Viral News: హైదరాబాద్‌ పీవీఆర్‌ మాల్‌లో ఉద్యోగి మృతిపై వివాదం! ఫుట్‌పాత్‌పై పడేేశారని ప్రచారం! ఖండించిన యాజమాన్యం

హైదరాబాద్‌లోని పంజాగుట్ట పీవీఆర్‌ గలేరియా మాల్‌లో సిబ్బంది మృతి వివాదానికి దారి తీసింది. తీవ్ర అస్వస్థతకు గురైన హౌస్‌కీపింగ్‌ సూపర్‌వైజర్‌ ను ఫుట్‌పాత్‌పై పడేశారని ప్రచారం జరుగుతోంది.

హైదరాబాద్‌ పీవీఆర్‌ గలెరియాలో అమానుషం

Source : Social Media

Show Quick Read

Key points generated by AI, verified by newsroom

• పంజాగుట్టలోని పీవీఆర్ గలెరియా మాల్ లో కార్మికుడు సత్యనారాయణ అస్వస్థతకు గురయ్యారు.
• ఛాతీ నొప్పితో బాధపడుతున్నా, యాజమాన్యం ఇంటికి వెళ్లడానికి అనుమతించలేదు.
• స్పృహ కోల్పోయిన కార్మికుడిని మాల్ బయట రోడ్డుపై వదిలేశారు.
• వ్యాపారానికి ఆటంకం కలుగుతుందనే భయంతో ఈ అమానవీయ చర్య.

Viral News: హైదరాబాద్‌లోని అత్యంత రద్దీగా ఉండే పంజాగుట్ట ప్రాంతంలోని పీవీఆర్ గలెరియా మాల్ సాక్షిగా మానవత్వం సిగ్గుతో తలదించుకునే ఘటన వెలుగు చూసిందని ప్రచారం జరుగుతోంది. విలాసవంతమైన మాల్‌ల సౌకర్యాలను పర్యవేక్షించే ఒక కార్మికుడు ప్రాణాపాయ స్థితిలో ఉంటే, అతడిని ఆదుకోవాల్సిన వ్యవస్థ అత్యంత అమానుషంగా వ్యవహరించిందని సోషల్ మీడియాలో వైరల్ అవుతోంది. విధి నిర్వహణలో ఉండగా కుప్పకూలిన సత్యనారాయణ అనే కార్మికుడిని కనీసం ఆసుపత్రికి కూడా తీసుకెళ్లకుండా రోడ్డుపై వదిలేశారని అంటున్నారు. దీనిపై స్పందించిన యాజమాన్యం ఇదంతా తప్పుడు ప్రచారంగా కొట్టిపారేసింది.   

మాల్‌లో ఏం జరిగింది?

ప్రతి రోజూ లాగానే సత్యనారాయణ ఉదయం పంజాగుట్టలోని పీవీఆర్‌ గలెరియా మాల్‌కు తన విధులకు హాజరయ్యారు. ఆయన అక్కడ హౌస్‌కీపింగ్ సూపర్వైజర్‌గా పనిచేస్తున్నారు. విధుల్లో ఉండగానే అకస్మాత్తుగా ఆయనకు ఛాతీలో నొప్పి వచ్చింది. అసౌకర్యంగా ఉందని తన పై అధికారులకు వివరించారు. తనకు ఒంట్లో బాగాలేదని, ఇంటికి వెళ్తానంటూ అనుమతి కోరారు. అయితే అక్కడి నిర్వాహకులు ఆయన వెళ్లేందుకు అంగీకరించలేదని అంటున్నారు. పని వదిలి వెళ్లడానికి వీలు లేదని తేల్చేశారట. 

