IND VS SA Highlights: సిరీస్ సమం చేసిన టీమిండియా - సౌతాఫ్రికాపై భారీ విక్టరీ!

దక్షిణాఫ్రికాతో జరుగుతున్న నాలుగో టీ20 మ్యాచ్‌లో టీమిండియా 82 పరుగులతో విజయం సాధించింది.

వికెట్ తీసిన ఆనందంలో అవేష్ ఖాన్ (Image Credits: BCCI)

దక్షిణాఫ్రికాతో జరుగుతున్న టీ20 సిరీస్‌లో టీమిండియాకు వరుసగా రెండో విజయం లభించింది. నాలుగో టీ20లో టీమిండియా 82 పరుగుల తేడాతో విజయం సాధించింది. దీంతో ఐదు టీ20ల సిరీస్‌ను దక్షిణాఫ్రికా 2-2తో సమం చేసింది. మొదట బ్యాటింగ్ చేసిన టీమిండియా 20 ఓవర్లలో ఆరు వికెట్ల నష్టానికి 169 పరుగులు చేసింది. అనంతరం దక్షిణాఫ్రికా 16.5 ఓవర్లలో 87 ఆలౌట్ అయింది.

డీకే షో...
టాస్ ఓడి బ్యాటింగ్‌కు దిగిన టీమిండియాకు ఆరంభంలోనే ఎదురుదెబ్బ తగిలింది. ఓపెనర్ రుతురాజ్ గైక్వాడ్ (5: 7 బంతుల్లో, ఒక ఫోర్), వన్‌డౌన్ బ్యాటర్ శ్రేయస్ అయ్యర్ (4: 2 బంతుల్లో, ఒక ఫోర్) విఫలం అయ్యారు. దీంతో 24 పరుగులకే టీమిండియా రెండు వికెట్లు కోల్పోయింది. ఆ తర్వాత కాసేపటికే ఇషాన్ కిషన్ (27: 26 బంతుల్లో, మూడు ఫోర్లు, ఒక సిక్సర్) కూడా అవుటయ్యాడు. అప్పటికి స్కోరు 40 పరుగులు మాత్రమే.

ఈ దశలో కెప్టెన్ రిషబ్ పంత్‌కు (17: 23 బంతుల్లో, రెండు ఫోర్లు) హార్దిక్ పాండ్యా జతకలిశాడు. వీరిద్దరూ నాలుగో వికెట్‌కు 41 పరుగులు జోడించారు. తన సహజశైలికి భిన్నంగా నిదానంగా ఆడిన పంత్ ఎక్కువసేపు క్రీజులో నిలబడలేదు. ఈ దశలో హార్దిక్‌కు దినేష్ కార్తీక్ జతకలిశాడు. వీరిద్దరూ ఐదో వికెట్‌కు 65 పరుగులు జోడించారు. వీరు వేగంగా ఆడటంతో టీమిండియా చివరి ఐదు ఓవర్లలో 73 పరుగులు చేసింది. దీంతో 20 ఓవర్లు ముగిసేసరికి టీమిండియా ఆరు వికెట్లు నష్టపోయి 169 పరుగులు సాధించింది. దక్షిణాఫ్రికా బౌలర్లలో లుంగి ఎంగిడి రెండు వికెట్లు తీయగా... మార్కో జాన్సెన్, డ్వేన్ ప్రిటోరియస్, నోర్జే, కేశవ్ మహరాజ్‌లకు తలో వికెట్ దక్కింది.

అదరగొట్టిన అవేష్
170 పరుగుల లక్ష్యంతో బరిలోకి దిగిన దక్షిణాఫ్రికా ఏ దశలోనూ లక్ష్యం దిశగా సాగలేదు. కెప్టెన్, ఓపెనర్ తెంబా బవుమా రన్ తీసే సమయంలో గాయపడి రిటైర్డ్ అవుట్‌గా వెనుదిరిగాడు. ఆ తర్వాత దక్షిణాఫ్రికా వరుస విరామాల్లో వికెట్లు కోల్పోతూనే ఉన్నారు.

రాసీ వాన్ డర్ డుసెన్ (20: 20 బంతుల్లో, రెండు ఫోర్లు), క్వింటన్ డికాక్ (14: 13 బంతుల్లో, రెండు ఫోర్లు), మార్కో జాన్సెన్ (12: 17 బంతుల్లో, ఒక ఫోర్, ఒక సిక్సర్) మినహా మరెవరూ రెండంకెల స్కోరు చేయలేకపోయారు. వరుస విరామాల్లో వికెట్లు పడటంతో దక్షిణాఫ్రికా 16.5 ఓవర్లలో 87 పరుగులకే ఆలౌట్ అయింది. భారత బౌలర్లలో అవేష్ ఖాన్ నాలుగు వికెట్లు, యుజ్వేంద్ర చాహల్ రెండు వికెట్లు తీసుకున్నారు. హర్షల్ పటేల్, అక్షర్ పటేల్‌లకు చెరో వికెట్ దక్కింది.