Sri Rama Kalyana Talambralu: భద్రాద్రి రామయ్య భక్తులకు గుడ్ న్యూస్ - ఇలా చేస్తే మీ ఇంటికే రాములోరి కల్యాణ తలంబ్రాలు

Telangana News: భద్రాద్రి రామయ్య కల్యాణ తలంబ్రాలను ఇంటికే డెలివరీ చేసేలా టీఎస్ఆర్టీసీ చర్యలు చేపట్టింది. దీనికి సంబంధించిన పోస్టర్ ను సంస్థ ఎండీ వీసీ.సజ్జనార్ సోమవారం విడుదల చేశారు.

భద్రాద్రి రామయ్య కల్యాణ తలంబ్రాలు హోం డెలివరీ (Image Source: Twitter)

Tsrtc To Home Delivery Bhadrachalam Sri Rama Kalyana Talambralu: భద్రాచలం రామయ్య భక్తులకు టీఎస్ఆర్టీసీ (Tsrtc) గుడ్ న్యూస్ చెప్పింది. శ్రీరామనవమి సందర్భంగా భద్రాచలంలో (Bhadrachalam) జరిగే శ్రీ సీతారామచంద్రుల కల్యాణోత్సవ తలంబ్రాలను ఈ ఏడాది కూడా భక్తులకు అందించేందుకు సిద్ధమైంది. దేవాదాయ శాఖ సహకారంతో రాములోరి కల్యాణ తలంబ్రాలను ఇంటికే డోర్ డెలివరీ చేసేలా చర్యలు చేపట్టింది. ఈ నెల 17న భద్రాచలంలో వైభవంగా జరిగే రామయ్య కల్యాణోత్సవ వేడుకలకు హాజరు కాలేని భక్తులు ఈ అవకాశాన్ని ఉపయోగించుకోవచ్చు. రామయ్య తలంబ్రాలు కావాలనుకునే భక్తులు టీఎస్ఆర్టీసీ లాజిస్టిక్స్ కేంద్రాల్లో రూ.151 చెల్లించి వివరాలు నమోదు చేసుకోవాలి. రామయ్య కల్యాణం అనంతరం తలంబ్రాలను బుక్ చేసుకున్న భక్తులకు హోం డెలివరీ చేస్తారు.

పోస్టర్ రిలీజ్

హైదరాబాద్ లోని బస్ భవన్ లో భద్రాద్రి సీతారాముల కల్యాణ తలంబ్రాల బుకింగ్ పోస్టర్ ను టీఎస్ఆర్టీసీ ఎండీ సజ్జనార్ (Sajjanar) రిలీజ్ చేశారు. 'ఎంతో నియమ నిష్టలతో ధాన్యాన్ని గోటితో ఒలిచి తీసిన కోటి బియ్యం గింజలను తలంబ్రాలుగా ఎన్నో ఏళ్లుగా రాములోరి కల్యాణంలో ఉపయోగిస్తున్నారు. విశిష్టమైన ఈ తలంబ్రాలను భక్తుల ఇంటికి చేర్చాలని రెండేళ్ల క్రితమే టీఎస్‌ఆర్టీసీ యాజమాన్యం నిర్ణయించింది. ఈ ప్రయత్నానికి భక్తుల నుంచి మంచి స్పందన వచ్చింది. సంస్థపై ఉన్న విశ్వాసంతో భక్తులు భారీ సంఖ్యలో తలంబ్రాలను బుక్‌ చేసుకుంటున్నారు. 2022లో దాదాపు 89 వేల మంది భక్తులకు తలంబ్రాలను బుక్ చేసుకోగా.. గత ఏడాది 1.17 లక్షల మంది భక్తులకు తలంబ్రాలను సంస్థ అందజేసింది.' అని సజ్జనార్ అన్నారు.

రాష్ట్రంలోని అన్ని టీఎస్ఆర్టీసీ లాజిస్టిక్స్ కౌంటర్లలోనూ తలంబ్రాలను బుక్ చేసుకోవచ్చు. అలాగే, టీఎస్ఆర్టీసీ మార్కెటింగ్ ఎగ్జిక్యూటివ్స్ కూడా భక్తుల వద్ద నేరుగా తలంబ్రాల ఆర్డర్లు బుక్ చేసుకుంటారు. తలంబ్రాల సేవను పొందాలనుకునే భక్తులు టీఎస్ఆర్టీసీ కాల్ సెంటర్ ఫోన్ నెంబర్లు 040 - 23450033, 040 - 69440000, 040 - 69440069ను సంప్రదించాలని అధికారులు సూచించారు.

భక్తుల ఇంటికే భద్రాద్రి శ్రీ సీతారామచంద్రుల కల్యాణ తలంబ్రాలు

రూ.151 చెల్లిస్తే విశిష్టమైన రాములోరి తలంబ్రాలు పొందే సదావకాశం

శ్రీరామ నవమి సందర్భంగా భద్రాచలంలో జరగబోయే శ్రీ సీతారామచంద్రుల కల్యాణోత్సవ తలంబ్రాలను భక్తులకు అందజేయాలని #TSRTC యాజమాన్యం నిర్ణయించింది. గత ఏడాది… pic.twitter.com/POrpO87fEi

— VC Sajjanar - MD TSRTC (@tsrtcmdoffice) April 1, 2024