Ravindra Jadeja Test Retirement: టెస్టులకు గుడ్‌బై చెప్పే యోచనలో జడ్డూ..???

రవీంద్ర జడేజా కీలక నిర్ణయం తీసుకోబోతున్నాడని సమాచారం. అతడు టెస్టు క్రికెట్‌కు వీడ్కోలు పలికేందుకు సమాలోచనలు చేస్తున్నాడని తెలిసింది.

Photo: Ravindra Jadeja / @iamjadeja (Twitter)

టీమ్‌ఇండియా సీనియర్‌ ఆల్‌రౌండర్‌ రవీంద్ర జడేజా కీలక నిర్ణయం తీసుకోబోతున్నాడని సమాచారం. అతడు టెస్టు క్రికెట్‌కు వీడ్కోలు పలికేందుకు సమాలోచనలు చేస్తున్నాడని తెలిసింది. గాయాల పాలవ్వకుండా తన కెరీర్‌ను పొడగించుకోనేందుకు ఇలా చేయబోతున్నాడని అంటున్నారు. ఈ మేరకు ఆంగ్ల మీడియాలో వార్తలు వస్తున్నాయి.

ప్రపంచంలోని అత్యుత్తమ ఆల్‌రౌండర్లలో రవీంద్ర జడేజా ఒకరు. మూడు ఫార్మాట్లలో అదరగొడుతున్నాడు. పైగా అంతర్జాతీయంగా బెస్ట్‌ అథ్లెట్‌. విరామం లేకుండా క్రికెట్‌ ఆడతాడు. అలాంటిది ఈ మధ్య కాలంలో జడ్డూ ఎక్కువగా గాయపడుతున్నాడు. అందువల్లే న్యూజిలాండ్‌తో రెండో టెస్టు ఆడలేదు. ఇంకా పూర్తిగా కోలుకోక పోవడంతో దక్షిణాఫ్రికా క్రికెట్‌ పర్యటనకు ఎంపిక చేయలేదు.

ఈ నేపథ్యంలో సుదీర్ఘ ఫార్మాట్‌కు వీడ్కోలు పలికేందుకు జడేజా ఆలోచిస్తున్నాడని దైనిక్‌ జాగరణ్‌ ఓ వార్త రాసింది. ఇక అతడి కెరీర్‌ విషయానికి వస్తే జడ్డూ 57 టెస్టులు, 168 వన్డేలు, 55 టీ20 మ్యాచులు ఆడాడు. సుదీర్ఘ ఫార్మాట్లో 2195 పరుగులు 232 వికెట్లు, వన్డేల్లో 2411 పరుగులు, 188 వికెట్లు, టీ20 క్రికెట్లో 232 పరుగులు, 46 వికెట్లు సాధించాడు.

ఇండియన్‌ ప్రీమియర్‌ లీగులో చెన్నై సూపర్‌కింగ్స్‌కు జడ్డూ ప్రాతినిధ్యం వహిస్తున్నాడు. ఈ సారి ఆ జట్టు అతడిని రూ.16 కోట్లతో రీటెయిన్‌ చేసుకుంది. కెప్టెన్‌ ఎంఎస్ ధోనీ కన్నా ఇది ఎక్కువ ధర కావడం గమనార్హం. భవిష్యత్తులో అతడిని సారథి చేయాలన్న ప్రణాళికతో సీఎస్‌కే ఉందని తెలిసింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి