AUS vs PAK: లిఫ్ట్‌లో ఇరుక్కుపోయిన థర్డ్‌ అంపైర్‌ ఆసిస్‌-పాక్‌ మ్యాచ్‌లో ఆసక్తికర ఘటన

AUS vs PAK: మెల్‌బోర్న్ మైదానంలోకి లంచ్ త‌ర్వాత ప్లేయ‌ర్లు, ఆన్ ఫీల్డ్ అంపైర్లు మైదానంలోకి వ‌చ్చినా మ్యాచ్‌ ఆల‌స్యంగా ప్రారంభమైంది. కారణమేంటా అని ఆరాతీసిన క్రికెట్‌ అభిమానులు నవ్వుకున్నారు.

లిఫ్ట్‌లో ఇరుక్కుపోయిన థర్డ్‌ అంపైర్‌ ఆసిస్‌-పాక్‌ మ్యాచ్‌లో ఆసక్తికర ఘటన( Image Source : Twitter )

ఆస్ట్రేలియా, పాకిస్థాన్ మ‌ధ్య జరుగుతున్న రెండ‌వ టెస్టు మూడో రోజు లంచ్‌ బ్రేక్‌ తర్వాత ఆసక్తికరమైన ఘటన జరిగింది. మెల్‌బోర్న్ మైదానంలోకి లంచ్ త‌ర్వాత ప్లేయ‌ర్లు, ఆన్ ఫీల్డ్ అంపైర్లు మైదానంలోకి వ‌చ్చినా మ్యాచ్‌ ఆల‌స్యంగా ప్రారంభమైంది. కారణమేంటా అని ఆరాతీసిన క్రికెట్‌ అభిమానులు నవ్వుకున్నారు. థర్డ్‌ అంపైర్ రిచ‌ర్డ్ ఇల్లింగ్‌వ‌ర్త్ లిఫ్ట్‌లో ఇరుక్కుపోవ‌డం వ‌ల్ల మ్యాచ్‌ను ఆపేశారు. అనుక‌ున్న స‌మ‌యానికి థర్డ్‌ అంపైర్‌ త‌న చైర్‌లోకి రాలేక‌పోయాడు. అంతా సిద్ధంగా ఉన్నా మ్యాచ్‌ ఎందుకు ఆపారో అర్ధంకాక ఆటగాళ్లు, ఫీల్డ్‌ అంపైర్లు సందిగ్దంలో పడ్డారు. అయితే విషయం తెలిసి కాసేపు నవ్వుకున్నారు. థర్డ్ అంపైర్‌ ఇల్లింగ్‌వ‌ర్త్ త‌న పొజిష‌న్ తీసుకున్న త‌ర్వాత మ్యాచ్‌ను స్టార్ట్ చేశారు. 
ఇక మ్యాచ్‌ విషయానికి వస్తే...
 స్వదేశంలో పాకిస్థాన్‌తో జ‌రుగుతున్న బాక్సిండ్ టెస్ట్‌లో ఆస్ట్రేలియా ప‌ట్టుబిగిస్తోంది. మూడో రోజు తొలి సెష‌న్‌లోనే పాక్‌ను చుట్టేసిన ఆసీస్.. రెండో ఇన్నింగ్స్‌లో 187 ప‌రుగులు చేసింది. మిచెల్ మార్ష్‌(95), స్టీవ్ స్మిత్(50) హాఫ్ సెంచరీల‌తో రాణించడంతో మూడో రోజు ఆట ముగిసే స‌రికి ఆసీస్ 6 వికెట్ల న‌ష్టానికి 187 ప‌రుగులు చేసింది. ఫామ్‌లో ఉన్న స్మిత్‌ ఆట ముగుస్తుందన‌గా ఆఖ‌రి బంతికి షాహిన్ ఆఫ్రిది బౌలింగ్‌లో ఔట‌య్యాడు. మొత్తంగా ఈ టెస్టులో కంగారూ జ‌ట్టు 241 ప‌రుగుల ఆధిక్యంలో ఉంది. దాంతో, మ్యాచ్ విజేత‌ను నిర్ణయించేందుకు నాలుగో రోజు ఆట కీల‌కం కానుంది.

