Congress Khammam Meet: పోలీసుల్ని తోసుకుంటూ, తరుముకుంటూ రండి, కాంగ్రెస్ కార్యకర్తలకు నేతల పిలుపు

రాహుల్ గాంధీ మొదటిసారి ఖమ్మం జిల్లాలోకి అడుగు పెడుతుంటే, బీఆర్ఎస్ నాయకులు తట్టుకోలేక చెక్ పోస్ట్ లు పెట్టి నేతల్ని నిర్భందిస్తున్నారని ఎమ్మెల్యే సీతక్క అన్నారు.

మల్లిఖార్జున ఖర్గే, మధుయాష్కి, సీతక్క (ఫైల్ ఫోటోలు)

తెలంగాణ కాంగ్రెస్ పార్టీ ఖమ్మం సభపై ఏఐసీసీ అధ్యక్షుడు మల్లిఖార్జున ఖర్గే స్పందించారు. 3.8 కోట్ల మంది తెలంగాణ ప్రజలు మార్పు కోరుకుంటున్నారని ఖర్గే ట్వీట్ చేశారు. తెలంగాణ జనగర్జన మహా సభలో ప్రజల ఆకాంక్షల కోసం రాహుల్ గాంధీ ప్రసంగిస్తారని, 1360 కి.మీ సుదీర్ఘ పాదయాత్రను పూర్తి చేసుకున్నందుకు CLP నాయకుడు భట్టికి అభినందనలు తెలియజేస్తున్నానని అన్నారు. పలువురు సీనియర్‌ నేతలు కాంగ్రెస్‌ పార్టీలో చేరి ప్రజాకూటమిని బలోపేతం చేయనున్నారని చెప్పారు. 

బీజేపీ చెప్పుచేతలో బీఆర్ఎస్, అందుకే అడ్డంకులు - మధుయాష్కి
ప్రచార కమిటీ ఛైర్మన్ మధుయాష్కీ స్పందిస్తూ.. తెలంగాణలో కేసీఆర్ ప్రభుత్వం కాంగ్రెస్ పార్టీ అంటేనే భయపడుతుందని అన్నారు. రాహుల్ గాంధీ వస్తున్న జన గర్జన సభకు జనం లక్షలాదిగా తరలివస్తున్న తరుణంలో సభకు జనం రాకుండా అడ్డుకోవాలని చూస్తోందని అన్నారు. పోలీసులను కాంగ్రెస్ పార్టీని అడ్డుకోవడం కోసం బీఆర్ఎస్ పార్టీ వాడుకుంటుందని విమర్శించారు. మరో 100 రోజుల్లో కాంగ్రెస్ ప్రభుత్వం రాబోతుందని విశ్వాసం వ్యక్తం చేశారు. 

‘‘రాహుల్ గాంధీ ఈ దేశానికి నాయకులు ఆయన సభను అడ్డుకోవడం ఏమిటి? టీఆర్ఎస్ ప్రభుత్వం బీజేపీ చెప్పుచేతలో ఉండి ఇలా చేస్తుంది. ఎవరు అడ్డుకున్న జనం లక్షలాదిగా వస్తారు.. ఇలాగే నిర్బంధం కొనసాగిస్తే బిఆర్ఎస్ నాయకులను  కాంగ్రెస్ కార్యకర్తలు అడ్డుకుంటారు’’ అని మధుయాష్కి అన్నారు.

ప్రైవేటు సైన్యంలా పోలీసులు - సీతక్క
తెలంగాణ ఇచ్చిన పార్టీ అధినేతగా రాహుల్ గాంధీ మొదటిసారి ఖమ్మం జిల్లాలోకి అడుగు పెడుతుంటే, బీఆర్ఎస్ నాయకులు తట్టుకోలేక చెక్ పోస్ట్ లు పెట్టి నేతల్ని నిర్భందిస్తున్నారని ఎమ్మెల్యే సీతక్క అన్నారు. బస్సులు, ప్రైవేటు వెహికల్స్ ను రానీయకుండా చెక్ పోస్ట్ లు పెట్టి ఆపడం అత్యంత హెయమైనా చర్య అని అన్నారు. బీఆర్ఎస్ నాయకులు అధికారాన్ని దుర్వినియోగం చేస్తూ ఇష్టానుసారం  వ్యవహారిస్తున్నారని, ఉద్యోగులను  ప్రైవేటు మీటింగ్ కు, బీఆర్ఎస్ పార్టీ మీటింగ్ లో కార్యకర్తలుగా ఉపయోగించుకొంటున్నారని విమర్శించారు. 

ఈరోజు పోలీసులను ప్రైవేటు సైన్యంగా వాడుకొని మా సభను అడ్డుకోవాలని చూస్తున్నారు. దీన్ని తెలంగాణ సమాజం ఖండించాలని కోరుతున్నాం. బీఆర్ఎస్ నాయకులారా ఇది పద్ధతి కాదు చేతిలో మీ ప్రభుత్వం ఉందని ఇష్టానుసారంగా వ్యవహరిస్తే ఖబడ్దార్. తెలంగాణ సమాజం రానున్న రోజుల్లో కచ్చితంగా బుద్ధి చెబుతారు. ప్రజలు కట్టే పన్నులతో వచ్చే జీతంతో మీరు డ్యూటీలు చేస్తున్నారు. మీకు జీతాలు కేసీఆర్, పువ్వాడ అజయ్ కుమార్ ఇంట్లో నుంచి వచ్చింది కాదు. అధికారులు నిష్పక్షపాతంగా వ్యవహరించండి. పోలీసులు ఒక పార్టీకి తోత్తుగా మారి మా పార్టీ మీటింగ్ ను విచ్ఛిన్నం చేసే కుట్రలు చేస్తే ఊరుకునేది లేదు. పోలీసులను తోసుకుంటూ తరుముకుంటూ ముందుకు రావాలని ప్రజలకు కార్యకర్తలకు విజ్ఞప్తి చేస్తున్నాం’’ అని సీతక్క పిలుపుఇచ్చారు.