంజారాహిల్స్ లో ఉన్న సినిమా కార్యాలయానికి వచ్చిన విశాఖపట్నంకు చెందిన వాడపల్లి సంజయ్(55) అనే వ్యక్తి.. pic.twitter.com/1UEMh30OhA
సమాచారం అందుకున్న పోలీసులు మృతదేహాన్ని పోస్టుమార్టం నిమిత్తం ఆసుపత్రికి తరలించారు. ప్రాథమిక విచారణలో అది తీవ్రమైన గుండెపోటుగా వైద్యులు ధృవీకరించారు. నిన్నటి దాకా ఆశగా తిరిగిన మనిషి, అలిసిపోయి అనంత నిద్రలోకి జారుకోవడంతో ఆ నిర్మాణ సంస్థ సిబ్బంది దిగ్భ్రాంతికి లోనయ్యారు. అవకాశాల వేటలో ప్రాణాలు కోల్పోవడం సినీ రంగంలోని తీవ్ర ఒత్తిడిని, పోరాటాన్ని మరోసారి కళ్లకు కట్టినట్లయింది.
సంజయ్ ఆకస్మిక మరణవార్త విన్న అనకాపల్లిలోని ఆయన కుటుంబ సభ్యులు కన్నీరుమున్నీరవుతున్నారు. వెండితెరపై వెలుగులీనాలని వెళ్లిన మనిషి, ఇలా విగతజీవిగా మారుతాడని ఊహించలేకపోతున్నారు. ఎన్నో ఏళ్లుగా నటన కోసం తపించిన ఒక నిస్సహాయ కళాకారుడి ప్రయాణం, చివరకు ఒక ఆఫీసు గదిలోని కుర్చీలోనే ముగిసిపోవడం అందరినీ కలచివేస్తోంది.
టాప్ హెడ్ లైన్స్
ట్రెండింగ్ వార్తలు