తొలి ఇన్నింగ్స్‌ సాగిందిలా..
ఇప్పటికే తొలి టెస్టులో ఘన విజయం సాధించినా కంగారులు... రెండో టెస్ట్‌లోనూ దూకుడుగా ముందుకు సాగుతున్నారు. ఈ మ్యాచ్ మొద‌టి ఇన్నింగ్స్‌లో ఆస్ట్రేలియా 318 ప‌రుగులు చేసింది. మార్నస్ ల‌బుషేన్ (63) హాఫ్ సెంచ‌రీ చేశాడు. ఉస్మాన్ ఖ‌వాజా (42), మిచెల్ మార్ష్ (41), డేవిడ్ వార్నర్ (38) లు రాణించారు. పాక్‌ బౌల‌ర్ల‌లో అమీర్ జమాల్ మూడు వికెట్లు ప‌డ‌గొట్టాడు, షాహీన్ అఫ్రీది, మీర్ హంజా, హసన్ అలీ లు త‌లా రెండు వికెట్లు తీశారు. అగా సల్మాన్ ఓ వికెట్ సాధించాడు. అనంత‌రం మొద‌టి ఇన్నింగ్స్‌ను ఆరంభించిన పాక్‌.. రెండో రోజు ఆట ముగిసే స‌మ‌యానికి ఆరు వికెట్లు కోల్పోయి 194 ప‌రుగులు చేసింది. మహ్మద్ రిజ్వాన్ (29), అమీర్ జమాల్ (2)లు క్రీజులో ఉన్నారు. అబ్దుల్లా షఫీక్ (62), షాన్ మసూద్ (54)లు అర్ధ‌శ‌త‌కాల‌తో రాణించారు. ఆస్ట్రేలియా మొద‌టి ఇన్నింగ్స్ స్కోరుకు పాకిస్తాన్ ఇంకా 124 ప‌రుగుల దూరంలో ఉంది. ఆరంభంలో పాక్‌ మెరుగ్గా కనిపించినప్పటికీ. కమిన్స్‌ సూపర్‌ బౌలింగ్‌తో పాక్‌ను దెబ్బతీశాడు. ఆసీస్ బౌల‌ర్లలో పాట్ క‌మిన్స్ మూడు వికెట్లు తీయ‌గా, నాథ‌న్ ల‌య‌న్ రెండు, జోష్ హేజిల్‌వుడ్ లు ఓ వికెట్ ప‌డ‌గొట్టాడు.

పాక్‌ ఖాతాలో చెత్త రికార్డు
టెస్టు క్రికెట్‌లో పాకిస్తాన్ జ‌ట్టు ఓ చెత్త రికార్డును త‌న ఖాతాలో వేసుకుంది. ఈ మ్యాచ్‌లో పాకిస్తాన్ తొలి ఇన్నింగ్స్‌లో ఏకంగా 52 ప‌రుగుల‌ను ఎక్స్‌ట్రా ల రూపంలో ఇచ్చింది. ఈ క్రమంలో ఓ చెత్త రికార్డును న‌మోదు చేసింది. మెల్‌బోర్న్ క్రికెట్ గ్రౌండ్‌లో ఓ టెస్టు మ్యాచ్ ఇన్నింగ్స్‌లో అత్యధిక ఎక్స్‌ట్రాలు ఇచ్చిన జ‌ట్టుగా పాక్ అపఖ్యాతి మూటగట్టుకుంది. ఎక్స్‌ట్రాస్‌లో 15 వైడ్‌లు, 20 బైలు, 2 నోబాల్స్‌ ఉన్నాయి.