కొంతసేపటికి సత్యనారాయణ పరిస్థితి విషమంగా మారింది. సినిమా ప్రొజెక్షన్ స్క్రీన్ ముందే ఆయన వాంతులు చేసుకొని స్పృహతప్పి పడిపోయారని కొందరు చెబుతున్నారు. ఈ సమయంలో ఇతర సిబ్బంది, యాజమాన్యం అప్రమత్తమై వెంటనే అంబులెన్స్‌కు కాల్ చేయాల్సింది. కానీ పీవీఆర్‌ పర్యవేకణ వ్యవస్థ ఊహించని రీతిలో ప్రవర్తించిందని చెప్పుకుంటున్నారు. స్పృహ లేకుండా పడి ఉన్న సత్యనారాయణను మాల్‌ లోపల నుంచి ఎత్తుకెళ్లి, బయట ఉన్న ఫుట్‌పాత్‌పై పడేశారని ఆరోపణలు వస్తున్నాయి.  

అక్కడి పై స్థాయి సిబ్బందితో భార్య వాగ్వాదం 

సత్యనారాయణ మరణానికి చేరువలో ఉన్నా మాల్ నిర్వాహకులకు జాలి కలగేదని ప్రచారం చేస్తున్నారు. కేవలం ఐదు నిమిషాల దూరంలోనే ఉన్న నిమ్స్ ఆసుపత్రికి కూడా తరలించలేదని అంటున్నారు. దీనికి సపోర్ట్‌గా సత్యనారాయణ భార్య అక్కడి సిబ్బందితో చేస్తున్న వాగ్వాదం వైరల్ అవుతోంది. కనీసం అంబులెన్స్‌ను పిలిచినా, దగ్గర్లోనే ఆసుపత్రికి తరలించినా సత్యనారాయణ ప్రాంతాలు దక్కేవని తోటి సిబ్బంది, కుటుంబ సభ్యులు అంటున్నారు. అంబులెన్స్ పిలవడానికి ఏం అడ్డు వచ్చిందని భార్య ప్రశ్నిస్తున్నారు. 

కార్మికుల ఆగ్రహం 

సత్యనారాయణ బహుషా థర్డ్ పార్టీ ఏజెన్సీ ద్వారా నియమితులైన కార్మికుడు కావచ్చు అని అటున్నారు. ఒక వేళ లోపల కార్మికుడు చనిపోతే వ్యాపారానికి ఆటంకం కలుగుతుందని లేదా ఆసుపత్రుల ఖర్చులు భరించాల్సి వస్తుందనే స్వార్థంతో ఈ పని చేసి ఉంటారని ఆరోపిస్తున్నారు. ఈ ఘటన గురించి తెలియగానే కార్మిక సంఘాలు అక్కడకు వచ్చి ఆగ్రహం వ్యక్తం చేశాయి.   

స్పందించిన యాజమాన్యం

సత్యనారాయణ మృతిపై స్పందించిన పీవీఆర్ యాజమాన్యం జరుగుతున్న ప్రచారాన్ని తప్పుపట్టింది. సత్యనారాయణ బాగాలేదని చెబితే ఇంటికి వెళ్లిపోయేందుకు ఓకే చెప్పామని అంటున్నారు. ఆ విషయాన్ని ఆయన కుటుంబ సభ్యులకి కూడా చెప్పినట్టు సోషల్ మీడియాలో పెట్టిన పోస్టులో వివరించారు. ఒక సహాయకుడిని ఇచ్చి పంపించామని, క్షేమంగానే ఆయన బయటకు వెళ్లినట్టు సీసీటీవీ ఫుటేజ్ కూడా ఉందని తెలిపారు. సంస్థలో పని చేసే ప్రతి ఒక్కర్నీ కూడా తమ కుటుంబ సభ్యులుగానే భావిస్తామని అన్నారు. ఇప్పుడు సత్యనారాయణ మృతి తమను ఎంతగానో బాధించిందని సంతాపం తెలిపారు. ఈ పరిస్థితుల్లో తమపై బురదజల్లడం సరైన పద్ధతి కాదని చెప్పుకొచ్చారు.