Instagram Update : ఇన్​స్టాగ్రామ్​లో న్యూ ఫీచర్స్.. ఇకపై మూడు నిమిషాల నిడివి ఉన్న రీల్స్ పోస్ట్ చేయవచ్చట, మరో అప్​డేట్ కూడా

ఇన్​స్టాగ్రామ్ రీల్స్ చూడనిదే రోజు గడవదు. ఇప్పుడు అలాంటి రీల్స్​ని నిడివి పెంచుతూ న్యూ ఫీచర్​ని ప్రకటించింది ఇన్​స్టాగ్రామ్. 

ఇన్​స్టాలో కొత్త మార్పులు ఇవే (Image Source : Envato)

Source : Envato

Instagram New Features : ఉదయం లేచినప్పటి నుంచి.. సాయంత్రం పడుకునేవరకు చాలామంది సీరియస్​గా చేసే సిల్లీ పని ఏంటంటే ఇన్​స్టాగ్రామ్​లో రీల్స్ చూడడం. సమయాన్ని తినేస్తుందని తెలిసినా కూడా రీల్స్​ని స్క్రోల్ చేస్తూనే ఉంటారు. ఆఖరుకు నిద్రను ఆపుకొని మరీ రీల్స్ చూసేవాళ్లు ఉన్నారు. ఈ విషయాన్ని దృష్టిలో పెట్టుకుని ఇన్​స్టాగ్రామ్ న్యూ అప్​డేట్​తో వచ్చేసింది. ఆ ఆప్షన్ రీల్స్ చేసేవారికి మంచి బెనిఫిట్​నే ఇవ్వనుంది. 

ఇన్​స్టాగ్రామ్ రీల్స్ ఫీచర్​ని మారుస్తున్నట్లు ప్రకటించింది. ఇప్పుడు వినియోగదారులు మూడు నిమిషాల పాటు వీడియోలను రీల్ రూపంలో అప్​లోడ్ చేసేందుకు వీలు ఇస్తున్నట్లు తెలిపింది. ముందుకంటే రీల్స్ డ్యూరేషన్​ను మరో 90 సెకన్లు రెట్టింపు చేసుకునే సౌలభ్యం అందించింది. యూజర్ ఫీడ్ బ్యాక్ ఆధారంగానే ఈ మార్పు చేసినట్లు ఇన్​స్టాగ్రామ్​ హెడ్ ఆడమ్ మోస్సేరి తెలిపారు. 

వ్యూహాత్మక మార్పు.. 

గతంలో ఈ రీల్స్ నిడివిని పెంచమని తెలిపిన మోస్సేరి ఇప్పుడు ఈ అప్​డేట్​ని తెచ్చారు. యూజర్​ని ఎక్కువసేపు రీల్స్ చూస్తూ ఎంగేజ్​ చేయాలనే ఉద్దేశంతోనే ఈ ఫీచర్​ని తెచ్చినట్లు తెలుస్తుంది. ఇన్​స్టాగ్రామ్ వ్యూహంలో ఇది ప్రధాన మార్పుగా కనిపిస్తుంది. అయితే యూఎస్​లో టిక్​టాక్​ బ్యాన్ అవ్వడంతో.. దానిని క్యాష్ చేసుకునేందుకు ఈ మార్పును తెచ్చినట్లు కొందరు భావిస్తున్నారు. ఎందుకంటే టిక్​టాక్​లో మూడు నిమిషాల నిడివి వీడియోలు ఎప్పటినుంచో అందుబాటులో ఉన్నాయి. ఇప్పుడు టిక్​టాక్ బ్యాన్ కావడంతో ఆ ఫీచర్​ని ఇన్​స్టాలో ఉపయోగించుకునే వెసులుబాటు తెచ్చినట్లు తెలుస్తుంది. ఇన్​స్టాగ్రామ్ రీల్స్ నిడివిని  90 సెకన్లకు పెంచి.. రెండు సంవత్సరాలైంది. ఈ నిడివిని 10 నిమిషాలకు పెంచాలని చూసింది కానీ.. దానిపై పూర్తి వ్యతిరేకత వచ్చింది. 

లే అవుట్​లో మార్పులు 

ఇన్​స్టాగ్రామ్ ప్రొఫైల్ లేఅవుట్​లో కూడా మార్పులను ఇన్​స్టా తీసుకొచ్చింది. రీల్స్ ఎక్కువ చేయడంతో పాటు.. యూజర్ ప్రొఫైల్స్​ను క్లాసిక్ స్క్వేర్ గ్రిడ్  నుంచి దీర్ఘచతురస్రాకారం(rectangular)గా మారుస్తోంది. దీనివల్ల అప్​లోడ్ చేసిన కంటెంట్ ఫోటోలు, వీడియోలు వర్టికల్​గా మారనున్నాయి. 

ఫ్రెండ్స్ యాక్టివిటీ.. 

రీసెంట్​గా ఇన్​స్టా న్యూ ఫీచర్​ని తీసుకువచ్చింది. ఫ్రెండ్స్ లేదా ఇష్టమైన వ్యక్తులు ఎలాంటి రీల్స్​ని లైక్​ చేస్తున్నారో పాప్స్ రూపంలో చూపిస్తుంది. ఇది ఫ్రెండ్స్ మధ్య ఎంగేజింగ్ పెంచడంలో హెల్ప్ అవుతుందనే ఉద్దేశంతో తెచ్చినట్లు తెలిపారు. ఈ కొత్త ఫీచర్​ ద్వారా మీ ఫ్రెండ్స్ లైక్ చేసిన రీల్స్​కు మీరు కామెంట్లు, లైక్​లు ఇవ్వొచ్చు. అలాగే రీల్స్ ట్యాబ్​కు పైన కుడి వైపున ఉన్న బటన్ ద్వారా మీ ఫ్రెండ్స్ ఏమి చేస్తున్నారో యాక్సెస్ చేయవచ్చు. ఇది మిమ్మల్ని వారి ఫీడ్​కు తీసుకువెళ్తుంది. 

ఈ మార్పుల వల్ల ఇన్స్​స్టాలో యూజర్స్ ఎంగేజ్ అయ్యే అవకాశంతోపాటు.. ప్రైవసీని, సమయాన్ని కోరుకునేవారు వెళ్లిపోయే ప్రమాదం కూడా అంతే ఉందంటూ ఎక్స్​పర్ట్స్ చెప్తున్నారు. ఇప్పటికే రీల్స్​కి అడిక్ట్ అయినవారి పరిస్థితి మరింత దిగజారవచ్చని కూడా భావిస్తున్నారు.