Pakistan Cricket: పాక్‌ డ్రెస్సింగ్‌ రూంలో బిగ్‌ వార్‌, అంతటికి కారణం బాబరేనా?

Pakistan Cricket: పాకిస్థాన్ డ్రెస్సింగ్ రూమ్‌లో జరిగిన ఓ తీవ్ర వాగ్వాదం సోషల్ మీడియాలో వైరల్‌గా మారింది. ఓటమితో ఈ వివాదం చినికిచినికి గాలివానగా మారింది

పరాజయం తరువాత పాక్‌ డ్రెస్సింగ్‌ రూంలో బిగ్‌ వార్‌

Source : @TheRealPCB

Pakistan captain Shan Masood lose his temper: పాకిస్థాన్‌(Pakistan)డ్రెస్సింగ్‌ రూంలో లుకలుకలు మరోసారి బయటపడ్డాయి. బాబర్‌ ఆజమ్‌(Babar Azam), కోచ్‌ గిలెస్పీ(Jason Gillespie), కెప్టెన్‌ షాన్ మసూద్‌( Shan Masoo) మధ్య జరిగిన వాగ్వాదం సోషల్ మీడియాలో వైరల్‌గా మారింది. పాకిస్థాన్ డ్రెస్సింగ్ రూమ్‌లో జరిగిన ఈ తీవ్ర వాగ్వాదం సంచలనం రేపుతోంది. పాకిస్థాన్‌ డిక్లేర్డ్‌ నిర్ణయం, బంగ్లాదేశ్‌ చేతిలో ఘోర ఓటమి నేపథ్యంలో ఈ వివాదం మరింత ముదిరింది.

పాకిస్థాన్‌ ఇన్నింగ్స్‌ను ముందుగానే డిక్లేర్ చేసినందుకు పాకిస్తాన్ అభిమానులు ఇప్పటికే  బాబర్‌ ఆజమ్‌ ఆట తీరుపై తీవ్ర విమర్శలు గుప్పిస్తున్నారు. ఈ క్రమంలో ఈ ఓటమితో ఈ వివాదం చినికిచినికి గాలివానగా మారింది. తొలి ఇన్నింగ్స్‌లో బంగ్లాదేశ్ 100 పరుగులకు పైగా ఆధిక్యం సాధించడం... ఆ తర్వాత విజయం కూడా సాధించడంతో పాక్‌ క్రికెట్‌ అభిమానులు సొంత జట్టుపైనే ఆగ్రహంతో ఉన్నారు.

Shan Masoods Animated discussion with Gillespie!!! Something brewing in Pak Cricket ..#PakistanCricket #PAKvBAN pic.twitter.com/VnIa2qtEKI

— Rakesh (@raku035) August 24, 2024

అసలేం జరిగిందంటే...
బంగ్లాదేశ్‌తో జరుగుతున్న టెస్ట్‌లో మూడో రోజు కోచ్ జాసన్ గిల్లెస్పీతో షాన్‌ మసూద్‌ గొడవకు దిగడంతో డ్రెస్సింగ్ రూమ్ వేడెక్కింది. పాకిస్తాన్ సిరీస్‌కు కొత్త ప్రధాన కోచ్‌గా జాసన్ గిలెస్పీ నియమితుడయ్యాడు. డ్రెస్సింగ్‌ రూంలో గిలెస్పీతో షాన్‌ మసూద్‌ గట్టిగా అరుస్తూ ఏదో చెప్తున్న వీడియో వైరల్‌గా మారింది. ఇది పాకిస్థాన్‌ క్రికెట్‌లో పెను ప్రకంపనలు రేపుతోంది. కెప్టెన్‌ షాన్‌ మసూద్ పాక్‌ జట్టు ప్రదర్శనపై మండిపడడం.. కొత్త ప్రధాన కోచ్‌తో వాదించడం ఆ వీడియోలో స్పష్టంగా కనిపించింది. పాక్ కెప్టెన్ అంతా ఆగ్రహంగా ఉండడానికి స్టార్‌ ప్లేయర్‌ బాబర్‌ ఆజమ్‌తో విభేదాలే కారణమన్న వాదన తెరపైకి వచ్చింది. పాక్‌ జట్టు ప్రదర్శన పట్ల కెప్టెన్‌ షాన్‌ మసూద్‌ కోపంతో ఊగిపోతూ గిల్లెస్పీపై ఆ కోపాన్ని చూపించడం సంచలనంగా మారింది. ఆసలు ఈ గొడవకు దారితీసిన ఘటన ఏమిటో స్పష్టంగా తెలియదు  

సోషల్‌ మీడియాలో విమర్శల వర్షంపాకిస్థాన్‌ డ్రెస్సింగ్‌ రూంలో కెప్టెన్ షాన్ మసూద్.. హెడ్‌ కోచ్‌ గిల్లెస్పీ మధ్య జరిగిన వాగ్వాదంతో పాక్‌ అభిమానులు మండిపడుతున్నారు. ఈ డ్రెస్సింగ్‌ రూం గొడవలతోనే పాక్‌ క్రికెట్ ఆటతీరు నానాటికి తీసికట్టుగా మారిపోతుందని మండిపడుతున్నారు. ‘బాబర్ కెప్టెన్సీని వదులుకోలేడు’అంటూ కొందరు పాక్‌ అభిమానులు విమర్శల వర్షం కురిపిస్తున్నారు. పాకిస్థాన్ జట్టులో లుకలుకలకు బాబర్‌ ఆజమే కారణమని మరికొందరు కామెంట్లు చేస్తున్నారు. పాకిస్తాన్ ఘోర ప్రదర్శన తర్వాతే గిల్లెస్పీ, షాన్ మసూద్ మధ్య పోరాటం జరిగిందని సోషల్ మీడియాలో అభిమానులు అంటున్నారు. బాబర్ అజామ్,  మహ్మద్ రిజ్వాన్ ఇద్దరూ సులువైన క్యాచ్‌లను వదలడంతోనే పాకిస్థాన్‌... బంగ్లాదేశ్‌తో జరిగిన టెస్ట్‌లో ఓడిపోయిందని మరికొందరు కామెంట్లు చేస్తున్నారు. మసూద్ కెప్టెన్సీని బాబర్ దెబ్బతీస్తున్నాడని, కెప్టెన్‌కు కోపం తెప్పించేలా వ్యవహరిస్తున్నాడని అభిమానులు పేర్కొన్నారు.